پرمود جوشی

جنوبی ایشیا کا یہ المیہ ہے کہ جب دنیا کے دیگر ممالک، جن میں بھارت بھی شامل ہے، ڈونلڈ ٹرمپ کی جارحانہ اقتصادی پالیسیوں کے تناظر میں اپنی پالیسیاں مرتب کرنے میں مصروف ہیں، ہمیں ایک جنگی صورت حال سے نبرد آزما ہونا پڑ رہا ہے۔اس لڑائی کی تفہیم کے لیے ہمیں دو واقعات کو پس منظر میں رکھ کر دیکھنا ہوگا۔ پہلا، ہفتے کے روز جنگ بندی کا اعلان بھارت یا پاکستان کے کسی رہنما نے نہیں بلکہ خود ڈونلڈ ٹرمپ نے کیا۔ دوسرا، حالیہ دنوں میں بھارت اور برطانیہ کے درمیان آزاد تجارت کا معاہدہ ہوا، جس پر خاطر خواہ توجہ نہیں دی گئی۔

اس کے علاوہ حالیہ جغرافیائی سیاست میں بعض اہم موڑ آئے ہیں، جن کے اثرات بھارت پر بھی مرتب ہوں گے۔ اطلاعات کے مطابق ترکی اور چین نے یک طرفہ طور پر پاکستان کی حمایت کی ہے۔پاکستان نے دہشت گردی کو ایک غیر اعلانیہ پالیسی کے طور پر اپنایا ہے، جبکہ دوسری جانب، دہشت گردانہ حملوں کی صورت میں پاکستان کے اندر گھس کر کارروائی کرنے کے فیصلے کے ذریعے مودی حکومت نے ایک نئے سیکیورٹی ڈاکٹرائن کا واضح اعلان کیا ہے۔ پاکستان کو اب بے گناہوں کے قتل عام اور دہشت گردی کے فروغ کی اجازت نہیں دی جائے گی۔

ٹرمپ کا اعلان

ٹرمپ نے اپنے سوشل میڈیا پلیٹ فارم پر اعلان کیا کہ بھارت اور پاکستان نے "مکمل اور فوری جنگ بندی" پر اتفاق کر لیا ہے۔ انہوں نے حسبِ عادت یا شاید جلد بازی میں یہ اعلان کیا۔ وہ ثابت کرنا چاہتے تھے کہ وہ جنگیں روکنے کی صلاحیت رکھتے ہیں۔اس میں کوئی شبہ نہیں کہ اس بحران کو ٹالنے میں امریکہ نے اہم کردار ادا کیا۔ تاہم، سوال یہ پیدا ہوا کہ کیا امریکہ اب بھارت اور پاکستان کے درمیان ثالثی کرے گا؟ سچ یہ ہے کہ امریکہ ماضی میں بھی اس کی متعدد کوششیں کر چکا ہے۔ٹرمپ نے اپنے سابقہ دورِ صدارت میں کئی بار ثالثی کی پیشکش کی تھی، لیکن بھارت نے مؤدبانہ طور پر انہیں واضح کر دیا تھا کہ ایسا ممکن نہیں۔ نہ صرف مستقبل میں، بلکہ ماضی میں بھی بھارت کی کسی حکومت نے ایسی کسی پیشکش کو قبول نہیں کیا۔

امریکی دوغلا پن

امریکہ ایک دوراہے پر کھڑا ہے۔ ایک طرف وہ بھارت سے تعلقات بہتر کر رہا ہے، تو دوسری جانب، اپنے مفادات کے پیش نظر پاکستان کی کوتاہیوں سے چشم پوشی کرتا ہے۔ پاکستان بھی ایک جانب امریکہ کو دوست مانتا ہے، تو دوسری طرف چین کو اپنا آقا۔ حالیہ برسوں میں بھارت اور امریکہ کے تعلقات میں قربت ضرور بڑھی ہے، مگر بھارت کی پالیسی کسی کا تابع بننے کی نہیں۔

امریکہ کا تاریخی کردار

1947 سے اب تک بھارت-پاکستان تعلقات میں امریکی کردار میں کئی تبدیلیاں آئی ہیں۔ ابتدا میں امریکہ نے پاکستان کا ساتھ دیا۔ 1947-48 کے پہلے کشمیر جنگ میں امریکہ نے اقوامِ متحدہ کے توسط سے ثالثی کی حمایت کی، جس کے نتیجے میں لائن آف کنٹرول وجود میں آئی۔1950 کی دہائی میں امریکہ نے پاکستان کو سرد جنگ کا حلیف بنایا۔ 1954 میں اسے سیٹو اور سینٹو جیسے فوجی اتحادوں میں شامل کیا گیا، اور ہتھیار و اقتصادی امداد فراہم کی گئی۔ یہ سب بھارت کے خلاف توازن قائم کرنے کی حکمت عملی تھی۔بھارت نے عدمِ وابستگی کی پالیسی اپنائی، جس سے امریکہ کے ساتھ تعلقات میں کشیدگی رہی۔ اس دور میں امریکہ نے پاکستان کو ترجیح دی تاکہ جنوبی ایشیا میں سوویت اثرات کو روکا جا سکے۔

