عبداللہ منصور
بھارت ایک کثیرالثقافتی ملک ہے جہاں مذہب، زبان، تہذیب، رسم و رواج اور سماجی ڈھانچے مختلف صورتوں میں نظر آتے ہیں۔ انہی گوناگونیوں میں سب سے گہرا اور پیچیدہ نظام ذات پات کا ہے۔ عام طور پر جب بھارت میں ذات پات کی بات کی جاتی ہے تو گفتگو ہندو سماج تک محدود رہتی ہے۔ لیکن حقیقت یہ ہے کہ ذات پات کا اثر بھارتی مسلم سماج پر بھی اتنا ہی گہرا ہے جتنا کسی اور برادری پر۔
اسلام کا بنیادی پیغام برابری، بھائی چارے اور انصاف کا ہے، مگر برصغیر کے سماجی و ثقافتی پس منظر میں اسلام قبول کرنے کے باوجود ذات پات کی تفریق مکمل طور پر ختم نہیں ہو سکی۔ یہ تفریق، اگرچہ مذہبی کتابوں میں موجود نہیں، لیکن عملی زندگی میں آج بھی مسلم سماج کے ہر حصے میں دیکھی جا سکتی ہے۔
بھارتی مسلم سماج کو مجموعی طور پر تین طبقوں میں تقسیم کیا جاتا ہے: اشراف، اجلاف اور ارذال۔
اشراف:
وہ مسلمان جو اپنے آپ کو عرب، ایرانی، ترک یا پٹھان نسل کا مانتے ہیں۔ ان میں سید، شیخ، پٹھان، مرزا وغیرہ شامل ہیں، جنہیں 'اعلیٰ ذات' تصور کیا جاتا ہے۔
اجلاف:
وہ ذاتیں جنہوں نے بھارت میں اسلام قبول کیا اور جو بنیادی طور پر ہندو دیگر پسماندہ طبقات (OBC) سے آئی تھیں، جیسے جولاہا، کنجڑا، گدی، منصوری، قصائی وغیرہ۔
ارذال:
وہ ذاتیں جو ہندو دلت یا انتہائی پسماندہ ذاتوں سے آئیں، جیسے نائی، دھوبی، بھنگی، حلالخور وغیرہ۔
یہ تقسیم صرف نام کی نہیں بلکہ سماجی، معاشی، مذہبی اور سیاسی زندگی کے ہر شعبے میں اس کی بازگشت سنائی دیتی ہے۔ اسلام میں ذات پات کی کوئی گنجائش نہیں، مگر بھارتی سماج کی جڑوں میں موجود ذات پات نے مسلم سماج کو بھی اپنے شکنجے میں جکڑ رکھا ہے۔
مساجد، مدارس، وقف بورڈز، مذہبی تنظیموں حتیٰ کہ قبرستانوں تک میں ذات کی بنیاد پر امتیاز روا رکھا جاتا ہے۔ پسماندہ مسلمانوں کو اکثر دینی اور سماجی قیادت سے دور رکھا جاتا ہے اور ان کے ساتھ رویے میں امتیاز برتا جاتا ہے۔
یہ ذات پات کی تفریق صرف پہچان تک محدود نہیں۔ اشراف طبقے نے طویل عرصے تک مساجد، مدارس، وقف بورڈز، سیاسی پارٹیوں اور سماجی پلیٹ فارمز پر اپنا تسلط برقرار رکھا ہے۔
جبکہ پسماندہ طبقہ - جس میں پچھڑی اور دلت ذاتیں شامل ہیں - مسلسل حاشیے پر رہا ہے۔ اسلامی تعلیمی اداروں، درگاہوں اور مساجد میں پسماندہ اماموں اور اساتذہ کو شاذ و نادر ہی کوئی اہم مقام دیا جاتا ہے۔ کئی جگہوں پر دلت مسلمانوں کو قبرستانوں میں دفنانے تک کی اجازت نہیں دی جاتی۔ یہ سب کچھ سماجی انصاف کے جذبے کے منافی ہے اور مسلم سماج کے اندر گہرے زخم چھوڑتا ہے۔
