لاہور ۔ قذافی سٹیڈیم میں کھیلے گئے پہلے کرکٹ ٹیسٹ میں پاکستان نے جنوبی افریقہ کو 93 رنز سے شکست دے کر دو میچوں کی سیریز میں برتری حاصل کر لی ہے۔بدھ کے روز میچ کے چوتھے دن کا آغاز جنوبی افریقہ کے بلے باز رائن رکلٹن اور ٹونی ڈی زوزی نے کیا، تاہم پہلی اننگز کے سینچورین ڈی زوزی بغیر کوئی رن بنائے شاہین شاہ آفریدی کا شکار بن گئے۔

بعد ازاں نعمان علی نے ٹریسٹن سٹبز اور ڈیوڈ بریوس کو آؤٹ کیا، جبکہ ساجد خان نے رکلٹن کو 45 رنز پر پویلین کی راہ دکھائی۔

اس کے بعد بریوس نے جارحانہ انداز اپناتے ہوئے 54 گیندوں پر 54 رنز کی اننگز کھیلی، مگر وہ بھی نعمان علی کا شکار ہو گئے، جنہوں نے میچ میں 10 وکٹیں حاصل کیں۔

شاہین شاہ آفریدی نے وریینی اور سبرائن کو آؤٹ کیا، ساجد خان نے متھو سوامے کو آؤٹ کیا، اور آخری کھلاڑی کو بھی شاہین آفریدی نے بولڈ کیا۔

دوسری اننگز میں نعمان علی اور شاہین شاہ آفریدی نے چار چار وکٹیں حاصل کیں، جبکہ دو وکٹیں ساجد خان کے حصے میں آئیں۔ آفریدی نے میچ کے آخری حصے میں شاندار ریورس سوئنگ بولنگ کا مظاہرہ کیا۔

پاکستان نے پہلی اننگز میں 378 رنز بنائے تھے، جس کے جواب میں تیسرے دن جنوبی افریقہ کی ٹیم اپنی پہلی اننگز میں 269 رنز تک محدود رہی۔

پاکستان نے دوسری اننگز کا آغاز 109 رنز کی برتری کے ساتھ کیا، مگر 167 رنز پر ڈھیر ہو گئی، اور جنوبی افریقہ کو جیت کے لیے 277 رنز کا ہدف ملا، تاہم سپن وکٹ پر یہ ہدف جنوبی افریقہ کے بس سے باہر ثابت ہوا۔

یہ ٹیسٹ دونوں ٹیموں کے لیے نئے ورلڈ ٹیسٹ چیمپیئن شپ کے آغاز کا پہلا میچ تھا۔