آواز دی وائس 

کشمیر میں زندگی رواں دواں ہے،رونق  کا سماں ہےکیونکہ سیاحت کو چار چاند لگ گئے ہیں،کاروبارپھل پھول رہا ہے،نئی نسل  تعلیم کی راہوں پر اڑان بھر رہی ہے،پروفیشنلز کے لیے کھلا آسمان ہے۔ بازار پر ہجوم ہیں اور مالز میں زبردست ہلچل ہے۔زندگی کی یہ رفتار ملک کی تاریخ کے ایک بڑے پارلیمانی فیصلے کی دین ہے جس کے تحت حکومت نے جموں و کشمیر کے گلے سے آرٹیکل 370 کی زنجیر کو اتار پھینکا تھا۔کشمیر کو ملک کا ایک حقیقی  اٹوٹ حصہ بنایا۔کسی نے اس کو مودی حکومت کی سب سے بڑی غلطی کہا تھا کسی نے سیاسی خودکشی قرار دیا تھا لیکن جوں جوں وقت گزرتا گیا ،کشمیر میں زندگی معمول پر آتی گئی اور اب زندگی غیر معمولی  رفتار سے وادی میں ترقی کی نئی کشادہ راہوں پر دوڑ رہی ہے ۔

جبکہ ملک کے کانوں میں آرٹیکل 370 ہٹائے جانے کے بعد  وزیر اعظم نریندر مودی کے یہ الفاظ گونج رہے ہیں کہ ۔۔۔ آرٹیکل 370 کی دفعات کو مؤثر طریقے سے ہٹانے کے بعد تصویر بدل گئی ہے،ایک قوم، ایک قانون، ایک علامت کا خواب پورا ہوا اور ایک نئی شروعات ہوگئی۔

 یاد رہے کہ پارلیمنٹ نے 5 اگست 2019 کو آرٹیکل 370 اور 35 اے کے تحت جموں و کشمیر کو دی گئی خصوصی حیثیت کو ہٹانے کی منظوری دی تھی۔ مرکزی وزیر داخلہ  امت شاہ نے تب اسے تاریخی غلطی کو درست کرنے کا ایک تاریخی قدم قرار دیا تھا۔

وزیر داخلہ امت شاہ نے لوک سبھا میں کہا تھا کہ ۔۔۔۔۔۔  نوجوانوں کو سیاسی مقاصد کے لیے استعمال کیا جا رہا تھا اور ریاست کی نوجوان نسل کو نظر انداز کرتے ہوئے اشرافیہ سے تعلق رکھنے والے چند مٹھی بھر لوگ ان فنڈز سے مستفید ہو رہےتھے۔ آرٹیکل 370 کا استعمال کرتے ہوئے جموں، کشمیر اور لداخ اور خاص طور پر وادی کو صنف، طبقے، ذات اور پیدائش کی بنیاد پر پہنچنے والے نقصان کو دور کرنے کی زحمت کسی نے نہیں کی۔ اس سے ہر گھر میں غربت آئی۔ مرکزی حکومت کی طرف سے دستیاب کروڑوں روپے بدعنوانی کی وجہ سے لوٹ لئے گئے۔ یہ وجہ تھی؛ جموں و کشمیر میں تعلیمی نظام کو مضبوط نہیں کیا جا سکا۔ یہ آرٹیکل عورت مخالف، غریب مخالف، شیڈول قبائل مخالف تھا ۔ اس آرٹیکل کی وجہ سے جموں و کشمیر میں جمہوریت پروان نہیں چڑھ سکی اور بدعنوانی بڑھ کر اپنے عروج پر پہنچ گئی تھی۔

آرٹیکل 370 اور 35اے کو ہٹانے کی منظوری 5 اگست 2019 کو پارلیمنٹ نے دی تھی۔ نوٹیفکیشن کے اجراء کے فوراً بعد، جموں و کشمیر اور لداخ کو 31 اکتوبر 2019 سے دو الگ الگ مرکز کے زیر انتظام علاقوں میں دوبارہ منظم کیا گیا تھا۔

