بھکتی چالک

محرم اسلامی کیلنڈر کا پہلا مہینہ ہے۔ اس کے ابتدائی دس دن واقعۂ کربلا کی یاد میں گزارے جاتے ہیں، جب حضرت محمد ﷺ کے نواسے حضرت امام حسینؑ اور ان کے اہلِ خانہ نے شہادت کا عظیم مرتبہ حاصل کیا۔ اسی لیے یہ ایام غم و سوگ کے طور پر منائے جاتے ہیں۔ بالخصوص شیعہ برادری دسویں محرم یعنی عاشورا کے دن سوگ مناتی ہے۔ ہندوستان، خصوصاً مہاراشٹر میں، سنی مسلمان بھی روایتی انداز میں محرم مناتے ہیں۔ تاہم مہاراشٹر میں محرم کی ایک خاص بات یہ ہے کہ ہندو برادری بھی بڑی تعداد میں اس میں شریک ہوتی ہے۔

مہاراشٹر کے دیہی علاقوں میں ہندو اور مسلمان صدیوں سے مل جل کر محرم مناتے آرہے ہیں۔ تاہم ریاست میں ایک ایسا گاؤں بھی ہے جہاں ایک بھی مسلمان خاندان آباد نہیں، اس کے باوجود راموشی (بیراڈ) برادری نسل در نسل محرم مناتی چلی آرہی ہے۔ یہ گاؤں بیراڈواڑی (بھوسنی واڑی) ہے، جو ان لوگوں کی بستی ہے جن کی رگوں میں ابتدائی انقلابی اماجی نائک اور مراٹھا سلطنت کے عظیم جاسوس بہیرجی نائک کی بہادری کا خون دوڑتا ہے۔

تاریخ میں اپنی شجاعت کے لیے امر ہو جانے والی راموشی برادری کی اس بستی کی اصل شناخت یہ ہے کہ یہاں ایک بھی مسلمان گھر نہ ہونے کے باوجود محرم منانے کی روایت نسل در نسل برقرار ہے۔ کئی برسوں سے یہ روایت گاؤں کی ثقافتی یکجہتی کا لازمی حصہ بن چکی ہے۔

مسجد نہیں، مگر امام کا نام گونجتا ہے

بھوسنی۔بھوسنی واڑی گروپ گرام پنچایت کے تحت آنے والے اس گاؤں میں برسوں سے ایک منفرد روایت دیکھی جا رہی ہے۔ محرم کے دنوں میں پورا گاؤں بارہ اماموں اور قاسم امام صاحب کی عقیدت میں ڈوبا رہتا ہے۔ سب سے حیرت انگیز بات یہ ہے کہ پیر کی رسمیں صحیح انداز میں ادا کرنے کے لیے پڑوسی دیہات سے مسلم مجاوروں کو باعزت طریقے سے مدعو کیا جاتا ہے۔ وہ اسلامی روایات کے مطابق تمام رسومات انجام دیتے ہیں۔اسی دوران گاؤں کے نوجوان ’’کربل‘‘ (جو لیزیم جیسے ایک روایتی کھیل سے مشابہ ہے) کھیلتے ہیں۔ روایت کے احترام اور مذہبی مساوات کا یہ پیغام واقعی قابلِ تحسین ہے۔

محرم کے ساتھ سماجی بیداری بھی

راموشی برادری کی تاریخ ہمیشہ ظلم کے خلاف جدوجہد اور بہادری سے عبارت رہی ہے۔ اسی ورثے کو زندہ رکھتے ہوئے بھوسنی واڑی کے لوگوں نے محرم کو سماجی بیداری سے بھی جوڑ دیا ہے۔محرم کے موقع پر گاؤں میں خون کے عطیے کے کیمپ منعقد کیے جاتے ہیں تاکہ ضرورت مند مریضوں کی مدد کی جا سکے۔ سماجی شعور بیدار کرنے والے گیت اور لوک رقص پیش کیے جاتے ہیں، جبکہ ڈراموں کے ذریعے مختلف سماجی مسائل کو اجاگر کیا جاتا ہے۔

محرم کے دوران پورے گاؤں میں بھائی چارے کا ماحول قائم رہتا ہے۔ تمام خاندان ایک جگہ جمع ہوتے ہیں اور اجتماعی مہاپرساد کا اہتمام کیا جاتا ہے۔ ممبئی، پونے اور دیگر شہروں میں روزگار اور کاروبار کے سلسلے میں مقیم نوجوان بھی خاص طور پر انہی دنوں گاؤں واپس آتے ہیں۔ یوں پوری بیراڈواڑی ایک بڑے خاندانی اجتماع کا منظر پیش کرتی ہے۔

