اویناش دودھے

مہاراشٹر کے ودربھ کے حسین پہاڑی علاقے چکھلدرہ میں آنے والے لوگوں میں سے بہت کم ہوں گے جو محمد اشرف اور ان کی نوالٹی اسٹور کو نہ جانتے ہوں۔ یہ نوالٹی اسٹور 31 اکتوبر کو اپنے 60 سال مکمل کر چکا ہے۔ آج چکھلدرہ کا یہ نوالٹی اسٹور ایک منی ڈیپارٹمنٹل اسٹور یا سپر بازار کے طور پر پہچانا جاتا ہے۔ مگر 31 اکتوبر 1965 کو یہ صرف ایک چھوٹے سے دواخانے کے طور پر شروع ہوا تھا۔ تب صرف 19 سال کے اشرف نے زیادہ تر آدی واسی آبادی والے اس قصبے میں ایک چھوٹی سی دوا کی دکان کھولی تھی۔اُس وقت چکھلدرہ کی آبادی صرف 1380 تھی۔ ہفتے میں بمشکل پانچ دس لوگ سر درد، پیٹ درد یا بخار کی دوا لینے آیا کرتے تھے۔ آہستہ آہستہ اشرف بھائی نے اسی جگہ ایک جنرل اسٹور بھی شروع کیا۔ گاؤں والوں کو جو چیز درکار ہوتی، وہ قریبی شہر اچلپور سے منگوا دیتے۔

یوں کرتے کرتے اشرف بھائی نے اپنی دکان میں روزمرہ کی ضروری چیزیں رکھنا شروع کیں۔ جیسے منجن، کنگھی، تولیہ، صابن، سیفٹی پن، پاؤڈر، دوسری زیبائشی چیزیں، بنیان، چپل، جوتے، گھڑیاں، قلم، پنسل، ربر، شارپنر، کاپیاں، کاغذ، اسکول کا سامان، بسکٹ، چاکلیٹ، لائٹ، بیٹری، کول ڈرنک، آئسکریم اور ویفرز وغیرہ۔

چیزیں ہزاروں ہیں مگر نوالٹی اسٹور آج بھی سائز میں چھوٹا ہی ہے۔ اس کے باوجود یہاں سب کچھ دستیاب ہے۔ دکان گویا علی بابا کی غار معلوم ہوتی ہے۔ کوئی بھی چیز مانگو، اشرف بھائی ایک لمحے میں کسی نہ کسی کونہ سے وہ نکال کر دے دیتے ہیں۔چکھلدرہ میں ہر نئی چیز سب سے پہلے نوالٹی اسٹور میں آئی۔ پہلا ایس ٹی ڈی پی سی او نوالٹی میں لگا۔ فیکس مشین انہی کے پاس تھی۔ انٹرنیٹ بھی سب سے پہلے نوالٹی میں آیا۔ اخبار اور رسائل فروخت کرنے کی واحد جگہ بھی نوالٹی ہی رہی۔اسی خصوصیت کے باعث نوالٹی اسٹور پر ہمیشہ گاہکوں کی بھیڑ رہتی ہے۔ شہر کے چمک دار لباس والے سیاح ہوں یا آدی واسی دیہات کے لوگ، سب یہاں آتے ہیں۔ وجہ صرف چیزوں کی دستیابی نہیں بلکہ اشرف بھائی کی میٹھی زبان ہے۔

