نئی دہلی: ہندوستان اور پاکستان کے درمیان رواں جنگی ماحول میں  کرکٹ  نشانہ بن گئی ہے ،دونوں ملکوں میں کرکٹ کے میلے لگے تھے جو جنگ کے سائے کے سبب تقریبا اجڑ گئے ہیں ۔ ہندوستان میں انڈین پریمیر لیگ کو غیر معینہ مدت کے لیے معطل کر دیا گیا ہے۔ تو دوسری جانب پاکستان میں  پاکستان پریمیر لیگ کو  دبئی  منتقل کردیا گیا ہے ۔بی سی سی آئی کے ایک عہدیدار نے کہا کہ موجودہ صورتحال میں ایونٹ کو جاری رکھنا مناسب نہیں لگتا۔جمعرات کو جموں اور پٹھان کوٹ کے قریبی شہروں میں فضائی حملے کے خدشے کے باعث پنجاب کنگز اور دہلی کیپیٹلز کے درمیان دھرم شالہ میں کھیلا جانے والا میچ منسوخ ہونے کے بعد سے ہی لیگ کے مستقبل پر غیریقینی کے بادل منڈلا رہے تھے۔

بی سی سی آئی کے ایک اہلکار نے پی ٹی آئی کو تصدیق کرتے ہوئے کہاکہ وہ اچھا نہیں لگتا کہ جب ملک جنگ کے حالات سے گزر رہا ہو تو کرکٹ جاری رہے۔آئی پی ایل کی معطلی کا مطلب یہ ہے کہ بورڈ بقیہ میچز کسی موزوں وقت پر کرانے کی کوشش کرے گا، تاہم اس کی تفصیلات تنازع کے خاتمے کے بعد ہی طے کی جائیں گی۔ابھی لیگ کے بارہ لیگ میچز اور چار ناک آؤٹ مقابلے باقی ہیں۔

یہ فیصلہ پہلگام دہشت گرد حملے (22 اپریل) میں 26 افراد کے جاں بحق ہونے کے بعد بھارت کی جانب سے پاکستان اور پاکستان کے زیر قبضہ جموں و کشمیر میں دہشت گردی کے ٹھکانوں پر میزائل حملے کرنے کے کچھ دن بعد سامنے آیا ہے۔جمعرات کو بھارت کے کئی اضلاع میں بلیک آؤٹ نافذ کیا گیا جن میں پٹھان کوٹ، امرتسر، جالندھر، ہوشیار پور، موہالی (پنجاب) اور یونین ٹیریٹری چندی گڑھ شامل ہیں۔ اس دوران جموں میں دھماکوں جیسی آوازوں اور فضائی حملوں کی وارننگ کی اطلاعات بھی سامنے آئیں۔

دن کے آغاز میں یہ بھی رپورٹ ہوا کہ پاکستان سپر لیگ (پی ایس ایل) کو لاہور، راولپنڈی اور دیگر شہروں میں بھارتی ڈرون حملوں کے بعد متحدہ عرب امارات منتقل کر دیا گیا ہے۔

ذرائع کے مطابق، موجودہ فوجی کشیدگی نے غیر ملکی کھلاڑیوں میں خاصی تشویش پیدا کر دی ہے اور وہ آئندہ چند روز میں واپس اپنے ملک روانہ ہوں گے۔ گزشتہ سال کی میگا نیلامی میں 10 فرنچائزز نے 62 غیر ملکی کھلاڑیوں کے ساتھ معاہدے کیے تھے۔

ایک آئی پی ایل ٹیم کے عہدیدار نے پی ٹی آئی کو بتایاکہ کھلاڑی خیریت سے ہیں لیکن جو کچھ ہو رہا ہے اسے دیکھنے کے بعد ظاہر ہے کہ وہ فکرمند ہیں۔دہلی کیپیٹلز اور پنجاب کنگز کے کھلاڑی اس وقت سڑک کے ذریعے دھرم شالہ سے دہلی واپس آ رہے ہیں۔جمعہ کے روز لکھنؤ میں لکھنؤ سپر جائنٹس(LSG) اور رائل چیلنجرز بنگلور کے درمیان میچہونا تھا، جو اب معطل کر دیا گیا ہے۔

"قوم سب سے پہلے،"لکھنؤ سپر جائنٹس نے لیگ کی معطلی کے بعد اپنے آفیشل سوشل میڈیا پیج پر پوسٹ کیا۔

سڈنی میں کرکٹ آسٹریلیا نے کہا کہ وہ بھارت اور پاکستان کی صورتحال پر قریبی نظر رکھے ہوئے ہے، جب کہ پاکستان نے اپنی قومی لیگ پی ایس ایل کو بھارتی فوجی کارروائی کے بعد متحدہ عرب امارات منتقل کر دیا ہے۔نیوزی لینڈ کی کھلاڑیوں کی تنظیم نے بھی بھارت اور پاکستان میں سیکیورٹی کے حوالے سے خدشات کا اظہار کیا ہے۔

 پاکستان سپر لیگ کے باقی میچز متحدہ عرب امارات منتقل — پی سی بی کا بڑا فیصلہ