ناصر احمد

قرآن مجید میں ایک بھی ایسی آیت موجود نہیں ہے جو مسلمانوں کو کافر سے اس کے کسی ایسے عمل کی وجہ سے جنگ کرنے کا حکم دیتی ہو جو محض کفر کی دوسری صورتوں میں شمار ہوتا ہو۔ جیسے توہین کرنا۔ مذاق اڑانا۔ یا ایمان کو قبول نہ کرنا۔اصل الجھن اس وجہ سے پیدا ہوئی ہے کہ بدقسمتی سے اکثر مسلمان اور غیر مسلم۔ جن میں علماء۔ مفسرین اور دیگر شارحین بھی شامل ہیں۔کافر۔ مشرک اور بت پرست کو ایک ہی معنی میں استعمال کرتے ہیں۔ حالانکہ قرآن ان اصطلاحات کے درمیان واضح فرق کرتا ہے اور کسی ایک مقام پر بھی ان الفاظ کو ایک دوسرے کے متبادل کے طور پر استعمال نہیں کرتا۔قرآن مجید میں ایک بھی ایسی آیت نہیں ہے جو مسلمانوں کو یہ ہدایت دیتی ہو کہ ایسے غیر مسلم کے ساتھ جو کافر نہیں ہے انصاف۔ حسن سلوک اور دوستی کے علاوہ کوئی اور رویہ اختیار کیا جائے۔قرآن میں کافروں کے بارے میں جو آیات آئی ہیں وہ دراصل کفر کے ان اعمال کے بارے میں رہنمائی فراہم کرتی ہیں جن کا ذکر خود قرآن میں موجود ہے۔ ہر آیت کا سیاق و سباق اسی آیت کے اندر واضح ہوتا ہے۔

محمد مارماڈیوک پکتھال لکھتے ہیں۔۔۔ "قرآن مجید میں مجھے کافر کے دو مفہوم ملتے ہیں جو اس وقت ایک ہو جاتے ہیں جب ہم اللہ کے نقطۂ نظر کو سمجھنے کی کوشش کرتے ہیں۔ پہلی بات یہ ہے کہ کافر کسی خاص مذہب کا پیروکار نہ ہونے کا نام نہیں ہے۔ بلکہ کافر وہ ہے جو اللہ کی اس مہربان اور خیرخواہ مشیت کی مخالفت کرے جو اس نے انسانیت کے لیے مقرر کی ہے۔ اس معنی میں وہ تمام ادیان کی سچائی کا منکر ہے۔ تمام آسمانی کتابوں کو اللہ کی وحی ماننے سے انکار کرتا ہے۔ اور تمام انبیاء علیہم السلام کی فعال مخالفت کرتا ہے جنہیں مسلمان بلا امتیاز اللہ کے رسول ماننے کے پابند ہیں۔"

یہ مضمون قرآن مجید میں لفظ کافر اور مشرک نیز ان کے تمام صرفی اور نحوی مشتقات پر تحقیق کا نتیجہ ہے۔ قرآن مجید کافر۔ مشرک اور بت پرست کے درمیان نہایت واضح فرق کرتا ہے۔ یہ تینوں الفاظ ایک دوسرے کے مترادف نہیں ہیں۔ لیکن افسوس کہ اکثر مترجمین نے اس فرق کو نظر انداز کیا ہے اور ان الفاظ کو ایک ہی معنی میں استعمال کیا ہے۔ یہاں تک کہ یوسف علی جیسے معروف مترجم نے بھی متعدد مقامات پر ان کا درست ترجمہ نہیں کیا۔

موسیٰ علیہ السلام کو بھی کافر کہا گیا

لفظ کافر کو فرعون نے حضرت موسیٰ علیہ السلام کے لیے استعمال کیا۔

26:18
فرعون نے کہا کیا ہم نے تمہیں اپنے ہاں بچپن میں نہیں پالا تھا اور تم نے اپنی عمر کے کئی سال ہمارے درمیان نہیں گزارے تھے۔

26:19
اور تم نے وہ کام بھی کیا تھا جو تم نے کیا اور تم ناشکروں میں سے ہو۔

اس سے واضح ہوتا ہے کہ لفظ کافر ناشکری۔ سرکشی اور فعال مخالفت کے مفہوم میں بھی استعمال ہوتا ہے اور اس کا تعلق صرف عقیدے یا ایمان سے نہیں ہے۔

بعض صفات رکھنے والے مسلمانوں کو بھی کافر کہا گیا

2:253
وہ لوگ جو آپس میں لڑتے ہیں۔

2:254
وہ لوگ جو اللہ کی راہ میں خرچ نہیں کرتے۔

2:264
وہ لوگ جو احسان جتا کر یا تکلیف پہنچا کر اپنے صدقات کو ضائع کر دیتے ہیں۔ وہ اپنا مال لوگوں کو دکھانے کے لیے خرچ کرتے ہیں اور اللہ اور آخرت پر حقیقی ایمان نہیں رکھتے۔

