کنساس سٹی : امریکا کے شہر کنساس سٹی پہنچنے سے قبل انگلینڈ کی فٹبال ٹیم کو ایک غیر متوقع صورتحال کا سامنا کرنا پڑا جب ٹیم کا تربیتی سامان لے جانے والی گاڑی میں چوری کی واردات پیش آئی۔ مقامی پولیس کے مطابق یہ واقعہ اس وقت پیش آیا جب سامان کو فلوریڈا میں قائم انگلینڈ کے پری ٹورنامنٹ کیمپ سے کنساس سٹی کے سووپ ساکر ولیج منتقل کیا جا رہا تھا۔

پولیس نے بتایا کہ ٹیم کی گاڑی کنساس سٹی پہنچی تو معلوم ہوا کہ اس میں موجود بعض اشیا غائب ہیں۔ حکام نے واقعے کی تحقیقات شروع کر دی ہیں اور دو مشتبہ افراد کو مزید تفتیش کے لیے حراست میں لیا گیا ہے۔

برطانوی ذرائع ابلاغ کے مطابق چوری ہونے والے سامان میں فٹبالیں اور کھلاڑیوں کے جوتے بھی شامل ہیں۔ اس معاملے پر انگلینڈ کی فٹبال ایسوسی ایشن کی جانب سے تاحال کوئی باضابطہ بیان سامنے نہیں آیا ہے۔

یہ واقعہ انگلینڈ کی ورلڈ کپ تیاریوں کے لیے دھچکا ثابت ہو سکتا ہے کیونکہ ٹیم بدھ کے روز ڈیلس میں اپنے پہلے میچ میں Croatia کے خلاف میدان میں اترنے والی ہے۔ چوری کے باعث تربیتی منصوبوں اور انتظامات پر اثر پڑنے کا خدشہ ظاہر کیا جا رہا ہے۔