ہورسنس

دو مرتبہ کی اولمپک تمغہ یافتہ پی وی سندھو اپنی مضبوط پوزیشن کا فائدہ نہیں اٹھا سکیں، جبکہ دیگر کھلاڑی بھی اہم مواقع پر بہتر کارکردگی دکھانے میں ناکام رہیں، جس کے نتیجے میں ہندوستان اُوبر کپ میں چین سے 0-5 سے ہار کر اس بیڈمنٹن ٹورنامنٹ سے باہر ہو گیا۔

ہندوستانی خواتین ٹیم نے میزبان ڈنمارک کے خلاف 2-3 کی شکست سے آغاز کیا تھا، لیکن اس کے بعد یوکرین کو 4-1 سے شکست دے کر کوارٹر فائنل تک پہنچنے کی امید برقرار رکھی تھی۔

اُوبر کپ میں 16 بار کی چیمپئن چین کے خلاف ہندوستان کو پچھلے تینوں مقابلوں میں شکست کا سامنا کرنا پڑا ہے۔

سندھو نے ہندوستان کی جانب سے پہلا مقابلہ کھیلا، جبکہ اُنّتی ہڈا اور تنوی شرما کی جگہ دیگر دو سنگلز مقابلوں کے لیے اشورانی بروا اور دیویکا سہاغ کو ٹیم میں شامل کیا گیا۔سندھو فیصلہ کن سیٹ میں 18-12 سے آگے تھیں، لیکن آخرکار وہ دنیا کی دوسرے نمبر کی کھلاڑی وانگ ژیئی سے 16-21، 21-19، 19-21 سے ہار گئیں۔ اس طرح چین نے پیر کو گروپ اے کے اس اہم مقابلے میں 1-0 کی برتری حاصل کر لی۔

میچ کے بعد سندھو نے کہا  کہ یہ ایک اچھا مقابلہ تھا۔ اگر میں جیت حاصل کر لیتی تو اور بہتر ہوتا۔ مجھے مواقع ملے، لیکن کوئی بھی پوائنٹ آسان نہیں تھا۔ ہر پوائنٹ کے لیے سخت مقابلہ ہوا، اور ہم واقعی ہر پوائنٹ کے لیے بھرپور جدوجہد کر رہے تھے۔پریا کونجینگبم اور شروتی مشرا پہلے ڈبلز مقابلے میں دنیا کی نمبر ایک جوڑی لیو شینگ شو اور ٹین نِنگ کے سامنے نہیں ٹھہر سکیں اور 11-21، 8-21 سے ہار گئیں۔اشورانی بروا نے ٹوکیو اولمپک چیمپئن چن یوفی کے خلاف سخت مقابلہ کیا، لیکن دنیا کی 38ویں نمبر کی ہندوستانی کھلاڑی پہلے گیم میں 20-19 پر ایک آسان موقع گنوا بیٹھیں۔ دنیا کی چوتھے نمبر کی کھلاڑی یوفی نے یہ میچ 44 منٹ میں 22-20، 21-13 سے جیت کر چین کو 3-0 کی ناقابلِ شکست برتری دلا دی۔

دوسرے ڈبلز میں تریسا جولی اور کوی پریا سیلوَم کی جوڑی کو 59 منٹ تک جاری رہنے والے مقابلے میں لوو ژو مِن اور ژانگ شو جیان کے خلاف 10-21، 21-12، 19-21 سے شکست کا سامنا کرنا پڑا۔

دنیا کی 43ویں نمبر کی کھلاڑی دیویکا سہاغ نے بھی اچھی شروعات کی، لیکن وہ تسلسل برقرار نہ رکھ سکیں اور تیسرے سنگلز میں دنیا کی 97ویں نمبر کی کھلاڑی ژو وین جِنگ سے 21-19، 17-21، 10-21 سے ہار گئیں۔اب ہندوستان کی نظریں مردوں کی ٹیم پر ہیں، جو تھامس کپ میں گروپ اے کے اپنے آخری مقابلے میں چین کا سامنا کرے گی۔ 2022 کی چیمپئن ہندوستانی ٹیم نے آسٹریلیا کو 5-0 سے شکست دے کر پہلے ہی کوارٹر فائنل میں اپنی جگہ پکی کر لی ہے۔

ہندوستان اور چین اس گروپ میں سرفہرست ہیں۔ ہندوستان نے کینیڈا کے خلاف 4-1 کی جیت سے آغاز کیا تھا، جبکہ چین نے اپنے پہلے مقابلے میں آسٹریلیا کو 5-0 سے ہرایا اور پھر پیر کو کینیڈا کو 4-1 سے شکست دی۔

اب بدھ کے روز ہندوستان اور چین کے درمیان آخری گروپ مقابلہ کھیلا جائے گا، جس سے گروپ کی ٹاپ ٹیم کا فیصلہ ہوگا۔