امیدوں کی کرن

 دراصل حکومت کو خوشی اس بات کی بھی تھی کہ  آرٹیکل 370 اور 35-اے سے آزادی کے ساتھ ڈاکٹر شیاما پرساد مکھرجی کا ’ایک قوم، ایک قانون اور  قوم کا ایک سربراہ ۔۔۔  کا عزم آزادی کے 70 سال بعد حقیقت بنا تھا۔ نتیجے کے طور پر جموں و کشمیر اور لداخ جسے زمین پر جنت بھی کہا جاتا ہے، ملک کے ساتھ قدم سے قدم ملا کر ترقی کی راہ پر گامزن ہوئے۔

 مودی حکومت کا دعوی تھا کہ  جموں و کشمیر اور لداخ سے آرٹیکل 370 کی دفعات کو ہٹا کر لوگوں کے درد کو مٹا دیا۔ جو کئی دہائیوں سے ترقی کی دوڑ میں پیچھے تھے۔ اب اسے مرکزی دھارے میں لا کر دوسری ریاستوں کے برابر لایا گیا ۔

 در حقیقت یہ کوئی آسان کام نہیں تھا، سیاسی طور پر نہ زمینی طور پر ۔ لیکن جب حکومت نے بیڑا اٹھایا تو پھر اس کو انجام تک پہنچا دیا، سیاسی مخالفت کا جواب دیا لیکن یہ جواب زبانی نہیں تھا بلکہ ترقیاتی کاموں کی زبانی تھا۔ جس کا ایک نمونہ جی 20 سمٹ کا انعقاد تھا،کھیلو انڈیا کا کامیاب تجربہ تھا،سیاحت کا عروج تھا اور نئی نسل کی تعلیمی میدان میں لمبی چھلانگیں تھیں۔جس کے سبب اب کوئی  آرٹیکل ۳۷۰ کو یاد نہیں کررہا ہے بلکہ کشمیر کی خوبصورتی کے ساتھ اس کی بلندی کو بھی دیکھ رہا ہے۔

ایک قانون اور ایک دستور

حقیقت یہ ہے کہ دہائیوں سے جمو و کشمیر قومی دھارے سے دور تھا۔ مودی حکومت نے اس بڑے قدم کے ساتھ یہ پیغام دیا کہ اب تک جموں و کشمیر کے ساتھ ہندوستان کی دیگر ریاستوں سے مختلف سلوک کیا گیا۔جس کے سبب ریاست خودبخود مرکزی دھارے سے دور تھی۔آرٹیکل 370 کی دفعات کے مطابق پارلیمنٹ کو جموں و کشمیر کے لیے دفاع، خارجہ امور اور مواصلات کے حوالے سے قانون بنانے کا حق حاصل تھا۔ لیکن کسی دوسرے موضوع سے متعلق قانون بنانے کے لیے مرکز کو ریاست کی رضامندی لینی پڑتی تھی۔

ہندوستان کی پارلیمنٹ جموں و کشمیر کے سلسلے میں صرف محدود موضوعات پر قانون بنا سکتی تھی ۔آرٹیکل 370 کی وجہ سے، ہندوستان کے آئین کے بیشتر حصے ریاست جموں و کشمیر پر لاگو نہیں ہوتے تھے۔ دوسری ریاستوں کے لوگ جموں و کشمیر میں زمین نہیں خرید سکتے تھے۔ اسی طرح، آئین ہند کے آرٹیکل 360 میں درج ایک قوم، ایک قانون، ایک علامت کے خواب کی تکمیل کے طور پر مالیاتی ایمرجنسی کی فراہمی جموں و کشمیر پر لاگو نہیں ہوتی۔مرکزی آر ٹی آئی ایکٹ بھی کشمیر پر لاگو نہیں ہوتاتھا۔ جموں و کشمیر کی قانون ساز اسمبلی کی میعاد 6 سال تھی جب کہ دیگر ریاستوں کی قانون ساز اسمبلیوں کی میعاد 5 سال ہے۔