سال2023 میں بہار حکومت کی طرف سے کرائی گئی ذات پات پر مبنی مردم شماری نے پہلی بار مسلم سماج کے اندر موجود ذات پات کی گوناگونی اور عدم مساوات کو سرکاری دستاویزات میں درج کیا۔ اس رپورٹ کے مطابق ریاست کی کل آبادی کا 17.7 فیصد حصہ مسلم کمیونٹی پر مشتمل ہے۔ اس آبادی کو تین اہم زمروں میں تقسیم کیا گیا:
فاروَڈ مسلمان (اشراف): 4.80 فیصد
پچھڑا طبقہ (BC): 2.03فیصد
انتہائی پچھڑا طبقہ (EBC): 10.58فیصد
ان اعداد و شمار سے واضح ہوتا ہے کہ مسلم سماج میں بھی وہی سماجی عدم مساوات موجود ہے جو بھارتی سماج کے دیگر حصوں میں ہے۔ سب سے اہم بات یہ سامنے آئی کہ پسماندہ (او بی سی ، ای بی سی ، ایس سی ، ایس ٹی ) مسلمانوں کی تعداد 85 فیصد سے زیادہ ہے، جبکہ اشراف طبقہ محض 15 فیصد ہے۔
یہ اعداد و شمار سماجی انصاف کے لیے نہایت اہم ہیں۔ اس سے پتا چلتا ہے کہ مسلم سماج کے اندر بھی ایک بہت بڑا طبقہ ایسا ہے جو مسلسل محرومی اور حاشیے کا شکار رہا ہے۔
سید – 0.2279فیصد
شیخ – 3.8217فیصد
پٹھان (خان) – 0.7548فیصد
پچھڑا طبقہ ( بیک ورڈ کلاس – بی سی ) مسلمان – 2.0321فیصد :
مادریہ – 0.0663فیصد
نلبند – 0.0091فیصد
سورجاپوری مسلمان (صرف وہ جو شیخ، سید، ملک، منگول اور پٹھان نہیں ہیں) – 1.8713فیصد
ملک – 0.0854فیصد
انتہائی پچھڑا طبقہ ( بے انتہا بیک ورڈ کلاس – ای بی سی ) مسلمان – 10.5843فیصد :
چیک – 0.0386فیصد
قصاب (کسائی) – 0.1024فیصد
دفالی – 0.056فیصد
دھنیا – 1.4291فیصد
نٹ – 0.0471فیصد
پماریا – 0.0496فیصد
بھٹیارہ – 0.0209فیصد
بھات – 0.0681فیصد
مہتر، لال بیگیا، حلالخور، بھنگی – 0.0535فیصد
میریاسین – 0.0118فیصد
مداری – 0.0089فیصد
میر شکار – 0.051فیصد
سائیں/فقیر/دیوان/مدار – 0.5073فیصد
مومن/جولاہا/انصاری – 3.545فیصد
چوڑیہار – 0.159فیصد
رائن/کنجڑا – 1.3988فیصد
ٹھاکرائی – 0.1128فیصد
شیرشاہبادی – 0.9965فیصد
بخو – 0.0282فیصد
ادریسی/درزی – 0.2522فیصد
سیکل گرھ/سکلیگر – 0.0145فیصد
رنگریج – 0.0332فیصد
موکری – 0.0432فیصد
اینٹ فروش/گدھیری/اینٹپاج ابراہیمی – 0.0072فیصد
کلہیا – 0.9591فیصد
جاٹ – 0.0344فیصد
دھوبی – 0.0334فیصد
سیکھڑا – 0.3135فیصد
گدی – 0.1904فیصد
لال بیگی – 0.0021فیصد
حلالخور – 0.0058فیصد فاروَڈ مسلمان (اشراف) کی صورتحال:
فاروَڈ مسلمانوں (اشراف) کی آبادی کل مسلم آبادی کا 27.58فیصد ہے۔ اس میں بنیادی طور پر تین ذاتیں شامل ہیں:
شیخ (21.94فیصد )
پٹھان یا خان (4.25فیصد )
سید (1.29فیصد )
یہ ذاتیں روایتی طور پر اعلیٰ تصور کی جاتی ہیں اور تاریخی طور پر سماجی، مذہبی اور تعلیمی غلبہ رکھتی رہی ہیں۔
پسماندہ ذاتوں میں "اشرفی کرن
