نئی دہلی ۔ پاکستان اور ہندوستان 2026 کے ٹی20 ورلڈ کپ میں 15 فروری کو کولمبو میں ایک دوسرے کے خلاف میدان میں اتریں گے۔
کرک انفو کے مطابق ٹورنامنٹ کا شیڈول آئی سی سی منگل کو ممبئی میں جاری کرے گی۔
یہ مقابلہ 2025 ایشیا کپ میں ہونے والے تین سخت میچوں کے بعد دونوں ٹیموں کا پہلا ٹاکرا ہوگا۔ میچ آر پریما داسا سٹیڈیم میں کھیلا جائے گا اور یہ ہندوستان کا گروپ مرحلے کا تیسرا میچ ہوگا۔ ای ایس پی این کرک انفو کے مطابق پاکستان اور ہندوستان کو امریکہ نیدرلینڈز اور نمیبیا کے ساتھ ایک ہی گروپ میں رکھا گیا ہے۔
ہندوستان اپنا پہلا گروپ میچ 7 فروری کو ممبئی میں امریکہ کے خلاف کھیلے گا جو ٹی20 ورلڈ کپ کا افتتاحی دن ہوگا۔ اس کے بعد 12 فروری کو دہلی میں نمیبیا کے خلاف میدان میں اترے گا پھر پاکستان سے مقابلہ ہوگا اور آخری گروپ میچ 18 فروری کو احمد آباد میں نیدرلینڈز کے خلاف ہوگا۔ گروپ مرحلے میں روزانہ تین میچ ہوں گے۔
2026 کا ٹی20 ورلڈ کپ 7 فروری سے 8 مارچ تک ہندوستان اور سری لنکا کی میزبانی میں ہوگا جبکہ پاکستان اپنے تمام میچ کولمبو یا کینڈی میں کھیلے گا۔فارمیٹ وہی ہوگا جو 2024 میں امریکہ اور ویسٹ انڈیز میں استعمال ہوا تھا جہاں 20 ٹیموں کو پانچ گروپوں میں تقسیم کیا گیا تھا۔ ہر گروپ کی دو بہترین ٹیمیں سپر ایٹ میں پہنچیں گی جہاں انہیں دو گروپوں میں تقسیم کیا جائے گا۔ سپر ایٹ کے ہر گروپ کی دو بہترین ٹیمیں سیمی فائنل میں جائیں گی اور پھر فائنل ہوگا۔
اگر ہندوستان گروپ مرحلے سے آگے بڑھتا ہے تو اس کے تین سپر ایٹ میچ احمد آباد چنئی اور کولکتہ میں ہوں گے۔ اگر سیمی فائنل میں جگہ بنتی ہے تو میچ ممبئی میں ہوگا۔ اطلاعات کے مطابق دوسرے سیمی فائنل کے لیے کولمبو یا کولکتہ کو زیر غور رکھا گیا ہے اور فیصلہ اس بات پر ہوگا کہ سری لنکا اور پاکستان کوالیفائی کرتے ہیں یا نہیں۔ فائنل احمد آباد میں طے ہے لیکن اگر پاکستان فائنل میں پہنچتا ہے تو امکان ہے کہ یہ کولمبو میں کھیلا جائے گا۔میزبان ہندوستان اور سری لنکا کے علاوہ ٹی20 ورلڈ کپ میں شرکت کرنے والی دیگر 18 ٹیمیں یہ ہیںافغانستان آسٹریلیا بنگلہ دیش انگلینڈ جنوبی افریقہ امریکہ ویسٹ انڈیز نیوزی لینڈ پاکستان آئرلینڈ کینیڈا اٹلی نیدرلینڈز نمیبیا زمبابوے نیپال عمان اور یو اے ای
ہندوستان دفاعی چیمپئن ہے جس نے 2024 کے ٹی20 ورلڈ کپ کے فائنل میں بارباڈوس میں جنوبی افریقہ کو شکست دی تھی۔