4:37
وہ لوگ جو خود بخل کرتے ہیں۔ دوسروں کو بھی بخل کی ترغیب دیتے ہیں۔ اور اللہ کی عطا کی ہوئی نعمتوں کو چھپاتے ہیں۔

3:130
وہ لوگ جو سود کھاتے ہیں۔

3:32
وہ لوگ جنہیں کہا جائے کہ اللہ اور اس کے رسول کی اطاعت کرو مگر وہ منہ موڑ لیں۔

منافقین کے بارے میں

2:19
وہ لوگ جنہوں نے ہدایت کے بدلے گمراہی خرید لی۔ اور ایمان کا انکار کیا۔

وہ تمام لوگ جن میں کفر کی صفات پائی جائیں

2:24
وہ شک کرنے والے جنہوں نے کہا کہ اللہ نے کوئی وحی نازل نہیں کی۔ ان سے کہا گیا کہ اگر تم اپنے دعوے میں سچے ہو تو قرآن جیسی ایک سورت بنا کر لاؤ اور اپنے گواہ بھی پیش کرو۔ اگر ایسا نہ کر سکو تو اس انجام سے ڈرو جو کافروں کے لیے تیار کیا گیا ہے۔

2:191
وہ لوگ جنہوں نے مسلمانوں کو ان کے گھروں سے نکالا اور ظلم و فساد برپا کیا۔

2:250
جالوت اور اس کی فوج جو حضرت داؤد علیہ السلام کے مقابلے میں تھی۔

2:286 اور 3:147
وہ لوگ جو ایمان کے خلاف جنگ کرتے ہیں یا اس کی مخالفت کرتے ہیں۔

3:141
وہ لوگ جو مسلمانوں کے ساتھ حالت جنگ میں تھے۔

4:140

وہ لوگ جو اللہ کی آیات کا انکار کرتے ہیں اور ان کا مذاق اڑاتے ہیں۔

4:150
وہ لوگ جو اللہ اور اس کے رسولوں کا انکار کرتے ہیں اور اللہ اور اس کے رسولوں کے درمیان تفریق کرنا چاہتے ہیں۔ وہ کہتے ہیں کہ ہم بعض رسولوں پر ایمان رکھتے ہیں اور بعض کا انکار کرتے ہیں۔ اور وہ اس کے درمیان کوئی راستہ اختیار کرنا چاہتے ہیں۔

5:44
جو لوگ اللہ کے نازل کردہ حکم کے مطابق فیصلہ نہیں کرتے وہی کافر ہیں۔

7:37
وہ شخص جو اللہ پر جھوٹ باندھے یا اس کی آیات کو جھٹلائے۔

7:45
وہ لوگ جو اللہ کے راستے سے لوگوں کو روکتے ہیں اور اس میں کجی پیدا کرنا چاہتے ہیں۔

ابلیس یا شیطان

2:34
ابلیس جس نے اللہ کے حکم کی نافرمانی کی اور آدم علیہ السلام کو سجدہ کرنے سے انکار کر دیا۔

اہل کتاب میں سے وہ لوگ جنہیں کافر کہا گیا

2:89
وہ لوگ جنہوں نے قرآن کو اللہ کی کتاب ہونے کے باوجود ماننے سے انکار کیا حالانکہ یہ ایسی کتاب ہے جو ان کے پاس موجود کتابوں کی تصدیق کرتی ہے۔ انہوں نے محض حسد کی بنا پر اس کا انکار کیا کہ اللہ نے اپنے فضل سے جسے چاہا وحی عطا کر دی۔

4:161
انہوں نے سود لیا حالانکہ انہیں اس سے منع کیا گیا تھا۔ اور لوگوں کا مال ناجائز طریقے سے کھاتے رہے۔

وہ لوگ جو کافر نہیں ہیں

3:113
سب اہل کتاب ایک جیسے نہیں ہیں۔ ان میں ایک جماعت ایسی بھی ہے جو حق پر قائم ہے۔ وہ رات کے وقت اللہ کی آیات کی تلاوت کرتی ہے اور سجدہ کرتی ہے۔

3:114
وہ اللہ اور یوم آخرت پر ایمان رکھتے ہیں۔ نیکی کا حکم دیتے ہیں۔ برائی سے روکتے ہیں۔ اور نیک اعمال میں ایک دوسرے سے آگے بڑھنے کی کوشش کرتے ہیں۔ یہی لوگ صالحین میں شامل ہیں۔

3:115
وہ جو بھی نیکی کریں گے اس کی ناقدری نہیں کی جائے گی۔ اور اللہ پرہیزگاروں کو خوب جانتا ہے۔

3:199
یقیناً اہل کتاب میں ایسے لوگ بھی ہیں جو اللہ پر ایمان رکھتے ہیں۔ اس کتاب پر بھی ایمان رکھتے ہیں جو تم پر نازل ہوئی اور ان کتابوں پر بھی جو ان پر نازل ہوئیں۔ وہ اللہ کے سامنے عاجزی اختیار کرتے ہیں۔ اللہ کی آیات کو معمولی قیمت پر فروخت نہیں کرتے۔ ان کے لیے ان کے رب کے پاس اجر ہے۔ اور اللہ جلد حساب لینے والا ہے۔

