زیبا نسیم : ممبئی

دنیا کی زیادہ آبادی مذہب سے وابستہ ہے اس لئے انسانی حقوق کے بڑے چیلنج کو سمجھنے کے لئے اس سوال کی اہمیت سب سے زیادہ ہے کہ مذہب انسانی حقوق کے فروغ میں کیا مثبت کردار ادا کر سکتا ہے۔ مذہب کے بارے میں کوئی متوازن گفتگو اس حقیقت کو نظر انداز نہیں کر سکتی کہ تاریخ میں کئی بار مذہب انسانی حقوق کی خلاف ورزیوں میں استعمال ہوا لیکن اس کے باوجود انسانی حقوق کو آگے بڑھانے میں مذہب کی طاقت بہت گہری ہے۔

اسلام میں انسانی حقوق اور انسانی ذمہ داریاں ایک دوسرے سے جڑی ہوئی ہیں اور ذمہ داریاں حقوق پر مقدم ہیں۔ ہر دور میں لوگ اپنے حقوق کی بات تو بہت کرتے ہیں لیکن اپنی ذمہ داریوں کو بھول جاتے ہیں۔ اسلام میں ہر حق دراصل اس ذمہ داری سے پیدا ہوتا ہے جو انسان پر اپنے رب کے سامنے اور مخلوق کے ساتھ اس کی حیثیتِ انسانیت کی بنیاد پر عائد ہوتی ہے۔

انسانی حقوق کا اسلامی تصور

قرآن میں انسان کی خلافتِ ارضی کا ذکر اس عزت کے ساتھ کیا گیا ہے کہ فرشتوں کو آدم کے آگے جھکنے کا حکم دیا گیا۔ اسلام میں انسانی حقوق کا مطلب یہ ہے کہ یہ حقوق خدا کی طرف سے دیے گئے ہیں نہ کہ کسی انسانی ادارے نے انہیں طے کیا ہو۔ انسانی قوانین بدل سکتے ہیں مگر خدا کے مقرر کردہ حقوق ابدی ہیں۔ اسلام نے نسل رنگ اور عقیدے سے بالاتر ہو کر بنیادی حقوق کا ایک جامع دائرہ دیا ہے جو ذمہ داریوں کے ادراک سے وابستہ ہے۔ جب ہر شخص اپنی ذمہ داری ادا کرے تو ہر انسان اپنے حقوق حاصل کر لیتا ہے۔

حقِ زندگی

اسلام کا پہلا بنیادی حق زندگی کا حق ہے۔ قرآن کا واضح حکم ہے کہ خدا نے جس جان کو محترم قرار دیا ہو اسے ناحق نہ مارو۔ ایک دوسرے مقام پر فرمایا کہ جس نے ایک جان کو بچایا گویا اس نے پوری انسانیت کو بچایا۔ یہ حکم اگرچہ بنی اسرائیل کے لئے بیان ہوا لیکن اصول کے طور پر پوری انسانیت کے لئے ہے۔ احادیث میں بھی قتلِ ناحق کو شدید ترین گناہ قرار دیا گیا ہے۔ اسلام میں ہر انسان کو اپنی حیثیت کے مطابق زندہ رہنے اور ضروریات پوری کرنے کا حق ہے اور قرآن اہل ایمان کو تاکید کرتا ہے کہ محتاجوں کے لئے اپنے مال میں حصہ نکالیں۔

عورت کی عصمت و حرمت

اسلام عورت کی عزت اور اس کے تحفظ کو بہت اونچا مقام دیتا ہے۔ مرد پر لازم ہے کہ خاندان میں عورت کے احترام کی پاسداری کرے اور اس کی حفاظت کو یقینی بنائے۔ قرآن میں بدکاری کے جرم پر سخت سزا اس لئے رکھی گئی کہ عورت کی عزت اور معاشرتی پاکیزگی محفوظ رہے۔ اسلام کے نزدیک عورت خواہ کسی بھی مذہب یا قوم کی ہو اس کا احترام لازم ہے۔

آزادی کا حق

اسلام نے انسان کی آزادی کو بنیادی حق کے طور پر تسلیم کیا۔ قدیم معاشروں میں انسان کو غلام بنا کر بیچا جاتا تھا لیکن اسلام نے اس روایت کی سخت مذمت کی۔ نبی کریم نے غلامی کی تلافی کے طور پر غلام آزاد کرانے کو بہت بڑی نیکی قرار دیا اور ایسے لوگوں کے خلاف وارننگ دی جو آزاد انسان کو پکڑ کر غلام بنائیں۔ اسلام نے انسانی وقار کو اس طرح بحال کیا کہ غلامی کے دروازے بند کئے اور آزادی کو ہر فرد کا حق بنایا۔ آج بھی جدید معاشی نظام میں مزدوروں کا استحصال ایک بڑی مثال ہے جسے دیکھ کر اندازہ ہوتا ہے کہ اسلام نے صدیوں پہلے آزادی اور انسانی وقار کا جو تصور دیا وہ کس قدر اعلیٰ تھا۔

عدل و انصاف کا حق

اسلام کا تصور انصاف صرف دوستوں تک محدود نہیں بلکہ دشمنوں تک پھیلا ہوا ہے۔ قرآن کا حکم ہے کہ کسی قوم سے دشمنی اس بات کا سبب نہ بنے کہ انصاف ترک کر دیا جائے۔ انصاف کی دعوت عالمی انسانیت کے لئے ہے کسی قوم مذہب یا نسل تک محدود نہیں۔ نبی کریم نے اعلان فرمایا کہ کوئی عرب عجمی پر اور کوئی عجمی عرب پر برتری نہیں رکھتا۔

اسلامی ریاست میں شہری حقوق

زندگی اور مال کا تحفظ

نبی کریم نے حجۃ الوداع میں فرمایا کہ ہر شخص کی جان اور مال محترم ہے۔ یہ حکم مسلمانوں کے ساتھ غیر مسلموں کے لئے بھی ہے۔ اسلام غیر مسلم شہریوں کو مذہبی آزادی اور مکمل شہری حقوق دیتا ہے۔

عزت و آبرو کا تحفظ

قرآن دوسروں کا مذاق اڑانے گالی دینے اور تضحیک کرنے سے منع کرتا ہے کیونکہ یہ انسانی وقار کے خلاف ہے۔ اسلام ہر انسان کی عزت کا احترام سکھاتا ہے۔

گوشۂ تنہائی اور نجی زندگی کا حق

اسلام بدگمانی تجسس اور غیبت سے روکتا ہے اور دوسرے کی نجی زندگی میں مداخلت کو سخت گناہ قرار دیتا ہے۔ نبی کریم دروازے پر دستک دے کر گھر میں داخل ہوتے تھے تاکہ کسی کو تکلیف نہ ہو۔

خلاصہ یہ کہ اسلام میں انسانی حقوق کی بنیاد روحانی ذمہ داری پر قائم ہے۔ انسان جب اپنے رب کے حضور جواب دہی کو سمجھ لیتا ہے تو اسے اپنی ذمہ داریوں اور دوسروں کے حقوق کا حقیقی شعور مل جاتا ہے۔