آشا کھوسہ/نئی دہلی

’ڈی کلاسیفائیڈ: آپریشن سندور‘ پاکستان اور پاکستان کے زیر قبضہ جموں و کشمیر میں موجود دہشت گرد ٹھکانوں کے خلاف بھارت کی جوابی کارروائی پر بننے والی پہلی دستاویزی سیریز ہے۔ یہ کارروائی 22 اپریل 2025 کو پہلگام میں 26 بھارتی شہریوں کو ان کی خواتین اہل خانہ کے سامنے قتل کیے جانے کے بعد کی گئی تھی۔ چار روزہ آپریشن 7 مئی کی علی الصبح شروع ہوا، جس کا مقصد اسلام آباد کو واضح پیغام دینا تھا کہ آئندہ بھارت کی سرزمین پر ہونے والے ہر دہشت گرد حملے کو جنگی کارروائی تصور کیا جائے گا اور اس کا اسی انداز میں جواب دیا جائے گا۔

ڈسکوری پلس پر نشر ہونے والی دو حصوں پر مشتمل اس دستاویزی سیریز میں آپریشن سندور کی وہ تفصیلات سامنے لائی گئی ہیں جو اس کی منصوبہ بندی، قیادت اور کارروائی میں براہِ راست شامل افراد کی زبانی بیان کی گئی ہیں۔

قومی سلامتی کے مشیر اجیت ڈوبھال اس دستاویزی فلم میں آپریشن سندور کے بارے میں بھارت کی جانب سے سب سے اعلیٰ سطح کی سرکاری تفصیل پیش کرتے ہیں۔ ان کے ساتھ آپریشن میں شامل دیگر فوجی سربراہان اور کمانڈروں نے بھی کارروائی کے مختلف پہلوؤں پر بات کی ہے۔ چونکہ یہ آپریشن کی پہلی باقاعدہ سرکاری تفصیل سامنے لانے والی دستاویزی فلم ہے، اس لیے اس میں کئی ایسے دلچسپ اور پہلے سے نامعلوم پہلو بھی سامنے آتے ہیں۔

Under Honourable PM Narendra Modi's call for justice, India answered with #OperationSindoor.@Raphe_mPhibr salutes Declassified: Operation Sindoor, premiering on August 15, 9:00 PM - 11:00 PM, only on @discoveryplusIN & @DiscoveryIN@adgpi @IAF_MCC @indiannavy pic.twitter.com/Xv6S2j9WIT

— discovery+ India (@discoveryplusIN) August 14, 2026

دستاویزی فلم میں سامنے آنے والے آپریشن سندور کے 10 اہم نکات یہ ہیں:

1۔ آپریشن کا نام کیسے رکھا گیا؟

اس وقت کے آرمی چیف جنرل اپیندر دویدی کے مطابق وزیراعظم نریندر مودی نے ان سے پوچھا کہ مجوزہ کارروائی کا کیا نام رکھا گیا ہے۔ جنرل دویدی نے بتایا کہ عارضی طور پر اس کا نام ’’آپریشن ٹیولپ گارڈن‘‘ رکھا گیا ہے۔ ان کا خیال تھا کہ چونکہ پہلگام حملہ کشمیر میں ہوا ہے، اس لیے ’’ٹیولپ گارڈن‘‘ نام لوگوں کے لیے قابلِ فہم اور کشمیر سے متعلق ہوگا۔

اس پر وزیراعظم مودی نے پوچھا کہ اسے ’’آپریشن سندور‘‘ کیوں نہ کہا جائے۔

جنرل دویدی نے ابتدا میں اسے دریائے سندھ کے حوالے سے سمجھا اور کہا کہ یہ نام مناسب ہے، کیونکہ بھارت نے پاکستان جانے والے سندھ کے پانی کا بہاؤ روکنے کا فیصلہ کیا ہے۔ اس پر وزیراعظم مودی نے وضاحت کی کہ دہشت گردوں نے بھارتی خواتین کا سندور اجاڑ دیا ہے۔ جنرل دویدی کے مطابق انہیں اسی لمحے احساس ہوا کہ یہ ایک انتہائی طاقتور نام ہے اور پورے ملک کو ایک جذباتی رشتے میں جوڑ سکتا ہے۔

2۔ پہلگام حملے کے بعد وزیراعظم کا فوری ردعمل

آپریشن سندور کی تیاری پہلگام حملے کے اگلے ہی روز شروع ہوگئی تھی۔ وزیراعظم نریندر مودی سعودی عرب کا دورہ مختصر کرکے واپس آئے تو دہلی ایئرپورٹ پر ہی انہوں نے ملک کے اعلیٰ ترین سکیورٹی اور دفاعی حکام کے ساتھ پہلی اہم میٹنگ کی۔