(Ashrafization)
کا رجحان بھی دیکھا گیا ہے، یعنی انہوں نے اپنے نام کے آگے اشراف ذاتوں (جیسے شیخ) کا لقب لگانا شروع کر دیا۔ یہ رجحان صرف مسلم سماج تک محدود نہیں بلکہ ہندو سماج میں بھی ایسا ہی "سنسکرتیکرن"پایا جاتا ہے۔
مثال کے طور پر، بہار میں شیخوں کی تعداد ذات پات کی مردم شماری میں نسبتا زیادہ درج ہوئی ہے، جس کی بڑی وجہ یہ ہے کہ کئی پسماندہ ذاتوں کے لوگوں نے اپنے نام کے آگے "شیخ" لگا لیا ہے۔ اس سے مردم شماری کے اعداد و شمار میں فرق آیا ہے۔
یہ صورتحال پسماندہ تحریک کے لیے ایک چیلنج ہے کیونکہ اس سے اصل پسماندہ ذاتوں کی تعداد کم دکھائی دیتی ہے۔ اس لیے ضروری ہے کہ ایک بیداری مہم چلائی جائے تاکہ زیادہ سے زیادہ لوگ اپنی اصل ذات کے ساتھ مردم شماری میں شامل ہوں، تاکہ درست اعداد و شمار سامنے آئیں اور سماجی انصاف کی کوششوں کو مضبوطی مل سکے۔
پچھڑا طبقہ (BC) مسلمان:
اس طبقے کی کل آبادی مسلم سماج میں 11.67فیصد ہے۔ اس زمرے میں چار بڑی ذاتیں شامل ہیں:
سورجاپوری مسلمان (10.75فیصد )
ملک (0.49فیصد )
مادریہ (0.38فیصد )
نلبند (0.05فیصد )
یہ وہ ذاتیں ہیں جو فاروَڈ طبقے سے نیچے ہیں لیکن انتہائی پچھڑے طبقے میں بھی نہیں آتیں۔
انتہائی پچھڑا طبقہ (ای بی سی) مسلمان
یہ طبقہ مسلم کمیونٹی کا سب سے بڑا حصہ ہے۔ اس کی کل آبادی 60.75فیصد ہے۔ اس طبقے میں 30 سے زائد ذاتیں شامل ہیں۔ جن میں اہم درج ذیل ہیں:
انصاری یا جولاہا یا مومن (20.35فیصد )
دھنیا (8.21فیصد )
رائن/کنجڑا (8.03فیصد )
شیرشاہبادی (5.72فیصد )
ادریسی/درزی (1.45فیصد )
سیکھڑا (1.80فیصد )
کلہیا (5.50فیصد )
سائیں/فقیر/دیوان/مدار (2.91فیصد )
اس کے علاوہ کئی دیگر ذاتیں ایسی ہیں جن کی حصہ داری 1فیصد سے کم ہے، جیسے قصاب، نٹ، بھات، ٹھاکرائی، دھوبی، رنگریج، گدی وغیرہ
بہار کے مسلم سماج میں ذات پات کی بنیاد پر گہری سماجی نابرابری موجود ہے، اس حقیقت کا انکشاف ان اعداد و شمار سے بخوبی ہوتا ہے۔ اگر ہم صرف اُن ذاتوں کا ذکر کریں جن کی آبادی 1فیصد سے زیادہ ہے، تو ایسی کل 6 ذاتیں ہیں:
شیخ (21.94فیصد )
انصاری (20.35فیصد )
سورجاپوری (10.75فیصد )
دھنیا (8.21فیصد )
رائن/کنجڑا (8.03فیصد )
شیرشاہبادی (5.72فیصد )
ان میں سے صرف شیخ ذات کو اشراف یا فاروَڈ طبقہ سمجھا جاتا ہے، جب کہ باقی تمام ذاتیں پسماندہ (یعنی ای بی سی یا بی سی ) زمروں میں شامل ہیں۔ب
