پٹنہ کے مصروف کوچنگ مرکز میں، جہاں لاکھوں امیدوار سرکاری ملازمتوں کے حصول کے لیے جدوجہد کرتے ہیں، حالیہ دنوں میں دو نام مختلف وجوہات کی بنا پر خبروں کی زینت بنے ہوئے ہیں۔ ایک معروف استاد خان سر ہیں، جبکہ دوسرا نام روشن آنند کا ہے، جو اس وقت ایک قانونی تنازع کے مرکز میں ہیں۔ کروڑوں طلبہ کے درمیان "خان سر" کے نام سے معروف مشہور استاد فیصل خان ایک بار پھر خبروں میں ہیں۔ پٹنہ میں ایک کوچنگ ادارے کے ساتھ تنازع اور پرتشدد واقعے کی پولیس تحقیقات جاری ہے

پٹنہ میں گیان بندھو ادارے کے استاد روشن آنند کے ساتھ تنازع شدت اختیار کر گیا ہے اور اس معاملے میں خان سر کا نام بھی ایف آئی آر میں شامل کیا گیا ہے۔ اس واقعے کے بعد طلبہ کے احتجاج اور شہر میں بھاری پولیس نفری کی تعیناتی دیکھنے میں آئی۔

خان صاحب کی شروعات صرف 40 روپے سے

خان سر کی موجودہ کامیابی کو سمجھنے کے لیے ان کے ابتدائی حالات پر نظر ڈالنا ضروری ہے۔ 1993 میں اتر پردیش کے ضلع دیوریا میں پیدا ہونے والے فیصل خان نے زندگی کے ابتدائی دن مالی مشکلات میں گزارے۔ یوٹیوب پر شہرت حاصل کرنے اور کروڑوں سبسکرائبرز تک پہنچنے سے پہلے ان کی زندگی میں ایک ایسا دن بھی آیا جس نے ان کی سوچ کو ہمیشہ کے لیے بدل دیا۔ایک  ذرائع کے مطابق کئی گھنٹے تدریس کرنے کے بعد انہیں صرف 40 روپے معاوضہ ملا تھا جبکہ گھر واپسی کے لیے بس کا کرایہ 90 روپے تھا۔ رقم کم ہونے کی وجہ سے انہوں نے بس کے بجائے پیدل سفر کرنے کا فیصلہ کیا۔ اس دوران خان سر نے بعد میں گنگا کے کنارے بیٹھ کر ایک کلاس روم قائم کرنے کا عزم کیا۔ اس وقت ان کے پاس سرمایہ نہیں تھا اور دوستوں کی مدد سے ایک کمرہ کرائے پر لے کر تدریس کا آغاز کیا گیا۔

یوٹیوب کی دنیا میں خان سر کی ہلچل

ان کی مالی زندگی کا ایک دلچسپ پہلو وہ پیشکش بھی ہے جسے انہوں نے قبول نہیں کیا۔ ایک مقبول پروگرام میں گفتگو کے دوران خان سر نے دعویٰ کیا تھا کہ ایک کارپوریٹ ادارے نے انہیں 107 کروڑ روپے کی پیشکش کی تھی لیکن انہوں نے اسے مسترد کر دیا۔ ان کا کہنا تھا کہ اگر وہ یہ معاہدہ قبول کر لیتے تو ان طلبہ سے دور ہو جاتے جو انہیں اپنے ماضی کی یاد دلاتے ہیں اور جو مہنگی کوچنگ فیس ادا کرنے کی استطاعت نہیں رکھتے۔خان سر کی آمدنی کا سب سے بڑا ذریعہ ان کا یوٹیوب چینل "خان جی ایس ریسرچ سینٹر" ہے۔ اس چینل کے تقریباً 2 کروڑ 60 لاکھ سے زائد سبسکرائبرز ہیں۔ مختلف تخمینوں کے مطابق اشتہارات برانڈ شراکت داریوں اور ناظرین کی معاونت کے ذریعے انہیں ماہانہ 10 لاکھ سے 20 لاکھ روپے تک آمدنی حاصل ہوتی ہے۔آن لائن سرگرمیوں کے علاوہ وہ پٹنہ اور دہلی میں "خان گلوبل اسٹڈیز" کے نام سے کوچنگ مراکز بھی چلاتے ہیں۔ ان اداروں میں مختلف کورسز کی سالانہ فیس تقریباً 20 ہزار روپے سے ایک لاکھ روپے تک بتائی جاتی ہے۔