سوشل میڈیا پر وائرل روایت

اس منفرد محرم کی کئی ویڈیوز اس وقت سوشل میڈیا پر وائرل ہو رہی ہیں۔ بیراڈواڑی کے نوجوان امیش بھوکلے نے اس روایت کی روزانہ ویڈیوز بنا کر انسٹاگرام پر شیئر کیں۔

انہوں نے آواز دی وائس سے گفتگو کرتے ہوئے کہا:"اس روایت کو جدید انداز میں پیش کرنے کے لیے میں نے ہر دن کی ویڈیو بنا کر اپنے انسٹاگرام پر شیئر کی۔ لاکھوں لوگوں نے اسے شیئر کیا اور ہمیں عوام کی جانب سے بے حد مثبت ردعمل ملا۔"

امیش نے مزید کہا:"اگرچہ ہمارے گاؤں میں ایک بھی مسلمان نہیں رہتا، پھر بھی ہمارا گاؤں اس روایت کو زندہ رکھے ہوئے ہے، جس پر مجھے فخر ہے۔ ہماری نسل بھی اسی طرح اس روایت کو آگے بڑھائے گی۔"

’’یہ ہماری یکجہتی کی طاقت ہے‘‘

بیراڈواڑی کے رہائشی اور شری شنمکھیشور ودیالیہ کے اسپورٹس ٹیچر انکش مانڈلے اس منفرد روایت کے بارے میں کہتے ہیں:"ہمارے بیراڈواڑی کا محرم ہمارے گاؤں کی یکجہتی کی اصل طاقت ہے۔ ہمارے بزرگ آزادی سے پہلے کے دور سے اس روایت کو سنبھالے ہوئے ہیں اور آج ہم اسے آگے بڑھا رہے ہیں۔ ہمارے گاؤں میں ذات پات کی تفریق کی کوئی گنجائش نہیں۔ ہم سب اس یقین کے ساتھ اکٹھے ہوتے ہیں کہ خدا سب کا ایک ہی ہے۔ ہمارے گاؤں کو بارہ اماموں اور قاسم امام صاحب پر گہرا یقین ہے۔"

’’یہی ہمارے گاؤں کی اصل پہچان ہے‘‘

گاؤں کے نائب سرپنچ دشرتھ مانڈلے کہتے ہیں:"اصل میں ہمارے گاؤں کے تین نام ہیں۔ لوگ اسے اننت پور، بھوسنی واڑی اور بیراڈواڑی کے نام سے جانتے ہیں۔ محرم کی وجہ سے ہمارے گاؤں میں محبت اور بھائی چارہ مزید مضبوط ہوا ہے۔ اگرچہ یہاں ایک بھی مسلمان گھر نہیں، لیکن تمام برادریوں کے لوگ مل کر پیر بابا کی روایت کو زندہ رکھتے ہیں۔ یہی ہمارے گاؤں کی اصل شناخت ہے اور نسلوں سے چلی آنے والی یہ روایت ہمارے لیے باعثِ فخر ہے۔"

’’ہر اچھے کام سے پہلے امام صاحب کا نام لیا جاتا ہے‘‘

ریونیو ملازم شیوشنکر مانڈلے کہتے ہیں:"ہمارے گاؤں میں بارہ امام اور قاسم امام صاحب عقیدت کا سب سے بڑا مرکز ہیں۔ جب بھی کوئی شخص کسی اچھے یا اہم کام کے لیے گھر سے نکلتا ہے تو پہلے امام صاحب کا نام لیتا ہے اور انہیں سلام پیش کرتا ہے۔ ہمارا ایمان ہے کہ ان کی برکت سے ہر کام کامیاب ہوتا ہے۔ محرم کے موقع پر جو لوگ دوسرے شہروں میں رہتے ہیں وہ بھی واپس آ جاتے ہیں۔ اسی لیے یہ روایت ہمارے لیے جذباتی اور ثقافتی یکجہتی کی علامت بن چکی ہے۔"

خواہ بات بہادری کی ہو یا بھائی چارے کی، بھوسنی واڑی نے ہمیشہ اپنی مثالی شناخت برقرار رکھی ہے۔ ایک بھی مسلمان گھر نہ ہونے کے باوجود اسلامی روایات کے احترام کے ساتھ محرم منانے کی یہ روایت آج کی نسل کے لیے ایک بڑی تحریک ہے۔ بکھرے ہوئے معاشرے کو جوڑنے والا یہ سوگوارانہ اجتماع واقعی مہاراشٹر کی ثقافت کا باعثِ فخر ہے۔