پنجاب کنگز (PBKS) کی مشکلات میں اضافہ ہوتا جا رہا ہے۔ ٹیم کے مالکان کے درمیان شدید اختلافات پیدا ہو گئے ہیں۔ ٹیم کی شریک مالک اور معروف بالی ووڈ اداکارہ پریتی زنٹا نے ٹیم کے شریک ڈائریکٹروں، محیت برمن اور نیس واڈیا کے خلاف چندی گڑھ کی ایک عدالت میں قانونی مقدمہ دائر کیا ہے۔ یہ تنازع ایسے وقت سامنے آیا ہے جب ٹیم انڈین پریمیئر لیگ (آئی پی ایل) 2025 میں شاندار کارکردگی کا مظاہرہ کر رہی ہے۔

شریاس ایر کی قیادت میں پنجاب کنگز پہلے ہی پلے آف مرحلے کے لیے کوالیفائی کر چکی ہے۔ ٹیم نے 12 میچوں میں 17 پوائنٹس حاصل کیے ہیں اور پوائنٹس ٹیبل میں تیسرے نمبر پر ہے۔ اس کے دو میچ باقی ہیں — 24 مئی کو دہلی کیپیٹلز کے خلاف اور 26 مئی کو ممبئی انڈینز کے خلاف۔ ممبئی انڈینز بھی پلے آف کے لیے کوالیفائی کر چکی ہے، جب کہ دہلی کیپیٹلز ایونٹ سے باہر ہو چکی ہے۔ پنجاب کنگز کی کوشش ہے کہ وہ دونوں میچ جیت کر سرفہرست رہتے ہوئے ناک آؤٹ مرحلے میں داخل ہو۔

پریتی زنٹا کی جانب سے دائر کردہ درخواست میں 21 اپریل کو منعقدہ ایکزٹرا آرڈنری جنرل میٹنگ (EGM) کی قانونی حیثیت کو چیلنج کیا گیا ہے۔ الزام ہے کہ ٹیم کے دیگر شریک ڈائریکٹروں نے قواعد کی خلاف ورزی کرتے ہوئے یہ میٹنگ بلائی۔ واضح رہے کہ پریتی زنٹا، محیت برمن اور نیس واڈیا، KPH ڈریم کرکٹ پرائیویٹ لمیٹڈ کے ڈائریکٹرز ہیں، جو آئی پی ایل کی فرنچائز پنجاب کنگز کی مالک کمپنی ہے۔پریتی زنٹا نے دعویٰ کیا ہے کہ 21 اپریل کو ہونے والی اس میٹنگ میں کمپنی ایکٹ 2013 اور دیگر قانونی تقاضوں کی خلاف ورزی کی گئی۔ ان کا کہنا ہے کہ انہوں نے 10 اپریل کو ای میل کے ذریعے اس میٹنگ پر اعتراض بھی درج کرایا تھا، مگر اسے نظر انداز کر دیا گیا۔ انہوں نے الزام لگایا کہ یہ میٹنگ محیت برمن نے نیس واڈیا کی حمایت سے بلائی۔

اگرچہ پریتی زنٹا اور ساتھی ڈائریکٹر کرن پال اس میٹنگ میں موجود تھے، لیکن دونوں نے اسے غیرقانونی قرار دینے کے لیے عدالت سے رجوع کیا ہے۔ ان کا سب سے بڑا اعتراض منیش کھنہ کو بطور ڈائریکٹر مقرر کیے جانے پر ہے، جس کی انہوں نے اور کرن پال نے مخالفت کی ہے۔

پریتی زنٹا نے اپنی عرضداشت میں عدالت سے استدعا کی ہے کہ منیش کھنہ کو ڈائریکٹر کے طور پر کام کرنے سے روکا جائے اور اس میٹنگ میں کیے گئے کسی بھی فیصلے پر عملدرآمد نہ ہونے دیا جائے۔ اس کے علاوہ، انہوں نے عدالت سے درخواست کی ہے کہ جب تک مقدمہ حل نہیں ہو جاتا، کمپنی کو بورڈ یا جنرل میٹنگز بلانے سے روکا جائے، جب تک کہ وہ اور کرن پال دونوں اس میں موجود نہ ہوں اور منیش کھنہ کو شامل نہ کیا جائے۔