بھارتیہ جنتا پارٹی (بی جے پی) حکومت نے پہلی مرتبہ مسلم سماج کے اندر موجود ذاتوں کی گنتی کرنے کا تاریخی فیصلہ کیا ہے۔ اس سے پہلے کی ہر مردم شماری میں مسلمانوں کو محض ایک مذہبی بلاک کے طور پر شمار کیا جاتا تھا، جس کی وجہ سے پسماندہ مسلمانوں کی اصل حالت چھپی رہتی تھی۔اب بی جے پی حکومت نے واضح کیا ہے کہ آئندہ مردم شماری میں مسلمانوں کی ذات بھی درج کی جائے گی اور پسماندہ مسلمانوں کو او بی سی کیٹیگری میں شمار کیا جائے گا۔ اس سے پسماندہ مسلمانوں کو ان کا حق اور نمائندگی ملے گی اور ان کے سماجی و اقتصادی حالات پر ٹھوس اعداد و شمار سامنے آئیں گے۔اس اقدام سے یہ حقیقت واضح ہو گی کہ مسلم سماج کوئی یکساں اکائی نہیں ہے بلکہ اس کے اندر بھی ایسے طبقاتی اور ذات پات کے تقسیم موجود ہیں جو خاص طور پر سماجی اور تعلیمی پسماندگی کا سبب بنتے ہیں۔ذات پر مبنی مردم شماری سے معلوم ہوگا کہ مسلم سماج کے کون سے طبقے واقعی زیادہ محروم ہیں، کس کو تعلیم، صحت، روزگار اور سیاسی شراکت داری میں پیچھے رکھا گیا ہے۔ یہ اعداد و شمار پالیسیوں اور اسکیموں کو زمینی حقیقتوں سے جوڑنے میں مدد کریں گے۔
پسماندہ تحریک
(Pasmanda Movement)
بھی اسی سمت میں ایک آواز ہے جو مسلم سماج کے اندر موجود ذات پات کے امتیاز کو سامنے لاتی ہے۔ اس تحریک نے ثابت کیا ہے کہ جب تک پسماندہ ذاتوں کو ان کی پہچان، نمائندگی اور حقوق نہیں دیے جاتے، اس وقت تک اسلامی مساوات اور جمہوری برابری محض تقریروں تک محدود رہ جائے گی۔
پسماندہ ڈیموکریسی کی جانب سے کیے گئے انٹرویوز میں بار بار یہ بات سامنے آئی ہے کہ مسلم سماج میں "روٹی-بیٹی" کے رشتوں میں ذات کی حد بندی آج بھی موجود ہے۔ مذہب کے نام پر برابری کا دعویٰ کرنے والے کئی تنظیمیں اور مذہبی رہنما عملی طور پر ذات برتری کو قائم رکھنے کا کام کرتے ہیں۔ذات پر مبنی مردم شماری کی سب سے بڑی رکاوٹ یہی ہے کہ جو طبقے اب تک اقتدار اور وسائل پر قابض رہے ہیں، وہ یہ نہیں چاہتے کہ حق اور حصہ داری کی اصل تصویر سامنے آئے۔
اگر مردم شماری سے یہ حقیقت عیاں ہو گئی کہ آبادی میں کون کتنی تعداد میں ہے اور کون کتنا پیچھے ہے، تو اقتدار کا توازن بدل سکتا ہے۔ یہی خوف اس عمل کو بار بار مؤخر کرنے کی وجہ بنتا ہے۔یہ تضاد اس وقت اور بھی شدید ہو جاتا ہے جب اُن رہنماؤں اور تنظیموں کو دیکھا جائے جو عوامی منچوں سے اسلام میں ذات پات کے انکار کی بات کرتے ہیں، لیکن جن کے ادارے اور عہدے مکمل طور پر اشراف غلبہ پر قائم ہوتے ہیں۔مدارس کے مہتمم، مساجد کے امام، وقف بورڈ کے صدر اور مسلم پرسنل لاء بورڈ کے رکن اکثر اونچی ذاتوں سے تعلق رکھتے ہیں۔ یہ نہ صرف سماجی انصاف کی توہین ہے بلکہ اسلام کی اس بنیادی تعلیم – "اِنَّ اَکْرَمَکُمْ عِندَ اللّٰہِ اَتْقٰکُمْ" (اللہ کے نزدیک سب سے بہتر وہ ہے جو سب سے زیادہ پرہیزگار ہے) – کی بھی خلاف ورزی ہے۔
