میکسیکو سٹی : فیفا ورلڈ کپ 2026 کے گروپ مرحلے کے اختتام کے قریب راؤنڈ آف 32 میں پہنچنے والی 28 ٹیموں کا فیصلہ ہو چکا ہے، جبکہ باقی چار نشستوں کے لیے مقابلہ ابھی جاری ہے۔
اب تک پرتگال، جرمنی، برازیل، فرانس، ارجنٹینا، اسپین، مراکش، ناروے اور میزبان ممالک میکسیکو، کینیڈا اور امریکا ناک آؤٹ مرحلے کے لیے کوالیفائی کر چکے ہیں۔ دوسری جانب قطر اور ترکیے کی ٹیمیں اگلے مرحلے میں جگہ بنانے میں ناکام رہیں۔
اس ورلڈ کپ میں بوسنیا و ہرزیگوینا اور جنوبی افریقا نے پہلی مرتبہ ناک آؤٹ مرحلے میں رسائی حاصل کرکے تاریخ رقم کی ہے، جبکہ کیپ ورڈے راؤنڈ آف 32 تک پہنچنے والا ورلڈ کپ کی تاریخ کا سب سے چھوٹا ملک بن گیا، جسے ٹورنامنٹ کا ایک بڑا سرپرائز قرار دیا جا رہا ہے۔
ادھر ایران اور مصر کے درمیان کھیلا گیا اہم میچ ایک ایک گول سے برابر رہا۔ میچ کے آخری لمحات میں ایران کا کیا گیا گول آف سائیڈ قرار دے دیا گیا، جس کے بعد یہ فیصلہ سوشل میڈیا پر بحث کا موضوع بن گیا۔ اس نتیجے کے ساتھ مصر نے راؤنڈ آف 32 میں اپنی جگہ یقینی بنا لی، جبکہ ایران کی قسمت کا فیصلہ آخری گروپ میچوں پر منحصر ہو گیا ہے۔
اگرچہ ایران اس ورلڈ کپ میں اب تک کوئی میچ جیتنے میں کامیاب نہیں ہو سکا، تاہم وہ پہلی مرتبہ ناک آؤٹ مرحلے میں پہنچنے کا مضبوط امیدوار ہے۔
ایران کی کوالیفکیشن کے امکانات کچھ اس طرح ہیں۔
اگر آج ہونے والے میچوں میں کروشیا، کانگو، الجزائر یا آسٹریا میں سے کسی ایک ٹیم کو بھی شکست ہوتی ہے تو ایران راؤنڈ آف 32 میں پہنچ جائے گا۔
اگر کانگو اور ازبکستان کا میچ برابر رہتا ہے تو بھی ایران اگلے مرحلے کے لیے کوالیفائی کر جائے گا۔
تاہم اگر کروشیا اور کانگو اپنے اپنے میچ جیت جاتے ہیں اور الجزائر اور آسٹریا کا مقابلہ برابر رہتا ہے تو ایران کا ورلڈ کپ سفر گروپ مرحلے ہی میں اختتام پذیر ہو جائے گا۔
