عامر اقبال : نئی دہلی 

مدھیہ پردیش کے ڈی ایس پی سنتوش کمار پٹیل کی زندگی کی جدوجہد اور کامیابی اب ملک بھر میں سوشل میڈیا کے سبب گھر گھر پہنچ چکی ہے ۔اپنی سادگی اور ایمانداری کے سبب سنتوش کمار نے سوشل میڈیا پر زبردست شہرت اور مقبولیت  حاصل کی ہے اب ان کا ایک نیا ویڈیو وائرل ہوا ہے جس میں وہ اپنے والد کے ساتھ ان کے ایل مسلم استاد سے ملاقات کرنے گئے ہیں ۔جنہوں نے ان کے والد کو کچھ سال پڑھایا تھا ۔بلکہ اس بات کا زور دیا تھا کہ تم لوگ  تو مویشیوں کو چرانے لگے ہو لیکن اپنے بچوں کو اسکول بھیجو ۔جس کے بعد سنتوش کمار کے چاچا نے انہیں اسکول پہچانا شروع کیا تھا اور اس تحریک کا نتیجہ یہ ہوا کہ آج وہ ڈی ایس پی ہیں ۔

سنتوش کمار پٹیل اپنی جیپ میں سوار تھے جبکہ ان کے والد  اگلی  سیٹ پر بیٹھے ہوئے تھے ۔ اس سفر کے دوران وہ کہتے ہیں کہ  میرے  والد کو پڑھائی میں زیادہ کچھ نہیں آتا تھا مگر گنتی ضرور سیکھی تھی۔ والد صاحب کبھی کبھار ایک دو سال کے لیے اسکول گئے تھے۔ والد صاحب کے استاد حبیب علی سر بچوں کو زبردستی اسکول بلاتے تھے۔ 

ویڈیو میں ڈی ایس پی کہتے ہیں کہ ماسٹر صاحب  میرے  والد صاحب سے کہا کرتے تھے کہ تم لوگ گائے چرانے میں لگ گئے ہو مگر اپنے بچوں کو ضرور اسکول بھیجا کرو۔ اسی وجہ سے چچا ہمیں زبردستی اپنے ساتھ اسکول لے جانے لگے۔ مجھے لگتا ہے کہ حبیب ماسٹر صاحب کا زبردستی اسکول بلانا ہماری زندگی میں ایک بڑا احسان ثابت ہوا۔

حبیب ماسٹر صاحب کا کردار 

سنتوش کی زندگی میں ایک خاص نام حبیب ماسٹر صاحب  کا ہے۔ تقریباً 30 سال پہلے گاؤں میں پڑھانے آنے والے استاد حبیب علی سر سائیکل سے 10 سے 20 کلومیٹر کا سفر طے کر کے بچوں کو تعلیم دینے آتے تھے۔ اس زمانے میں دیہی علاقوں میں تعلیم پہنچانا آسان کام نہیں تھا۔سنتوش بتاتے ہیں کہ حبیب ماسٹر صاحب  نے انہیں براہ راست نہیں پڑھایا مگر وہ بچوں کو پکڑ کر اسکول ضرور بھیجتے تھے۔ گاؤں کے بچے اکثر اسکول جانے سے کتراتے تھے مگر حبیب سر انہیں اسکول لے جاتے اور کہتے تھے کہ تعلیم ہی زندگی بدل سکتی ہے۔ یہی چھوٹی سی کوشش آگے چل کر ایک بڑے بدلاؤ کی بنیاد بن گئی۔

ایک کال سے ملی خبر 

 ڈی اس پی سنتوش کمار نے کہا کہ پچھلے دنوں حبیب سر کے بیٹے سید فیروز اختر کا فون آیا تو معلوم ہوا کہ حبیب ماسٹر ابھی زندہ ہیں۔ پھر ہم والد صاحب کے ساتھ ان کے گھر گئے اور ان سے دعا لی۔استاد کو کوئی مہنگا تحفہ نہیں چاہیے ہوتا۔ انہیں صرف کامیاب شاگرد مل جائیں تو وہی ان کے لیے سب سے بڑی خوشی ہوتی ہے۔انسان میں ایک ہی کمی نہیں ہونی چاہیے اور وہ ہے احسان فراموشی۔ میں ہمیشہ کوشش کرتا ہوں کہ جن لوگوں نے میری زندگی میں کوئی اہم کردار ادا کیا ہے ان کا شکریہ ادا کروں۔

اس خبر کے بعد سنتوش کمار پٹیل فوراً اپنے والد کے ساتھ ان سے ملنے پہنچے۔ جب وہ ان کے گھر پہنچے تو سنتوش کماراور ان کے والد نے ان کے پیر چھو کرآشیرواد لیا۔ اس وقت شام کا وقت تھا اور حبیب سر افطار کررہے تھے مگر جیسے ہی انہوں نے اپنے پرانے شاگرد کو دیکھا انہوں نے سب کچھ چھوڑ کر ان کے سروں پر ہاتھ رکھا اور دعا دی۔ یہ منظر صرف استاد شاگرد کی ملاقات نہیں تھا بلکہ انسانیت اور احترام کی ایک خوبصورت تصویر تھا۔