قومی سلامتی کے مشیر اجیت ڈوبھال کے مطابق وزیراعظم نے اپنی ٹیم سے انتہائی واضح سوالات کیے: حملہ کس نے کیا؟ کیا ہم حملہ آوروں کے بارے میں مکمل طور پر یقین سے کہہ سکتے ہیں؟

اس کے بعد وزیراعظم نے ڈوبھال سے کہا کہ حملہ آوروں کا پیچھا کیا جائے، چاہے وہ زمین پر ہوں، آسمان میں یا زمین کے نیچے۔

3۔ واضح اور دوٹوک احکامات

دستاویزی فلم کے مطابق وزیراعظم کی جانب سے کارروائی کے حوالے سے کوئی ابہام نہیں تھا۔ ایئرپورٹ پر ہونے والی میٹنگ کے تقریباً 12 گھنٹے کے اندر فوجی قیادت نے آپریشن سندور کی حکمت عملی پر کام شروع کردیا تھا۔

ایک انتہائی خفیہ وار روم میں پاکستان کے زیر قبضہ جموں و کشمیر اور پاکستان کے اندر موجود ممکنہ اہداف کی نشاندہی کی گئی۔ ساتھ ہی پاکستان کے ممکنہ ردعمل اور حتیٰ کہ جوہری ہتھیار استعمال کیے جانے کے امکان کا بھی جائزہ لیا گیا۔

اجیت ڈوبھال نے وزیراعظم کو جوہری ردعمل کے ممکنہ خطرے سے آگاہ کیا، جس پر وزیراعظم نے حتمی منظوری دینے سے قبل کچھ وقت مانگا۔

4۔ دہشت گردی کے 36 ٹھکانے نشانے پر

بھارتی فوج نے خفیہ ایجنسیوں اور ڈائریکٹوریٹ آف ملٹری آپریشنز کے ساتھ مل کر 36 دہشت گرد ٹھکانوں کی نشاندہی کی تھی۔

ان اہداف کے انتخاب کا بنیادی مقصد پاکستان کو یہ واضح پیغام دینا تھا کہ بھارت اپنی سرزمین پر ہونے والی ہر دہشت گرد کارروائی کو جنگی اقدام تصور کرے گا اور اس کا مناسب جواب دے گا۔

بالآخر 9 اہداف منتخب کیے گئے۔ ان میں سے سات پاکستان کے زیر قبضہ جموں و کشمیر میں جبکہ دو پاکستان کے پنجاب میں تھے۔

پنجاب میں واقع مریدکے اور بہاولپور خصوصی اہمیت رکھتے تھے۔ مریدکے کو لشکر طیبہ جبکہ بہاولپور کو جیش محمد کا اہم مرکز بتایا گیا۔

5۔ حملے کی حکمت عملی میں تبدیلی

پاکستان کے زیر قبضہ جموں و کشمیر میں دہشت گرد ٹھکانوں کے خلاف کارروائی کی ذمہ داری بھارتی فوج کی ناردرن کمانڈ کو دی گئی، جبکہ پاکستان کے پنجاب میں مریدکے اور بہاولپور کے اندر موجود اہداف کو نشانہ بنانے کی ذمہ داری بھارتی فضائیہ کو سونپی گئی۔

وزیراعظم مودی کی ہدایات واضح تھیں کہ یہ پاکستان کے خلاف مکمل جنگ نہیں ہے اور کارروائی کے دوران عام شہریوں کو نقصان سے بچانے کے لیے ہر ممکن احتیاط کی جائے۔

اسی دوران بحیرہ عرب میں بھارتی بحریہ نے اپنی موجودگی مضبوط رکھی۔ جب پاکستان کو اندازہ ہوا کہ بھارت کی جانب سے وسیع پیمانے پر کارروائی ہوسکتی ہے تو جنگ بندی کی کوششیں شروع ہوئیں۔

Discover how precision became one of the defining elements of #OperationSindoor. ​@Raphe_mPhibr salutes Declassified: Operation Sindoor premieres on August 15th at 9:00PM - 11:00PM, only on @DiscoveryIN & @discoveryplusIN . ​@adgpi @IAF_MCC @indiannavy pic.twitter.com/RcwuIq5vR0

— discovery+ India (@discoveryplusIN) August 12, 2026

6۔ آپریشن کی مکمل رازداری

آپریشن سندور کی کامیابی کے لیے منصوبہ بندی کو انتہائی خفیہ رکھا گیا۔ فوجی قیادت نے کارروائی سے قبل اپنی سرگرمیوں کو اس انداز میں چھپایا کہ کسی کو اصل منصوبے کا اندازہ نہ ہوسکے۔

ڈی جی ایم او جنرل راجیو گھائی کے مطابق انہوں نے اپنے پرسنل سیکریٹری سے کہا کہ وہ انہیں جنوبی بلاک کے عقبی دروازے سے اندر لے جائیں۔

