واشنگٹن: امریکی صدر ڈونالڈ ٹرمپ نے کہا کہ بدھ کے روز وائٹ ہاؤس کے قریب نیشنل گارڈ کے دو اہلکاروں پر ہونے والا "بہیمانہ حملہ" اس بات کا ثبوت ہے کہ "کمزور ہجرت (امیگریشن) پالیسیاں ہمارے ملک کے سامنے سب سے بڑا قومی سلامتی کا خطرہ ہیں۔

ٹرمپ نے کہا کہ کوئی بھی ملک اپنی بقا کے لیے ایسے خطرے کو برداشت نہیں کر سکتا۔ سوشل میڈیا پر جاری ایک ویڈیو میں ٹرمپ نے یہ بات کہی۔ ان کا یہ بیان اس بات کو اجاگر کرتا ہے کہ وہ ملک کے امیگریشن نظام میں تبدیلی لانے اور پہلے سے موجود تارکینِ وطن کی مزید سخت جانچ کا ارادہ رکھتے ہیں۔

امریکہ میں پہلے ہی جارحانہ انداز میں بے دخلی کی کارروائیاں جاری ہیں، اور اس فائرنگ کے واقعے پر ان کے سخت ردِعمل سے یہ اشارہ ملتا ہے کہ وہ اس مسئلے سے اپنی توجہ نہیں ہٹائیں گے۔ ٹرمپ اور دو قانون نافذ کرنے والے اہلکاروں کے مطابق فائرنگ کا مشتبہ حملہ آور ایک افغان شہری سمجھا جا رہا ہے۔ وہ 2021 میں "آپریشن الائز ویلکم" کے تحت امریکہ پہنچا تھا۔

یہ بائیڈن انتظامیہ کا پروگرام تھا، جس کے تحت افغانستان سے امریکی فوج کے انخلا کے بعد وہاں سے نکالے گئے ہزاروں افغان شہریوں کو امریکہ میں بسایا گیا تھا۔ اس اقدام کے تحت تقریباً 76 ہزار افراد امریکہ آئے، جن میں سے بہت سے نے امریکی فوجیوں اور سفارتی اہلکاروں کے ساتھ مترجم یا دُبھاشیے کے طور پر کام کیا تھا۔ مگر ان کے پس منظر کی جانچ میں خامیوں کو لے کر ٹرمپ، ان کے ساتھیوں، کانگریس کے ریپبلکن ارکان اور کچھ سرکاری نگرانی اداروں نے اس پالیسی پر سخت تنقید کی تھی، جبکہ حامیوں کا کہنا تھا کہ اس نے طالبان کے انتقام کے خطرے سے دوچار لوگوں کی جان بچائی۔

اپنی تقریر کے دوران، ٹرمپ نے منی سوٹا کا بھی ذکر کیا اور کہا کہ "سومالیہ کے لاکھوں لوگ کبھی عظیم ریاست رہی منی سوٹا کو تباہ کر رہے ہیں۔ منی سوٹا میں تقریباً 87 ہزار لوگوں پر مشتمل صومالی کمیونٹی آباد ہے، جن میں سے بہت سے وہاں پناہ گزین کے طور پر پہنچے تھے۔ اگرچہ ان تارکینِ وطن کا اس واقعے سے کوئی تعلق نہیں ہے، لیکن ان کا ذکر اس بات کا اشارہ ہے کہ ٹرمپ امیگریشن کے مسئلے پر سخت موقف اختیار کیے ہوئے ہیں۔

صدر نے کہا کہ وہ ہر اس شخص کو ملک سے نکال دینا چاہتے ہیں "جو یہاں کا نہیں ہے یا جو ہمارے ملک کے لیے فائدہ مند نہیں ہے۔" ٹرمپ نے کہا، اگر وہ ہمارے ملک سے محبت نہیں کر سکتے تو ہمیں ان کی ضرورت نہیں ہے۔

نائب صدر جے ڈی وینس نے سوشل میڈیا پر سابق صدر بائیڈن کی تنقید کرتے ہوئے کہا کہ انہوں نے افغان پناہ گزینوں کے لیے دروازے کھول دیے جبکہ انہیں ہمارے ملک میں ہونا ہی نہیں چاہیے تھا۔ انہوں نے کہا، کارپوریٹ میڈیا کی کچھ آوازیں کہتی رہی ہیں کہ ہماری امیگریشن پالیسیاں بہت سخت ہیں۔ آج کی رات اس بات کی یاد دہانی ہے کہ وہ کیوں غلط ہیں۔