 مگر ایک بڑے قدم نے کشمیر کی شکل بدل دی۔ حکومت نے جموں و کشمیر اور لداخ میں 890 مرکزی قوانین لاگو ہوئے، 205 ریاستی قوانین کو منسوخ کیا گیا اور 130 ریاستی قوانین کو جموں کشمیر کے مرکزی خطہ میں آئین ہند کے مطابق تبدیل کیا گیا۔

کیوں اور کیسے کھل گئیں ترقی کی راہیں

آرٹیکل کو ہٹائے جانے کے بعد سیاسی طور پر بہت شور مچا تھا، مگرافراتفری پیدا کرنے کی کوشش ناکام رہی ۔بہت جلد عوام کو اس بات کا احساس ہوگیا کہ فیصلہ متنازعہ نہیں بلکہ تاریخی ہے کیونکہ حکومت کی دور اندیشی کے نتیجے میں آج کشمیر بھی ملک کے دیگر حصوں کے ساتھ ترقی کی راہ پر گامزن ہے۔ بہت سے قوانین جیسے چائلڈ میرج ایکٹ، تعلیم کا حق اور زمینی اصلاحات بھی یہاں موثر ہیں۔ کئی دہائیوں سے ریاست میں رہنے والے والمیکی، دلت اور گورکھا برادریاں بھی اب ریاست کے دیگر باشندوں کے برابر حقوق حاصل کر رہی ہیں۔

یاد رہے کہ 2021-22 کے دوران، روپے 34,704.46 کروڑ روپے مرکز کے زیر انتظام جموں و کشمیر کو امداد کے طور پر مختص اور روپے لداخ کےمرکزی خطہ  کو 5958 کروڑ روپے مختص کیے گئے ہیں۔ اسی طرح، 2022-23 کے دوران، روپے 35,581.44 کروڑ روپے مرکز کے زیر انتظام جموں و کشمیر کو امداد کے طور پر اور روپے مختص کیے گئے ہیں۔ لداخ کے مرکزی خطہ کو 5958 کروڑ روپے مختص کیے گئے ہیں۔ پی ایم جی ایس وائی کے تحت، پی ایم جی ایس وائی کے تحت منظور شدہ 19038 کلومیٹر کی لمبائی کے مقابلے میں، ستمبر 2022 تک 18001 کلومیٹر سڑک کی لمبائی حاصل کی گئی ہے۔ پی ایم جی ایس وائی-تھری کے تحت 1358 کروڑ روپے کی لاگت سے منظور شدہ 1272 کلومیٹر کی اپ گریڈیشن۔

نومبر 2015 کو وزیر اعظم نریندر مودی نے سماجی-اقتصادی بنیادی ڈھانچے کو مضبوط بنانے اور جموں و کشمیر کی ترقی کے لیے تقریباً 80,000 کروڑ روپے کی تعمیر نو کی اسکیم کا اعلان کیا تھا جسے وزیر اعظم ترقیاتی پیکیج کہا جاتا ہے۔ سابقہ ریاست کی تنظیم نو کے بعد جموں و کشمیر میں 58,477 کروڑ روپے کے 53 پروجیکٹ اور لداخ میں 21,441 کروڑ روپے کے 9 پروجیکٹوں پر کام جاری ہے۔

جموں و کشمیر کے مرکزی خطہ میں وزیر اعظم کے ترقیاتی پیکیج 2015 کے تحت 53 میگا ترقیاتی منصوبوں میں سے - 29 منصوبے مکمل ہو چکے ہیں۔8کافی حد تک مکمل. باقی منصوبے عملدرآمد کے مختلف مراحل میں ہیں۔

   حقوق  اور انصاف

 تمام مرکزی قوانین کا دائرہ جموں و کشمیر تک کر دیا گیا جن میں ریزرویشن قانون بھی شامل ہے جس سے سماج کے بہت سے پسماندہ طبقات کو فائدہ پہنچا ہے۔ قبل ازیں ریزرویشن صرف ایکچوئل لائن آف کنٹرول (اے ایل سی ) کے ساتھ رہنے والے افراد کو فراہم کیا جاتا تھا۔ ریزرویشن کا فائدہ بین الاقوامی سرحد کے ساتھ رہنے والے افراد تک پہنچایا گیا ہے جس سے ان کی دیرینہ طلب کو پورا کیا گیا۔

