ریاض: کرسٹیانو رونالڈو نے ہسپانوی سیکنڈ ڈویژن کلب المیریا میں حصہ خرید لیا ہے۔ پرتگالی فٹبال اسٹار کی نمائندگی کرنے والی مشاورتی کمپنی نے جمعرات کو یہ اطلاع دی۔برنزوک گروپ نے اپنے بیان میں کہا کہ رونالڈو نے اس کلب میں 25 فیصد حصہ خریدا ہے جس کے مالک سعودی عرب سے تعلق رکھتے ہیں۔41 سالہ رونالڈو 2022 کے آخر میں النصر کے لیے کھیلنے سعودی عرب منتقل ہوئے تھے۔

رونالڈو نے بیان میں کہا کہ میدان کے باہر بھی فٹبال میں حصہ ڈالنا میری دیرینہ خواہش رہی ہے۔ یو ڈی المیریا ایک ہسپانوی کلب ہے جس کی بنیاد مضبوط ہے اور ترقی کے واضح امکانات موجود ہیں۔برنزوک گروپ کے مطابق رونالڈو نے یہ حصہ اپنی ذیلی کمپنی سی آر 7 اسپورٹس انویسٹمنٹس کے ذریعے خریدا۔

المیریا گزشتہ 6 سال سے زائد عرصے سے سعودی مالکان کے کنٹرول میں ہے۔ محمد الخریجی 2025 کی گرمیوں میں نئے مالک اور صدر بنے جب انہوں نے یہ کلب ترکی آل الشیخ سے خریدا۔الخریجی نے کہا کہ ہمیں خوشی ہے کہ کرسٹیانو نے سرمایہ کاری کے لیے ہمارے کلب کا انتخاب کیا۔ وہ ہسپانوی لیگ کو اچھی طرح جانتے ہیں اور ٹیم اور اکیڈمی دونوں کے حوالے سے ہماری ترقی کی صلاحیت کو سمجھتے ہیں۔المیریا اس وقت اسپین کے سیکنڈ ڈویژن میں تیسرے نمبر پر ہے۔ یہ کلب آخری بار 2023 سے 2024 کے سیزن میں فرسٹ ڈویژن میں شامل تھا۔