ممبئی : سعودی عرب میں ایک شاندار ٹی20 لیگ کے آغاز کی تیاریاں زور و شور سے جاری ہیں، جہاں کھلاڑیوں پر دولت کی بارش کی جائے گی۔ مگر اس لیگ کے آغاز سے نہ صرف ہندوستان کی آئی پی ایل بلکہ انگلینڈ کی مشہور لیگ ’دی ہنڈریڈ‘ کو بھی بھاری نقصان ہو سکتا ہے۔ذرائع کے مطابق ہندوستان ی کرکٹ بورڈ (بی سی سی آئی) اور انگلینڈ کرکٹ بورڈ (ای سی بی) نے اس مجوزہ لیگ پر تحفظات کا اظہار کرتے ہوئے اس کے خلاف حکمت عملی بنانا شروع کر دی ہے، جبکہ آسٹریلیا اس لیگ میں اپنے روشن مستقبل کو دیکھتے ہوئے اسے ایک سنہری موقع سمجھ رہا ہے۔ یہی وجہ ہے کہ کرکٹ آسٹریلیا اس لیگ سے ممکنہ فوائد سمیٹنے کے لیے گہری دلچسپی لے رہا ہے۔

بی سی سی آئی اور ای سی بی کھلاڑیوں کو این او سی دینے سے انکار کریں گے

برطانوی اخبار دی گارجین کے مطابق بی سی سی آئی اور ای سی بی اس بات پر سنجیدگی سے غور کر رہے ہیں کہ اپنے کھلاڑیوں کو اس سعودی لیگ میں شرکت سے روکنے کے لیے این او سی(No Objection Certificate)جاری نہ کیا جائے۔ اس کا مطلب یہ ہے کہ ہندوستان اور انگلینڈ کے معروف اسٹار کرکٹرز اس لیگ میں ایکشن میں نظر نہیں آئیں گے۔حال ہی میں لندن کے تاریخی گراؤنڈ لارڈز میں آسٹریلیا اور جنوبی افریقہ کے درمیان ہونے والے ورلڈ ٹیسٹ چیمپئن شپ فائنل کے دوران بی سی سی آئی اور ای سی بی کے اعلیٰ حکام کے درمیان اس مسئلے پر ایک اہم ملاقات ہوئی، جس میں یہ فیصلہ کیا گیا کہ دونوں بورڈز سعودی عرب کی اس نئی لیگ کی حمایت نہیں کریں گے۔

گرینڈ سلیم طرز کا منفرد فارمیٹ

اطلاعات ہیں کہ سعودی عرب کی اس بلند عزائم والی ٹی20 لیگ کو"SRJ" گروپ کے تحت شروع کیا جا سکتا ہے۔ میڈیا رپورٹس کے مطابق SRJاس لیگ میں تقریباً 400 ملین امریکی ڈالر(یعنی تقریباً 3442 کروڑ ہندوستان ی روپے) کی خطیر رقم سرمایہ کاری کے لیے تیار ہے۔یہ بھی بتایا جا رہا ہے کہ اس مجوزہ لیگ میں کل آٹھ ٹیمیں حصہ لیں گی، اور اس کا فارمیٹ ٹینس کے عالمی گرینڈ سلیم طرز پر رکھا جائے گا۔ اس کے تحت تمام ٹیمیں ہر سال مختلف شہروں اور اسٹیڈیمز میں چار مختلف ٹورنامنٹس میں شرکت کریں گی، جو اس لیگ کو عالمی سطح پر منفرد اور پُرکشش بنائے گا۔سعودی عرب کی یہ متوقع ٹی20 لیگ دنیا کے بڑے کرکٹ بورڈز کے لیے ایک نئی چیلنج بن کر سامنے آ رہی ہے۔ اگرچہ ہندوستان اور انگلینڈ اس کا بائیکاٹ کرنے کا ارادہ رکھتے ہیں، آسٹریلیا جیسے ممالک اسے ایک نئے دور کی شروعات سمجھ رہے ہیں۔ اگر یہ منصوبہ کامیاب ہوتا ہے تو یہ عالمی کرکٹ کی موجودہ طاقت کے توازن کو بدل سکتا ہے۔