4:162
لیکن ان میں سے جو علم میں پختہ ہیں اور ایمان والے ہیں وہ اس وحی پر ایمان رکھتے ہیں جو آپ پر نازل کی گئی اور اس پر بھی جو آپ سے پہلے نازل کی گئی۔ اور جو نماز قائم کرتے ہیں۔ زکوٰۃ دیتے ہیں۔ اللہ اور یوم آخرت پر ایمان رکھتے ہیں۔ ان سب کو ہم بہت بڑا اجر عطا کریں گے۔

5:69
جو لوگ ایمان لائے۔ اور جو یہودی ہیں۔ اور صابی۔ اور عیسائی۔ ان میں سے جو بھی اللہ اور یوم آخرت پر ایمان لائے اور نیک عمل کرے اس پر نہ کوئی خوف ہوگا اور نہ وہ غمگین ہوگا۔

10:40
ان لوگوں میں کچھ ایسے ہیں جو اس قرآن پر ایمان لے آئیں گے اور کچھ ایسے ہیں جو ایمان نہیں لائیں گے۔ اور آپ کا رب فساد کرنے والوں کو خوب جانتا ہے۔

مشرکین یا شرک کرنے والے

اگرچہ قرآن مجید میں شرک کو ناقابل معافی گناہ قرار دیا گیا ہے اور متعدد آیات میں اس بات پر زور دیا گیا ہے کہ تمام انبیاء علیہم السلام شرک سے پاک تھے، لیکن قرآن میں کسی بھی قوم یا مذہب کے ماننے والوں، خواہ وہ یہودی ہوں، عیسائی ہوں یا مشرک، کے خلاف کوئی حکم صرف ان کے مذہبی تعلق کی بنیاد پر نہیں دیا گیا۔ جب تک کہ وہ کافر نہ ہوں یا کفر کے اعمال میں مبتلا نہ ہوں۔

2:105

اہل کتاب میں سے وہ لوگ جنہوں نے کفر کیا اور مشرک یہ ہرگز نہیں چاہتے کہ تمہارے رب کی طرف سے تم پر کوئی بھلائی نازل ہو۔ لیکن اللہ اپنے فضل کے لیے جسے چاہتا ہے منتخب کر لیتا ہے۔ اور اللہ بہت بڑے فضل والا ہے۔

98:1

اہل کتاب میں سے جن لوگوں نے کفر کیا اور مشرک اس وقت تک اپنی روش سے ہٹنے والے نہ تھے جب تک ان کے پاس کھلی دلیل نہ آ گئی۔

98:6

بے شک اہل کتاب میں سے جن لوگوں نے کفر کیا اور مشرک وہ جہنم کی آگ میں ہوں گے۔ وہ ہمیشہ اس میں رہیں گے۔ یہی لوگ بدترین مخلوق ہیں۔ یہ آیات بالکل واضح کرتی ہیں کہ قرآن مجید کے مطابق تمام مشرک۔ تمام یہودی۔ تمام عیسائی یا تمام غیر مسلم کافر نہیں ہیں۔ اسی لیے قرآن نے ہر جگہ اہل کتاب میں سے کفر کرنے والے اور مشرکوں میں سے کفر کرنے والے کی تخصیص کی ہے۔

خلاصہ یہ ہے کہ قرآن مجید کسی شخص کو اس کے مذہب یا عقیدے کی بنیاد پر کافر قرار نہیں دیتا بلکہ اس کی بعض مخصوص صفات اور اعمال کی بنیاد پر کافر قرار دیتا ہے۔ وہ شخص جو دین کا فعال دشمن بن جائے۔ اللہ کی راہ سے لوگوں کو روکے۔ اہل ایمان پر ظلم و ستم کرے۔ لوگوں کو ان کے دین پر عمل کرنے سے روکے۔ خیراتی اور انسانی فلاح کے کاموں کی مخالفت کرے۔ سود جیسے ناجائز اعمال میں ملوث ہو یا ان کی حمایت کرے۔ ایسے اعمال قرآن کی اصطلاح میں کفر کی صف میں آتے ہیں۔اس اعتبار سے کافر مسلمان بھی ہو سکتا ہے۔ یہودی بھی۔ عیسائی بھی۔ مشرک بھی۔ ملحد بھی۔ کیونکہ کافر کی اصطلاح قرآن میں کسی خاص مذہبی شناخت کے لیے نہیں بلکہ مخصوص طرز عمل اور کردار کے لیے استعمال ہوئی ہے۔

اسلام اور تکثیریت /بشکریہ نیو ایج اسلام / اصل مضمون نیو ایج اسلام پر 13 فروری 2015 کو شائع ہوا۔