جموں و کشمیر پنچایتی راج ایکٹ میں اکتوبر 2020 میں مرکزی حکومت کی طرف سے ترمیم کی گئی تھی۔ پنچایتی راج کے تیسرے اور آخری درجے یعنی ضلع ترقیاتی کونسلوں کی تشکیل کے لیے انتظامات داخل کیے گئے تھے۔ نتیجتاً، ضلع ترقیاتی کونسلوں کے انتخابات کے ساتھ ساتھ مرکزی خطہ میں پنچوں اور سرپنچوں کی خالی نشستوں کے لیے ضمنی انتخابات منعقد ہوئے۔

جموں و کشمیر کے لیے مجموعی طور پر 51.7فیصد پولنگ کے ساتھ پورے الیکشن کی تصویر متاثر کن ہے۔ جموں میں 68.4فیصد اور کشمیر میں 34.8فیصد۔ سخت سرد موسم کے باوجود یہ ایک غیر معمولی کارکردگی تھی۔ اس سے قبل پچائیتی انتخابات 2018 میں 74.1 فیصد ٹرن آؤٹ کے ساتھ ہوئے تھے۔ اکتوبر 2019 میں جموں و کشمیر کی تاریخ میں پہلی بار بلاک ڈیولپمنٹ کونسلوں کے انتخابات ہوئے- 98.3فیصد ٹرن آؤٹ ہوا - جبکہ بلاک پنچایتیں تشکیل دی گئیں اور اسے فعال بنایا گیا۔

والمیکی برادری کے لوگوں، گورکھوں اور مغربی پاکستان کے مہاجرین کو اب پہلی بار ریاستی انتخابات میں اپنا ووٹ ڈالنے کا حق حاصل ہے۔ ڈومیسائل قانون لاگو کیا گیا ہے۔ ڈومیسائل کی نئی تعریف کے مطابق جموں و کشمیر میں 15 یا اس سے زیادہ سالوں سے مقیم افراد کو ڈومیسائل سمجھا جائے گا۔1990 میں وادی کشمیر سے نکالے گئے کشمیری پنڈتوں کی دوبارہ آبادکاری کے لیے راہ ہموار کی گئی۔  جموں و کشمیر سے باہر شادی کرنے والی خواتین کے ساتھ ساتھ ان کے بچوں کے حقوق کے تحفظ کو یقینی بنایا گیا ہے۔

ترقی میں تیزی

کشمیر میں ترقیاتی کاموں میں جو تیزی آئی اس کا اعتراف اب عوام اور سیاسی مخالف بھی کرتے ہیں۔ قابل ذکر ہے کہ شاہ پور کنڈی ڈیم پراجیکٹ پر کام جو 40 سال سے تعطل کا شکار تھا، دوبارہ شروع کر دیا گیا ہے۔ ریڈل  ہائیڈرو پاور پراجیکٹ کا کام بھی دوبارہ شروع کیا جا رہا ہے۔ جموں و کشمیر میں 17 انفرادی استفادہ کنندگان کی اسکیموں کی 100فیصد کوریج کو یقینی بنایا جا رہا ہے۔ • بیک ٹو ویلیج اسکیم نافذ کی گئی ہے۔ گزیٹیڈ افسران کو لوگوں کے مسائل کو سمجھنے کے لیے دو دن اور ایک رات ان کو تفویض کردہ پنچایت اور بلاکس میں رہنا پڑتا ہے۔ ماضی میں ایسا ہونا ممکن نہیں تھا ۔ اس کے سبب اب سرکاری افسران جوابدہ بن رہے ہیں