سال1971 کی جنگ

1971 کی جنگ میں امریکہ نے کھلم کھلا پاکستان کی حمایت کی۔ صدر نکسن نے ساتویں بیڑے کا بحری جہاز یو ایس ایس انٹرپرائز خلیج بنگال میں روانہ کیا، اور اقوامِ متحدہ میں جنگ بندی کی قرارداد پیش کی۔ یہ بھارت پر دباؤ ڈالنے کی کوشش تھی۔بھارت کو اس وقت سوویت یونین کی حمایت حاصل تھی، جس نے امریکی اثر کو محدود کیا۔ اس جنگ میں بھارت کی فتح اور بنگلہ دیش کا قیام امریکہ کے لیے سفارتی دھچکا ثابت ہوا۔اس عرصے میں امریکہ کا جھکاؤ واضح طور پر پاکستان کی طرف تھا، لیکن بھارت کی فوجی اور سفارتی کامیابی نے امریکہ کو مجبور کیا کہ وہ بھارت کی طاقت کو سنجیدگی سے لے۔

سال 80 اور 90 کی دہائیاں

1979 میں سوویت یونین کے افغانستان پر حملے کے بعد امریکہ نے پاکستان کو اپنے اہم اتحادی کے طور پر مضبوط کیا۔ پاکستان کو اربوں ڈالر کی فوجی و اقتصادی امداد دی گئی، جس کا استعمال بھارت کے خلاف ہوا 

سال1998 میں بھارت اور پاکستان کے ایٹمی تجربات نے جنوبی ایشیا کو عالمی توجہ کا مرکز بنا دیا۔ امریکہ نے دونوں ملکوں پر پابندیاں عائد کیں، لیکن بھارت کی ابھرتی ہوئی معیشت اور ٹیکنالوجی میں ترقی نے امریکہ کو بھارت سے تعلقات بہتر بنانے پر آمادہ کیا

سال 1999 کے کارگل جنگ میں امریکہ نے پاکستان پر دباؤ ڈالا کہ وہ اپنی فوج اور دہشت گردوں کو واپس بلائے۔ صدر کلنٹن نے بھارت کی حمایت میں واضح مؤقف اختیار کیا، جو ایک اہم تبدیلی تھی، حالانکہ 1993 میں ان کی انتظامیہ نے کشمیر کے ’الحاق نامہ‘ کو تسلیم کرنے سے انکار کیا تھا۔

دہشت گردی کے خلاف موقف

امریکہ پر حملے کے بعد شروع ہونے والی دہشت گردی کے خلاف جن اور بھارت کی اقتصادی ترقی نے امریکہ کی پالیسی کو متاثر کیا۔ 2001 میں بھارتی پارلیمنٹ پر حملے اور 2008 میں ممبئی حملوں کے بعد امریکہ نے بھارت کے ساتھ انسدادِ دہشت گردی تعاون بڑھایا، لیکن پاکستان پر دباؤ محدود ہی رہا۔اب امریکہ بھارت کو انڈو-پیسیفک خطے میں چین کے خلاف ایک اہم شراکت دار کے طور پر دیکھتا ہے، لیکن پاکستان پر کھلے الفاظ میں تنقید کرنے سے اب بھی گریز کرتا ہے۔ وہ دونوں ملکوں کے درمیان توازن قائم رکھنے کی کوشش میں ہے۔

عالمی کردار

فی الوقت سب سے بڑا مسئلہ ’آپریشن سندور‘ کی وجہ سے پیدا ہونے والی صورت حال ہے۔ مبصرین کا ماننا ہے کہ پسِ پردہ علاقائی طاقتوں کے ساتھ مل کر امریکی ثالثوں نے ایٹمی ہتھیار رکھنے والی طاقتوں کو پیچھے ہٹنے پر مجبور کرنے میں اہم کردار ادا کیا۔

تین روزہ جنگ کے دوران یہ بات واضح ہو گئی کہ کئی ممالک اس لڑائی کو رکوانے کی کوشش میں تھے، لیکن کم از کم تین ممالک — امریکہ، برطانیہ اور سعودی عرب — سب سے آگے تھے۔ امریکی وزیر خارجہ مارکو روبیو کا 9 مئی  کو پاکستانی آرمی چیف عاصم منیر سے کیا گیا فون کال "شاید فیصلہ کن لمحہ" تھا۔

بھارتی نقطۂ نظر

اس لڑائی کے دو فریق ہیں — بھارت اور پاکستان۔ سوال یہ ہے کہ کیا امریکہ نے دونوں فریقوں کی بات کو سمجھا ہے؟ بھارت کا ’آپریشن سندور‘ پہلگام کے قتل عام کے جواب میں ہے۔ اس کا ہدف دہشت گردی ہے۔

