برمنگھم: ورلڈ چیمپئن شپ آف لیجنڈز کے فائنل میں جنوبی افریقہ نے شاندار کارکردگی کا مظاہرہ کرتے ہوئے پاکستان کو نو وکٹوں سے شکست دے دی اور ٹائٹل اپنے نام کر لیا۔ہفتے کے روز برمنگھم میں کھیلے گئے فائنل میچ میں جنوبی افریقہ نے پاکستان کی جانب سے دیا گیا 195 رنز کا ہدف صرف 17 اوورز میں ایک وکٹ کے نقصان پر حاصل کر لیا۔

میچ میں جنوبی افریقہ کے ہاشم آملہ 18 رنز بنا کر آؤٹ ہوئے، جبکہ کپتان اے بی ڈی ویلیئرز نے دھواں دار بیٹنگ کرتے ہوئے 120 رنز کی ناقابلِ شکست اننگز کھیلی۔ ان کا ساتھ جے پی ڈومنی نے دیا جنہوں نے 50 رنز کی فاتحانہ اننگز کھیل کر اپنی ٹیم کو کامیابی سے ہمکنار کیا۔

پاکستان کی جانب سے واحد وکٹ سعید اجمل کے حصے میں آئی۔اس سے قبل پاکستان نے ٹاس جیت کر پہلے بیٹنگ کا فیصلہ کیا اور مقررہ 20 اوورز میں 5 وکٹوں کے نقصان پر 196 رنز بنائے۔

پاکستان کے نمایاں بیٹر شرجیل خان رہے جنہوں نے 76 رنز کی شاندار اننگز کھیلی۔ دیگر بلے بازوں میں کامران اکمل 2، محمد حفیظ 17، شعیب ملک 20 اور آصف علی 28 رنز بنا کر آؤٹ ہوئے، جب کہ عمر امین 36 اور عامر یامین 2 رنز کے ساتھ ناٹ آؤٹ رہے۔

یاد رہے کہ پاکستان کی ٹیم فائنل سے قبل ٹورنامنٹ میں ناقابلِ شکست رہی تھی۔ پاکستان نے سیمی فائنل میں اس وقت براہ راست رسائی حاصل کی جب بھارت کی ٹیم میچ سے دستبردار ہو گئی۔

دوسری جانب جنوبی افریقہ نے سیمی فائنل میں آسٹریلیا کو ایک سنسنی خیز مقابلے کے بعد شکست دے کر فائنل میں جگہ بنائی تھی۔

ورلڈ چیمپئن شپ آف لیجنڈز کیا ہے؟

ورلڈ چیمپئنز آف لیجنڈز (WCL) ایک T20 کرکٹ ٹورنامنٹ ہے جو ہر سال انگلینڈ میں منعقد ہوتا ہے اور انگلینڈ اینڈ ویلز کرکٹ بورڈ (ECB) کی منظوری سے کھیلا جاتا ہے۔

یہ ٹورنامنٹ ریٹائرڈ اور غیر کنٹریکٹ یافتہ کھلاڑیوں پر مشتمل ہوتا ہے، جن کا تعلق دنیائے کرکٹ کی نمایاں ٹیموں جیسے پاکستان، بھارت، انگلینڈ، آسٹریلیا، ویسٹ انڈیز اور جنوبی افریقہ سے ہوتا ہے۔

2024 میں اس ٹورنامنٹ کا پہلا ایڈیشن کھیلا گیا، اور اب یہ دنیا بھر کے کرکٹ شائقین کی توجہ کا مرکز بن چکا ہے۔اس ایونٹ میں شاہد آفریدی، یووراج سنگھ، کیون پیٹرسن، بریٹ لی، ایئن مورگن اور کرس گیل جیسے مشہور سابق کھلاڑیوں نے شرکت کی۔

پاکستان کی ٹیم

شرجیل خان، کامران اکمل (وکٹ کیپر)، محمد حفیظ (کپتان)، آصف علی، شعیب ملک، عماد وسیم، عمر امین، عامر یامین، سہیل تنویر، رومان رئیس اور سعید اجمل۔

جنوبی افریقہ کی ٹیم

ہاشم آملہ، جے جے سمٹس، مورنے وین وِک (وکٹ کیپر)، سارل ایروئی، جے پی ڈومنی، وین پارنیل، اے بی ڈی ویلیئرز (کپتان)، ہارڈس ولجون، جیکس روڈولف، ایرون فینگیسو، عمران طاہر اور ڈوان اولیویئر۔