وزیر اعظم نریندر مودی نے بھی کئی مرتبہ عوامی منچوں سے پسماندہ مسلمانوں کا ذکر کیا ہے اور اس طبقے کے ساتھ تاریخی ناانصافی کو تسلیم کیا ہے۔ بھوپال میں بوتھ سطح کے کارکنوں سے بات کرتے ہوئے انہوں نے خود اپنے ہی مذہب کے اندر مسلمانوں کے ایک طبقے کے ذریعہ جھیلے گئے تاریخی ظلم و ستم کو تسلیم کیا اور اس مسئلے پر بحث کی ضرورت پر زور دیا۔ بھارتیہ جنتا پارٹی کی قومی عاملہ کی میٹنگوں کے دوران وزیر اعظم نریندر مودی نے اپنے ہی مذہب کے دائرے میں موجود تاریخی ناانصافیوں اور پسماندہ طبقات کے ساتھ ہونے والے امتیاز کا بار بار ذکر کیا۔ انہوں نے کہا کہ موچی، بھٹیارا، جوگی، مداری، جولاہا، لوہار، تیجا، لاہری، ہلدَر جیسے مختلف پسماندہ مسلم طبقات کو نسل در نسل ناانصافی، تعصب اور تفریق کا سامنا کرنا پڑا ہے۔
مودی جی کا یہ بیان محض ایک سیاسی چال نہیں تھا بلکہ اس خاموشی کو توڑنے کی پہل تھی جو مسلم سماج کے اندر موجود ذات پات کی بنیاد پر عدم مساوات کو ڈھانپتی رہی ہے۔ یہ پیغام اُن لاکھوں مسلمانوں کے لیے تھا جو خود کو تو مسلمان مانتے ہیں لیکن جنہیں کبھی برابری کا درجہ نہیں ملا۔بی جے پی نے نہ صرف اپنے تنظیمی ڈھانچے میں پسماندہ مسلم قیادت کو جگہ دی ہے بلکہ سرکاری اسکیموں میں بھی ایسے طبقات کو ترجیح دینے کی پہل کی ہے- چاہے وہ خود روزگار اسکیم ہو، تعلیمی وظیفہ ہو یا رہائشی اسکیم۔ اتر پردیش اور بہار جیسے ریاستوں میں قصائی، درزی، جولاہا جیسے طبقات کو مقامی انتخابات میں پارٹی ٹکٹ دیے گئے، جس سے ان کی سیاسی شراکت داری بھی یقینی بن رہی ہے۔
بی جے پی کی اس پہل سے کئی حزبِ اختلاف کی جماعتوں میں تشویش پیدا ہو گئی ہے، کیونکہ وہ برسوں سے مسلم ووٹ بینک کا استعمال تو کرتی رہی ہیں مگر انہوں نے کبھی یہ تسلیم نہیں کیا کہ اس ووٹ بینک کا بڑا حصہ پسماندہ ذاتوں سے تعلق رکھتا ہے۔ سماجوادی پارٹی، راشٹریہ جنتا دل، کانگریس جیسی پارٹیاں ہمیشہ مذہب کے نام پر مسلمانوں کو جوڑنے کی سیاست کرتی رہیں، لیکن ان کی ذات پات کی شناخت اور محرومیوں پر خاموشی اختیار کی۔ یہی وجہ ہے کہ جب بی جے پی نے پسماندہ مسلمانوں کی شناخت کو تسلیم کیا اور ان کے لیے نمائندگی یقینی بنانے کی بات کی، تو پرانے سیاسی مساوات ہلنے لگے۔
