پالی کیلے : آئرلینڈ کے خلاف میچ بارش کے باعث منسوخ ہونے کے بعد زمبابوے نے آئی سی سی مینز ٹی ٹوئنٹی ورلڈ کپ 2026 کے سپر 8 مرحلے کے لیے کوالیفائی کر لیا۔ اس تاریخی کامیابی پر کپتان سکندر رضا سمیت پوری ٹیم نے اسٹیڈیم میں موجود شائقین کے ساتھ بھرپور جشن منایا۔

کھلاڑیوں نے قومی پرچم تھامے مداحوں کے ساتھ تالیاں بجائیں اور خوشی کا اظہار کیا۔ زمبابوے ٹورنامنٹ کی ساتویں ٹیم بنی جس نے سپر 8 میں جگہ بنائی۔ اس پیش رفت کے بعد آسٹریلیا اور آئرلینڈ دونوں کا سفر ختم ہو گیا۔

آئرلینڈ کے ساتھ پوائنٹس تقسیم ہونے کے بعد زمبابوے کے تین میچوں میں پانچ پوائنٹس ہو گئے جبکہ آسٹریلیا کے صرف دو پوائنٹس ہیں اور وہ آخری گروپ میچ جیت کر بھی زمبابوے تک نہیں پہنچ سکتا۔

زمبابوے کو سپر 8 کے گروپ جی 1 میں رکھا گیا ہے جہاں اس کا مقابلہ بھارت جنوبی افریقہ اور ویسٹ انڈیز سے ہوگا۔ دوسرے گروپ میں سری لنکا انگلینڈ نیوزی لینڈ اور پاکستان یا امریکا میں سے ایک ٹیم شامل ہوگی۔