لکھنؤ::ہندستان کے کرکٹر رنکو سنگھ کو اتر پردیش حکومت نے ریجنل اسپورٹس آفیسر کے عہدے پر مقرر کیا ہے۔ وزیر اعلیٰ یوگی آدتیہ ناتھ نے ان کی شاندار کارکردگی کو سراہتے ہوئے انہیں تقرری کا خط دیا۔

رنکو سنگھ نے آئی پی ایل 2023 میں اپنی دھماکہ خیز بیٹنگ کے ذریعے شہرت حاصل کی۔ انہوں نے ایک میچ میں مسلسل 5 چھکے لگا کر اپنی ٹیم کو یادگار جیت دلائی۔ اس کے بعد وہ ہندستانی ٹیم کے اہم کھلاڑی بن گئے اور ایشین گیمز ایشیا کپ اور ٹی 20 ورلڈ کپ میں ٹیم کی کامیابیوں میں نمایاں کردار ادا کیا۔

وزیر اعلیٰ نے کہا کہ اتر پردیش ملک کی پہلی ریاست ہے جو کھلاڑیوں کو سرکاری ملازمتوں میں ترجیح دے رہی ہے۔ اب تک 500 سے زیادہ کھلاڑیوں کو مختلف عہدوں پر تقرری دی جا چکی ہے۔

رنکو سنگھ کو آئی پی ایل 2026 کے لیے کولکاتا نائٹ رائیڈرز کا نائب کپتان بھی بنایا گیا ہے جہاں وہ اجنکیا رہانے کے ساتھ قیادت کی ذمہ داری نبھائیں گے۔

اگرچہ حالیہ عرصے میں ان کی کارکردگی میں کچھ کمی آئی ہے لیکن وہ اب بھی ٹیم کے اہم کھلاڑی سمجھے جاتے ہیں اور مشکل حالات میں اپنی ذمہ داری بخوبی ادا کرتے ہیں۔