نئی دہلی

  ملک میں گذشتہ کئی روز سے آئی پی ایل میں شامل کھلاڑیوں میں کورونا وائرس کے انفیکشن کی وجہ سے اسے ملتوی کر دیا گیا ہے۔ اس خبر کی تصدیق بی سی سی آئی کےنایب صدر راجیو شکلا نے کی۔

کرکٹ کی ویب سائٹ کرک انفو کے مطابق آئی پی ایل کے چیئرمین بریجیش پٹیل نے کہا ہے کہ یہ فیصلہ تمام شراکت داروں کی حفاظت کو مدنظر رکھتے ہوئے کیا گیا۔

واضح رہے کہ اس سے پہلے کئی غیر ملکی کھلاڑی کورونا کی زد میں آنے کی وجہ سے ای پی ایل بیچ میں ہی چھوڑ کر اپنے وطن واپس لوٹ گیے تھے۔

آئی پی ایل نے ایک بیان میں کہا ہے کہ یہ فیصلہ ٹورنامنٹ کی گورننگ کونسل اور بی سی سی آئی کی اعلیٰ انتظامیہ نے متفقہ طور پر کیا۔ بیان میں کہا گیا ہے کہ ’بی سی سی آئی کھلاڑیوں، سٹاف اور دیگر شراکت داروں کی خفاظت پر سمجھوتا نہیں کرنا چاہتی۔

مزید کہا گیا کہ ملک کے لیے خاص طور پر یہ مشکل وقت ہے۔ ہم نے خوشی لانے کی کوشش کی، تاہم ٹورنامنٹ کو اب ملتوی کرنا ضروری تھا۔ ہر کوئی اس کٹھن وقت میں اپنے گھر والوں کے پاس واپس جائے گا۔

’بی سی سی آئی، آئی پی ایل میں شریک تمام لوگوں کو محفوظ راستہ فراہم کرنے کی ہر ممکن کوشش کرے گی۔‘ واضح رہے کہ بائیو سکیور ببل کے باوجود دو کھلاڑیوں میں کورونا مثبت پایا گیا تھا جس کے بعد انڈین پریمیئر لیگ (آئی پی ایل) کا میچ ملتوی کر دیا گیا تھا۔

پیر ورون چکرورتی اور سندیپ واریئر کا کورونا ٹیسٹ مثبت آیا جس کے بعد پیر کو کولکتہ نائٹ رائیڈرز اور وراٹ کوہلی کی رائل چیلنجرز کے درمیان احمد آباد میں ہونے والا میچ آغاز سے چند گھنٹے پہلے ملتوی کر دیا گیا۔

خیال رہے کہ منگل کو  کورونا کیسز کی تعداد دو کروڑ سے زیادہ ہو گئی ہے۔ ملک میں کورونا کے تین لاکھ 50 ہزار نئے کیسز سامنے آئے ہیں۔ جبکہ اس تباہ کن لہر نے ہسپتالوں کا نظام مفلوج کر دیا ہے اور طبی آکسیجن جیسے اہم وسائل کو ختم کر دیا ہے۔