ممبئی:ہندستان کے سابق کپتان اور ممبئی انڈینز کے اہم کھلاڑی روہت شرما نے 2026 کے انڈین پریمیئر لیگ سیزن سے پہلے باضابطہ طور پر ٹیم میں شمولیت اختیار کر لی ہے۔روہت شرما نے آئی پی ایل میں مجموعی طور پر 6 خطاب جیتے ہیں جن میں ایک ڈیکن چارجرز کے ساتھ اور 5 ممبئی انڈینز کے کپتان کے طور پر شامل ہیں۔ اس طرح وہ ٹورنامنٹ کی تاریخ کے کامیاب ترین کپتانوں میں شمار ہوتے ہیں۔

وہ 2011 میں ممبئی ٹیم میں شامل ہوئے اور 2013 میں کپتان بنے۔ اسی سال اپنی قیادت میں ٹیم کو پہلا خطاب دلایا۔ اس کے بعد انہوں نے 11 سال تک ٹیم کی قیادت کی اور پھر 2024 میں ہاردک پانڈیا کو کپتان بنا دیا گیا۔

روہت شرما ممبئی انڈینز کے سب سے زیادہ رن بنانے والے کھلاڑی ہیں اور وہ ان چند بلے بازوں میں شامل ہیں جنہوں نے آئی پی ایل میں 6000 سے زیادہ رن بنائے ہیں۔

ان کا سب سے کامیاب سیزن 2013 تھا جب انہوں نے 538 رن بنائے اور ٹیم کو خطاب جتوانے میں اہم کردار ادا کیا۔

2015 میں وہ فائنل کے بہترین کھلاڑی قرار پائے جب ممبئی نے چنئی سپر کنگز کو شکست دے کر دوسرا خطاب جیتا۔ اس کے بعد ٹیم نے 2017 2019 اور 2020 میں بھی ان کی قیادت میں ٹائٹل اپنے نام کیا۔

پیر کے روز ممبئی انڈینز نے 2026 سیزن کی تیاریوں کا باقاعدہ آغاز کیا اور پری سیزن ٹریننگ کا پہلا سیشن منعقد کیا گیا۔

ہیڈ کوچ مہیلا جے وردھنے نے اس سیشن کی قیادت کی جبکہ بولنگ کوچ پارس مہامبرے اور لاستھ ملنگا فیلڈنگ کوچ کارل ہاپکنسن اور دیگر معاون عملہ بھی موجود تھا۔

مہیلا جے وردھنے نے کہا کہ پری سیزن کا پہلا دن ہمیشہ خاص ہوتا ہے۔ کھلاڑیوں کی آمد سے جوش بڑھتا ہے اور مقصد مضبوط شروعات کرنا ہوتا ہے۔

انہوں نے کہا کہ پہلے دن سے ہی پوری ٹیم میں عزم نظر آنا چاہیے اور یہی پورے سیزن کی بنیاد بنتا ہے۔

ٹیم کے باقی کھلاڑی آئندہ دنوں میں کیمپ سے جڑیں گے تاکہ ٹورنامنٹ سے پہلے تیاریوں کو مزید مضبوط بنایا جا سکے۔

ممبئی انڈینز کی ٹیم میں شامل کھلاڑیوں میں ہاردک پانڈیا روہت شرما سوریہ کمار یادو تلک ورما ریان رکلیٹن رابن منج راج باوا رگھو شرما مچل سینٹنر کوربن بوش نمن دھر جسپریت بمراہ ٹرینٹ بولٹ اللہ غفانزار اشوانی کمار دیپک چاہر ول جیکس شیرفین ردرفورڈ میانک مارکنڈے شاردل ٹھاکر کوئنٹن ڈی کوک دانش ملیوار محمد اظہار اتھروہ انکولیکر اور میانک راوت شامل ہیں۔