کچے سے پکے مکان میں

جموں کشمیر کے سرحدی علاقے میں رہنے والے پونچھ ضلع کے محمد شفیع پہلے دوسروں کے گھروں میں رہنے پر مجبور تھے۔بعد میں اس نے کچا گھر بنایا۔ لیکن اس برف باری کے شکار علاقے میں ایک کچا گھر رہنے کے لیے کافی غیر آرام دہ تھا۔ پونچھ ضلع انتظامیہ کی پہل پر شفیع کو پردھان منتری آواس یوجنا کے تحت ایک پکا مکان ملا۔ اپنے پکے گھر سے بے حد خوش شفیع کہتے ہیں کہ میں مودی صاحب کا دل کی گہرائیوں سے شکریہ ادا کرتا ہوں۔ درحقیقت سولاتری میں پونچھ ضلع کی تحصیل منکوٹ میں واقع 37 گاؤں میں مرکزی حکومت کی اس اسکیم کے تحت نصف درجن مکانات استفادہ کنندگان کے حوالے کیے گئے ہیں۔ اس اسکیم سے مستفید ہونے والی رخسانہ کوثر کہتی ہیں کہ پہلے ہم مشکلات میں زندگی گزارنے پر مجبور تھے۔لیکن اب ہم آرام سے زندگی گزار رہے ہیں۔ 2014 سے اب تک ملک کے دیہی علاقوں میں 2 کروڑ سے زیادہ گھر تعمیر کیے جا چکے ہیں تاکہ غریب لوگوں کے سروں پر چھت کی امید پوری ہو سکے۔

سیاحت پھر سے چمک گئی

جیسے جیسے جموں و کشمیر سے 30 سالہ پاکستان کی سرپرستی میں جاری دہشت گردی کے سیاہ بادل چھٹ رہے ہیں، سیاحت کی صنعت تیزی سے اس خطے کی شناخت بن رہی ہے۔ محکمہ سیاحت کی صنعت کی بحالی کے لیے کی جانے والی کوششوں کو مختلف سطحوں پر سراہا جا رہا ہے۔ انڈیا ٹوڈے ٹورازم سروے میں جموں و کشمیر کو ملک کے بہترین ایڈونچر سیاحتی مقام کے طور پر چنا گیا تھا۔

سرحدی سیاحتی مقامات جیسے گریز، وادی بنگس اور شمالی کشمیر میں اُڑی 2022 میں سب سے زیادہ دیکھے جانے والے مقامات میں شامل تھے۔ پچھلے سال گریز کو ملک کا بہترین آف بیٹ مقام قرار دیا گیا تھا۔ حکومت نے گزشتہ تین سالوں کے دوران 75 نئے سیاحتی مقامات کو سیاحتی مقامات کی فہرست میں شامل کیا ہے تاکہ جموں و کشمیر کا دورہ سیاحوں کے لیے ایک یادگار تجربہ بنایا جا سکے

اب کشمیر میں 2019 کے بعد، مرکز نے جموں و کشمیر میں سیاحت کے شعبے کی ترقی کے لیے بجٹ میں 786 کروڑ روپے کا ریکارڈ مختص کیا ہے۔ ترقی پسند اور تبدیلی کے اقدامات، اور مرکز کی طرف سے فراہم کردہ آزادانہ فنڈنگ نے یونین ٹیریٹری کا منظرنامہ بدل دیا ہے۔آرٹیکل 370ہٹائے جانے کے بعد سب سے زیادہ جس شعبہ میں اچھال آیا وہ سیاحت کا ہے۔ سال 2022 کے دوران 26.73 لاکھ سیاح کشمیر آئے تھے جبکہ رواں سال میں یہ تعداد مزید بڑھنے کی توقع ہے ۔

یہ کشمیر کی ترقی کی مکمل کہانی نہیں کیونکہ یہ سلسلہ ابھی جاری ہے۔ ترقی کا یہ سفر ابھی رفتار پکڑ رہا ہے ،کشمیریوں کی زندگی سے تلخیوں اورکڑواہٹ کو دور کررہا ہے ۔ معاشی ترقی اور روزگار کے مواقع کشمیر کو حقیقی جنت بنا رہے ہیں۔ خوشحالی اور سکون کے ساتھ کشمیری اس بات کو محسوس کررہے ہیں کہ یہی ہے کشمیر کی بلند تصویر۔۔