گزشتہ 60 سالوں سے نوالٹی اسٹور کی یہ رونق صرف اشرف بھائی کی بدولت قائم ہے۔ کوئی چھوٹا ہو یا بڑا، امیر ہو یا غریب، شہری ہو یا آدی واسی، اشرف بھائی سب سے خلوص اور نرمی سے پیش آتے ہیں۔ اکیسویں صدی کے پہلے عشرے تک چکھلدرہ میں یہی واحد جنرل اسٹور اور دواخانہ تھا۔آج کئی دکانیں ہیں مگر بھیڑ نوالٹی ہی میں رہتی ہے۔ وجہ یہ ہے کہ اشرف بھائی انسان کی ضرورت سمجھ کر برتاؤ کرتے ہیں۔ کئی آدی واسیوں کے پاس پورے پیسے نہیں ہوتے۔ وہ چیز کی قیمت سن کر واپس جانے لگتے ہیں۔ اشرف بھائی ان کا چہرہ دیکھ کر کہتے ہیں، ابھی جتنے ہیں اتنے دے دو۔ باقی جب ہوں تب دے دینا۔

آج چکھلدرہ میں ایک سرکاری اسپتال ہے اور کچھ پرائیویٹ ڈاکٹر بھی ہیں۔ مگر بہت سے آدی واسی آج بھی اشرف بھائی ہی کو اپنا ڈاکٹر مانتے ہیں۔ بخار، نزلہ، کھانسی، سر درد یا قے جیسی تکالیف کے لیے وہ انہی کی دوا پر بھروسہ کرتے ہیں۔ اگر کوئی بیماری سنگین ہو تو اشرف بھائی فوراً مریض کو اسپتال بھیج دیتے ہیں۔ انسانوں کو جوڑنے کی اپنی اسی عادت سے انہوں نے واقعی ہزاروں دل جوڑے ہیں۔

آج اشرف بھائی 79 سال کے ہیں۔ مگر آج بھی کم از کم 12 گھنٹے کام کرتے ہیں۔ انہیں بیٹھے دیکھنا بہت کم ہوتا ہے۔ صوبے کے کونے کونے سے آنے والے لوگ، لیڈر، سرکاری افسر، ڈاکٹر، کاروباری، اخبارات کے مالک، صحافی اور مختلف شعبوں کی مشہور شخصیات سب ان سے خلوص رکھتے ہیں۔یہ سب چکھلدرہ کی قدرت میں کھو جانے سے پہلے چند لمحے اشرف بھائی کے پاس ضرور بیٹھتے ہیں۔ چائے کی چسکی کے ساتھ خیریت پوچھتے ہیں۔ بدلتے چکھلدرہ پر گفتگو کرتے ہیں۔ چکھلدرہ کا تاریخ و جغرافیہ جاننے والے اشرف بھائی پچھلے ساٹھ برسوں کی دلچسپ یادیں سناتے ہیں۔

مگر اپنی ذاتی زندگی کی مشکلات کسی سے بیان نہیں کرتے۔ نہ ہی کبھی ان تعلقات کا فائدہ اٹھاتے ہیں۔ انہوں نے اپنی زندگی میں کئی مصیبتیں جھیلی ہیں۔ کئی عزیزوں کو کھویا ہے۔ وہ ایک گردے پر زندگی گزار رہے ہیں۔ لیکن اس بارے میں کبھی بات نہیں کرتے۔

جب ان سے ان کے اطمینان کا راز پوچھا جاتا ہے تو وہ دو لفظوں میں جواب دیتے ہیں، خدا کی مہربانی۔ پیسہ کمانے اور جائیداد بنانے کے کئی موقعے ان کے پاس آئے مگر اشرف بھائی اپنے چھوٹے سے نوالٹی اسٹور میں ہی مطمئن رہے۔ بعد میں آنے والے کئی لوگوں نے لاکھوں کروڑوں کمائے۔ زمینیں اور جائیدادیں بنائیں۔ مگر انہیں کسی سے حسد نہیں۔ اس بارے میں وہ بس اتنا کہتے ہیں، خدا کی مرضی۔ اس کی کرم سے سکون سے جی رہے ہیں۔ ان کا یہی اطمینان اور صبر ان کے چہرے سے جھلکتا ہے اور انہیں دیکھ کر آپ کے دل کو بھی سکون ملتا ہے۔

مصنف سینئر صحافی اور سابق مدیر ہیں