 بات روشن آنند کی

  روشن آنند کی تنازع کے پس منظر میں موجود ان کی زندگی کی کہانی موجودہ حالات سے کہیں زیادہ پیچیدہ ہے۔ گیان بندو کوچنگ کے ڈائریکٹر بننے سے پہلے ان کی زندگی غربت، محرومی اور مسلسل جدوجہد کی ایک طویل داستان رہی ہے۔ یہ تحریر ان کی زندگی کے اسی سفر کا تعارف ہے، نہ کہ اس تنازع میں کسی کو درست یا غلط قرار دینے کی کوشش۔

روشن آنند کی پیدائش بہار کے ضلع سہرسہ کے گاؤں دھمسینا میں ایک عام کسان خاندان میں ہوئی۔ علاقے کے لاکھوں دیگر خاندانوں کی طرح ان کے گھر کی معاشی حالت بھی کمزور تھی اور روزگار کا انحصار موسمی کھیتی باڑی اور سخت محنت پر تھا۔ زندگی میں آسائشوں کی کوئی گنجائش نہیں تھی۔ نہ ذاتی اساتذہ میسر تھے اور نہ ہی انگریزی میڈیم تعلیمی اداروں میں تعلیم حاصل کرنے کا موقع۔ غربت اور محدود وسائل کے باوجود انہوں نے تعلیم کو اپنی زندگی بدلنے کا ذریعہ بنایا اور مسلسل محنت کے ذریعے آگے بڑھنے کی کوشش جاری رکھی۔

روشن کی تعلیم

 انہوں نے اپنی ابتدائی تعلیم سرکاری اسکولوں میں حاصل کی، جہاں تعلیمی وسائل محدود تھے لیکن علم حاصل کرنے کا ان کا شوق بے حد مضبوط تھا۔ کم عمری ہی میں انہیں یہ احساس ہو گیا تھا کہ تعلیم ہی وہ واحد راستہ ہے جو ان کے دیہی ماحول اور بہتر مستقبل کے درمیان پل کا کام کر سکتی ہے۔ جب ان کے ہم عمر بچے کھیل کود میں مصروف رہتے تھے، اس وقت روشن آنند اپنی پڑھائی پر توجہ دیتے تھے۔ اپنے خاندان کی معاشی حالت بدلنے اور بہتر زندگی کے خواب نے انہیں مسلسل محنت اور لگن کے ساتھ آگے بڑھنے پر آمادہ رکھا۔صرف 15 برس کی عمر میں روشن آنند نے ایک ایسا فیصلہ کیا جس نے ان کی زندگی کا رخ بدل دیا۔ انہوں نے اپنے گاؤں اور خاندان کو چھوڑ کر پٹنہ کا رخ کیا۔ ان کا خواب بڑا تھا اور مقصد انجینئر بننا تھا۔

کوٹا میں  نئی منزل

اپنے خواب کی تکمیل کے لیے وہ راجستھان کے شہر کوٹا پہنچے جو مسابقتی امتحانات کی تیاری کا ایک بڑا مرکز سمجھا جاتا ہے۔ سخت محنت اور لگن کے نتیجے میں انہوں نے اے آئی ای ای ای کا امتحان کامیابی سے پاس کیا اور ملک کے معروف انجینئرنگ ادارے بی آئی ٹی میسرا میں داخلہ حاصل کر لیا۔ سہرسہ کے ایک عام کسان خاندان سے تعلق رکھنے والے نوجوان کے لیے یہ لمحہ بے حد خوشی اور فخر کا باعث تھا۔

تاہم یہ خوشی زیادہ دیر برقرار نہ رہ سکی۔ بچپن سے ان کا تعاقب کرنے والی مالی مشکلات ایک بار پھر ان کے سامنے آ کھڑی ہوئیں۔ انجینئرنگ کی تعلیم کے اخراجات، ہاسٹل فیس اور دیگر ضروری مصارف ان کے خاندان کی استطاعت سے کہیں زیادہ تھے۔ تعلیمی قابلیت اور شاندار کارکردگی کے باوجود روشن آنند کو مجبوری کے تحت اپنی انجینئرنگ کی تعلیم ادھوری چھوڑنی پڑی۔اگرچہ انجینئر بننے کا خواب ٹوٹ گیا، لیکن کامیابی حاصل کرنے کا عزم اور حالات سے لڑنے کا حوصلہ ان کے اندر بدستور زندہ رہا۔

