دولت رحمان - گوہاٹی

 مشرق وسطیٰ میں ایران کی صورتحال اور خطے میں بڑھتی ہوئی بے یقینی نے ہندوستان کی چائے برآمدات پر گہرے اثرات ڈالنے شروع کر دیے ہیں اور آسام کی چائے صنعت کو خدشہ ہے کہ اگر حالات مزید بگڑے تو اسے بھاری نقصان اٹھانا پڑ سکتا ہے۔

صنعتی ذرائع کے مطابق آسام کی تقریباً 50 فیصد چائے ایران میں استعمال ہوتی ہے جو ریاست کی اس نمایاں پیداوار کے لیے سب سے اہم بیرونی منڈیوں میں شمار ہوتی ہے۔ اپنی مضبوط خوشبو تیز رنگت اور کڑک ذائقے کی وجہ سے آسام کی چائے ایرانی صارفین میں بے حد مقبول ہے۔

برآمد کنندگان کا کہنا ہے کہ جنگ جیسی صورتحال کے باعث اگر تجارتی تعلقات یا بحری راستوں میں خلل پیدا ہوا تو ترسیل شدید متاثر ہو سکتی ہے۔ بڑھتی ہوئی جغرافیائی سیاسی کشیدگی کے سبب ادائیگیوں لاجسٹکس اور انشورنس سے متعلق خدشات نے پہلے ہی کاروباری اعتماد کو متاثر کرنا شروع کر دیا ہے۔

Guwahati Tea Auction Centre کے خریداروں کی انجمن کے ایک عہدیدار نے خدشہ ظاہر کیا کہ اگر موجودہ صورتحال ایک ہفتے سے زیادہ برقرار رہی تو ایرانی خریداروں کی طلب کم ہو جائے گی اور قیمتوں میں بھی کمی آئے گی۔ انہوں نے کہا کہ اگر متبادل خریدار نہ ملے تو آسام کی چائے صنعت کو بڑا نقصان ہوگا۔

یہ تشویش ایسے وقت سامنے آئی ہے جب 2025 میں ہندوستان کی چائے برآمدات 280 ملین کلوگرام کی ریکارڈ سطح تک پہنچ گئی تھیں۔ ہندوستان کی سب سے بڑی چائے پیدا کرنے والی ریاست ہونے کے ناطے آسام نے اس کامیابی میں نمایاں کردار ادا کیا۔ آسام ملک کی مجموعی چائے پیداوار کا 50 فیصد سے زیادہ حصہ فراہم کرتا ہے اور سالانہ تقریباً 650 سے 700 ملین کلوگرام چائے پیدا ہوتی ہے۔

تاجروں کا کہنا ہے کہ اگر تنازع مزید بڑھا تو ایران کو آسام سمیت دیگر ممالک سے چائے کی درآمد معطل کرنا پڑ سکتی ہے۔ بینکاری پابندیاں پابندیوں سے متعلق پیچیدگیاں اور بندرگاہوں کی ممکنہ بندش تجارتی لین دین کو مزید مشکل بنا سکتی ہیں۔

After the #ViksitBharatSankalpYatra, dedicated Assam State BJP President @Bhabesh_KalitaR ji managed "Amazing Assam Tea" on the Highway!
সতেজ অসম চাহৰ লগত একো তুলনা নহয়! pic.twitter.com/xF4T4ONkrQ

— Kiren Rijiju (@KirenRijiju) December 18, 2023

صنعت سے وابستہ ایک ذریعے کے مطابق قلیل مدتی تعطل بھی بڑے مالی نقصانات کا سبب بن سکتا ہے کیونکہ معیار برقرار رکھنے اور گودام کے اخراجات کے اعتبار سے چائے حساس جنس ہے۔

برآمد کنندگان کو خدشہ ہے کہ ایران جیسے بڑے خریدار میں عدم استحکام گزشتہ سال حاصل کی گئی رفتار کو متاثر کر سکتا ہے۔ طویل تعطل کی صورت میں مقامی منڈیوں میں اضافی ذخیرہ جمع ہو سکتا ہے جس سے قیمتیں گریں گی اور بالآخر چائے کے کاشتکار متاثر ہوں گے۔

مشرق وسطیٰ کے ممالک میں آسام کی چائے کی طلب مسلسل بڑھ رہی ہے جہاں مضبوط سیاہ چائے ایک اہم مشروب سمجھی جاتی ہے۔ تاہم خطے میں بڑھتی کشیدگی کے باعث برآمد کنندگان مستقبل کے تجارتی امکانات کے بارے میں محتاط رویہ اختیار کیے ہوئے ہیں۔