بھارتی مبصرین کا ماننا ہے کہ امریکی میڈیا اور سیاست میں "دہشت گردی" کو بھارتی زاویے سے نہیں دیکھا جاتا۔ اسے اکثر "ہندو-مسلم" تنازع کے طور پر پیش کیا جاتا ہے۔ اس کے علاوہ، کشمیر مسئلے کے جو حل امریکی حلقوں میں تجویز کیے جاتے ہیں، وہ بھارت کے لیے ناقابلِ قبول ہیں۔

ایٹمی بلیک میلنگ

پاکستانی ماہرین کا کہنا ہے کہ جب حالات کشیدہ ہوئے تو پاکستان نے نیشنل کمانڈ اتھارٹی (این سی اے) کی میٹنگ بلانے کا اشارہ دے کر اپنی ایٹمی صلاحیت کی یاد دہانی کرائی۔ اس اتھارٹی کو پاکستان کے ایٹمی ہتھیاروں پر کنٹرول حاصل ہے۔

اس کا مطلب یہ ہے کہ پاکستان ایٹمی بلیک میلنگ کر رہا تھا۔ بھارت اس دباؤ میں نہیں آیا، اور جنگ بندی کے باوجود واضح کر دیا کہ اگر پاکستان نے کوئی جرأت کی، تو اسے بھرپور جواب دیا جائے گا۔ یہی وجہ ہے کہ موجودہ امن کو حتمی نہیں مانا جا سکتا۔

بھارت بیدار ہو چکا ہے

بھارت نے دو ٹوک کہا ہے کہ ہم دہشت گرد ٹھکانوں پر حملہ کریں گے، چاہے وہ کہیں بھی ہوں۔ لاہور سے سرگودھا، چکوال سے جیکب آباد تک ایک درجن سے زائد ٹھکانوں پر حملے کر کے بھارت نے اپنی طاقت کا اظہار بھی کر دیا ہے۔

بھارت نے سندھ طاس معاہدے کو معطل رکھتے ہوئے اپنے اختیارات کو وسعت دی ہے، اور یہ بھی اعلان کیا ہے کہ اب ہر دہشت گرد حملہ "جنگی کارروائی" تصور کیا جائے گا، اور اس کا جواب فوج دے گی۔

سال 2014 سے اب تک بھارت نے کم از کم پانچ بڑے فوجی بحران دیکھے ہیں — پاکستان کے ساتھ 2016، 2019 اور اب، جبکہ چین کے ساتھ 2017 اور 2020 میں۔ اس وقت ملک کے مختلف طبقات، برادریوں اور سیاسی جماعتوں میں جو اتحاد دکھائی دے رہا ہے، وہی بھارت کی اصل طاقت ہے۔

بھارت کے عالمی دوست، چاہے وہ واشنگٹن میں ہوں یا ماسکو، برلن یا ریاض میں، یقیناً جانتے ہیں کہ پاکستان کے ساتھ کسی بھی تعلق کی شرط پر بھارت کا مؤقف واضح ہے — پہلگام کے قومی سانحے کے بعد بھارت بیدار ہو چکا ہے۔

برطانیہ کے ساتھ ایف ٹی اے

ایک طرف آپریشن سندور کی فضاء بن رہی تھی، تو دوسری جانب 6 مئی کو بھارت اور برطانیہ نے ایک تاریخی آزاد تجارت کا معاہدہ (FTA) کیا، جسے وزیراعظم نریندر مودی نے ایک "تاریخی سنگِ میل" قرار دیا۔ یہ معاہدہ بھارت کو صنعتی اشیاء تک صفر ڈیوٹی رسائی فراہم کرے گا۔

اس کے علاوہ، 99.3 فیصد حیوانی مصنوعات، 99.8 فیصد نباتاتی/تیل مصنوعات، اور 99.7 فیصد عمل شدہ خوراک پر درآمدی محصولات ختم کیے جائیں گے۔ اس وقت، برطانیہ چین (12 فیصد، 99 ارب ڈالر)، امریکہ (11 فیصد، 92 ارب ڈالر) اور جرمنی (9 فیصد، 76.2 ارب ڈالر) سے 815.5 ارب ڈالر کی اشیاء درآمد کرتا ہے۔

بھارت، برطانیہ کا 12واں سب سے بڑا تجارتی شراکت دار ہے، لیکن اس کا حصہ صرف 1.8 فیصد (15.3 ارب ڈالر) ہے۔ اس معاہدے کے بعد حالات تیزی سے بدلیں گے۔ اب یہ سوچنے کا وقت ہے کہ ہم اس چھلانگ کو کس طرح حقیقت میں بدلیں۔

اسی طرح کا ایک معاہدہ اس سال امریکہ سے بھی متوقع ہے۔ بدقسمتی یہ ہے کہ بھارت اور پاکستان کے درمیان کسی اقتصادی معاہدے کے آثار نہیں، حالانکہ بہترین امکانات ہمارے آس پاس ہی ہیں۔

(مصنف روزنامہ ’ہندوستان‘ کے سابق مدیر ہیں)