ایک نئے راستے کا انتخاب

 انجینئرنگ کی تعلیم ادھوری چھوڑنے کے بعد روشن آنند نے شکست تسلیم کرتے ہوئے اپنے گاؤں واپس جانے کے بجائے ایک نیا راستہ اختیار کیا۔ انہوں نے سرکاری ملازمت کے حصول کو اپنا ہدف بنایا اور بہار پولیس، بی پی ایس سی اور یو پی ایس سی جیسے مسابقتی امتحانات کی تیاری شروع کر دی۔

تاہم ان کا یہ سفر مسلسل آزمائشوں سے بھرا ہوا تھا۔ انہوں نے بہار پولیس کے تحریری امتحان میں کامیابی حاصل کی لیکن جسمانی اہلیت کے مرحلے میں کامیاب نہ ہو سکے۔ اسی طرح بی پی ایس سی کے انٹرویو تک پہنچنے کے باوجود ان کا نام حتمی فہرست میں شامل نہ ہو سکا۔ ہر ناکامی ان کے لیے ایک دھچکا ضرور تھی لیکن انہوں نے ہمت نہیں ہاری۔

اسی دوران انہوں نے دوسرے امیدواروں کی رہنمائی اور تدریس کا کام شروع کیا۔ ابتدا میں وہ دوستوں اور پڑوسیوں کو مشکل مضامین سمجھانے میں مدد دیتے تھے۔ اس وقت ان کی مالی حالت اس قدر کمزور تھی کہ کئی مرتبہ تدریس کے معاوضے کے طور پر انہیں نقد رقم کے بجائے گھر کا پکا ہوا کھانا ملتا تھا۔

جدوجہد کے انہی دنوں میں روشن آنند کو اپنی اصل صلاحیت کا احساس ہوا۔ انہوں نے محسوس کیا کہ اگرچہ وہ خود مختلف امتحانات میں بار بار کامیابی حاصل نہیں کر پا رہے تھے لیکن پیچیدہ موضوعات کو آسان انداز میں سمجھانے کی غیر معمولی صلاحیت رکھتے ہیں۔ طلبہ ان کے تدریسی انداز کو پسند کرتے تھے کیونکہ وہ ان ہی کی طرح مشکلات اور محرومیوں سے گزرے تھے اور ان کی زبان میں بات کرتے تھے۔

اکیڈمی کا قیام

یکم ستمبر 2017 کو انہوں نے باقاعدہ طور پر "گیان بندو جی ایس اکیڈمی" کی بنیاد رکھی جو بعد میں "گیان بندو کوچنگ" کے نام سے معروف ہوئی۔ آغاز نہایت سادہ تھا۔ ان کی پہلی کلاس میں صرف چار طلبہ موجود تھے۔ لیکن روشن آنند نے انہی چار طلبہ کو اپنی کامیابی کی بنیاد بنایا اور پوری لگن سے انہیں پڑھایا۔رفتہ رفتہ ان کی شہرت پھیلنے لگی۔ بہار پولیس، ایس ایس سی، ریلوے اور بینکنگ امتحانات کی تیاری کرنے والے طلبہ کے لیے گیان بندو ایک ایسے ادارے کی صورت اختیار کر گیا جہاں مناسب فیس میں معیاری رہنمائی دستیاب تھی۔ وقت کے ساتھ وہ چار طلبہ ہزاروں میں تبدیل ہو گئے اور وہ شخص جو کبھی تعلیم دینے کے بدلے کھانا قبول کرتا تھا پٹنہ کے معروف کوچنگ اداروں میں سے ایک کے سربراہ کے طور پر پہچانا جانے لگا۔

 مگر اج یہ دونوں کوچنگ سینٹر ایک مختلف کیس میں امنے سامنے ہیں شروع میں لگا کہ روشن انند نہیں خان سر کی اکیڈمی پر حملہ کرایا ہے مگر پھر سی سی ٹی وی کی فٹیج نے کہانی کا رخ بدل دیا اب خان سر قانون کے چنگل میں ہے مگر اس تنازع اور لڑائی نے ملک کے سامنے ان دونوں گرو جی کی زندگی کی اصل کہانی کو بھی توجہ کا مرکز بنا دیا ہے