آرمی چیف کو ان کے مہمانوں نے وار روم تک پہنچایا، جبکہ ایئر چیف مارشل اے پی سنگھ نے یہ ظاہر کیا کہ وہ بھوپال جارہے ہیں۔ تاہم ایک مقامی فضائی مشن کے بعد انہوں نے اپنا رخ تبدیل کیا اور خفیہ وار روم پہنچ گئے۔

7۔ آپریشن سندور میں علامتی پیغام

پہلگام میں خواتین کے سامنے ان کے شوہروں کو قتل کیے جانے کے جواب میں کارروائی کے علامتی پہلو کو بھی اہمیت دی گئی۔

مریدکے، جو بھارت-پاکستان سرحد سے تقریباً 50 کلومیٹر دور واقع ہے، پر حملہ کرنے والے مگ طیارے کی پائلٹ ایک خاتون تھیں۔ اسی طرح آپریشن کے حوالے سے دنیا کے سامنے بھارت کا مؤقف پیش کرنے کے لیے کرنل صوفیہ قریشی اور ونگ کمانڈر وومیکا سنگھ کو ترجمانوں میں شامل کیا گیا۔اس انتخاب کو بھارت کی جانب سے خواتین کی طاقت، عزم اور لچک کے اظہار کے طور پر پیش کیا گیا۔

8۔ 7 مئی کی کارروائی

7 مئی کو رات 1 بج کر 5 منٹ پر اہداف کے خلاف حملے شروع کیے گئے۔

دستاویزی فلم میں شامل فوجی قیادت کے مطابق کارروائی منصوبے کے مطابق ہوئی اور تمام اہم اہداف کو کامیابی سے نشانہ بنایا گیا۔ کئی فوجی رہنماؤں نے اسے اپنی پیشہ ورانہ زندگی کے سب سے اطمینان بخش لمحات میں شمار کیا۔

حملوں کے فوراً بعد ڈی جی ایم او لیفٹیننٹ جنرل راجیو گھائی نے اپنے پاکستانی ہم منصب میجر جنرل کاشف عبداللہ کو کارروائی اور اس کے مقصد سے آگاہ کیا۔ پاکستانی افسر نے جواب دیا کہ اب یہ بتانے کا کیا فائدہ ہے؟

9۔ ایل او سی پر شدید فائرنگ

ناردرن آرمی کمانڈر کے مطابق بھارتی فوج پاکستان کی جانب سے ممکنہ جوابی کارروائی کے لیے پہلے ہی تیار تھی۔

چند گھنٹوں کے اندر پاکستان نے سرحد اور لائن آف کنٹرول پر فائرنگ شروع کردی، جس کا بھارتی فوج نے زیادہ شدت سے جواب دیا۔

بھارت نے پاکستانی ڈرون حملوں کو اپنے فضائی دفاعی نظام کے ذریعے ناکام بنانے کی کوشش کی۔ دستاویزی فلم کے مطابق پاکستان نے بعد میں مبینہ طور پر گردواروں، مندروں اور عام شہریوں کے گھروں کو بھی نشانہ بنایا۔

بھارتی فوجی قیادت نے اس صورتحال کو ایک جملے میں بیان کرتے ہوئے کہا: ہم نے دہشت گردوں کو نشانہ بنایا، جبکہ انہوں نے شہریوں کو نشانہ بنایا۔

10۔ جنگ بندی کیسے ہوئی؟

بھارتی حملوں کے دوران پاکستان کے 11 فوجی اڈوں اور کمانڈ مراکز کو نشانہ بنائے جانے کے بعد پاکستانی فوج کے سربراہ عاصم منیر نے حملے رکوانے کے لیے امریکی مدد طلب کی۔

امریکی وزیر خارجہ مارکو روبیو نے اس سلسلے میں بھارتی وزیر خارجہ ڈاکٹر ایس جے شنکر سے رابطہ کیا اور پاکستان کی درخواست ان تک پہنچائی۔ تاہم بھارت کی جانب سے واضح کیا گیا کہ وہ کسی بیرونی ثالثی کو قبول نہیں کرتا۔

بالآخر پاکستانی میجر جنرل کاشف عبداللہ نے دوبارہ جنرل راجیو گھائی سے رابطہ کیا اور جنگ بندی کی درخواست کی۔ دستاویزی فلم کے مطابق عبداللہ نے کہا:

’’سر، آپ نے کافی برہموس فائر کرلیے ہیں، براہِ کرم اب روک دیجیے۔‘‘

اس کے بعد شام 5 بج کر 30 منٹ سے جنگ بندی نافذ ہوگئی۔

دلچسپ بات یہ ہے کہ دستاویزی فلم میں انٹرویو دینے والے زیادہ تر اعلیٰ فوجی حکام نے اس بات پر زور دیا کہ پاکستان کے ساتھ کشیدگی ختم نہیں ہوئی۔ ان کے مطابق ’’بے چینی برقرار ہے، کیونکہ آپریشن سندور جاری ہے۔‘‘