مسلم سماج کے اندر تاریخی طور پر بالادست اشراف طبقہ اس تبدیلی سے بے چین ہے۔ وہ ذات پر مبنی مردم شماری اور پسماندہ تحریک کو "اسلام دشمن"، "امت میں تفرقہ ڈالنے والا" اور "ہندوتوا ایجنڈا" قرار دے کر بدنام کرنے کی کوشش کر رہا ہے۔ ان کا اصل خوف یہ ہے کہ اگر ذات پر مبنی اعداد و شمار سامنے آ گئے تو ان کی صدیوں پرانی طاقت، مذہبی رتبہ اور سماجی وقار پر سوال اٹھے گا۔ یہی طبقہ ہے جو صدیوں سے مساجد، مدارس، مذہبی ٹرسٹوں، مسلم تنظیموں اور سیاسی منچوں پر بغیر کسی رکاوٹ کے قابض رہا ہے۔
ذات کی گنتی کا مطلب یہ نہیں کہ ہم ذات پات کے نظریے کو فروغ دے رہے ہیں۔ اس کا مطلب صرف یہ ہے کہ ہم اس سچائی کو تسلیم کر رہے ہیں کہ ذات آج بھی ہمارے سماج میں ایک زندہ حقیقت ہے۔ اگر ہم اس حقیقت سے آنکھ بند رکھیں گے تو سماجی انصاف کی کوئی بھی کوشش ادھوری ہی رہے گی۔
جیسے ہم ناخواندگی، بھوک مری یا لڑکوں اور لڑکیوں کے تناسب کا حساب لگاتے ہیں تاکہ ان مسائل کو درست کیا جا سکے، بالکل اسی طرح ذات کی گنتی بھی تبدیلی کی سمت میں پہلا قدم ہے۔ جب تک ہر ذات کی درست گنتی نہیں ہوگی، ہم یہ نہیں جان پائیں گے کہ کون لوگ اب بھی پسماندہ ہیں اور کسے حقیقی مدد کی ضرورت ہے۔یہ گنتی ہمیں یہ سمجھنے میں مدد دیتی ہے کہ سماج میں کون آگے ہے، کون پیچھے اور کیوں۔ ذات پر مبنی مردم شماری ایک ایسا موقع ہے جس کے ذریعے سچائی کو جانا جا سکتا ہے اور برابری کی طرف بڑھا جا سکتا ہے۔
ذات پر مبنی مردم شماری صرف ایک انتظامی عمل نہیں ہے بلکہ یہ بھارت کی جمہوریت کا اصل امتحان ہے۔ اس سے یہ سامنے آئے گا کہ کس ذات اور طبقے کو درحقیقت مواقع حاصل ہوئے اور کون اب بھی محرومی کا شکار ہے۔
اگر ہم درست اعداد و شمار کے بغیر پالیسیاں بناتے رہیں گے تو اصل ضرورت مند طبقات تک فائدہ نہیں پہنچ پائے گا۔ یہ مردم شماری اقتدار میں بیٹھے لوگوں کو جوابدہ بنائے گی اور یہ طے کرے گی کہ ترقی کا فائدہ صرف بالائی طبقات تک محدود نہ رہے۔سچا سماجی انصاف تبھی ممکن ہے جب ہر ذات کی حقیقی حالت کو تسلیم کیا جائے اور اس کے مطابق پالیسیاں بنائی جائیں۔ یہی جامع ترقی کا راستہ ہے۔بھارتی تناظر میں ذات پر مبنی مردم شماری صرف ذاتوں کی گنتی نہیں ہے بلکہ یہ سماجی حقیقت کو پہچاننے کا ایک ذریعہ ہے۔ یہ ہمیں یہ سمجھنے میں مدد دیتی ہے کہ جن رہنماؤں نے برسوں تک اپنے سماج کے نام پر اقتدار حاصل کیا، کیا انہوں نے واقعی اپنی ذات کے لوگوں کی زندگی میں کوئی تبدیلی لائی؟
اگر اعداد و شمار یہ دکھاتے ہیں کہ اقتدار کے قریب رہی ذاتیں اب بھی تعلیم، روزگار اور عزت سے محروم ہیں، تو اس سے ذات کے نام پر کی جانے والی سیاست کی حقیقت سامنے آ سکتی ہے۔ یہ مردم شماری اُن طبقات کو آواز دے سکتی ہے جنہیں اب تک سیاسی طور پر حاشیے پر رکھا گیا۔ سماجی انصاف کی سمت میں یہ ایک ضروری اور ایماندار شروعات ہو سکتی ہے۔ذات پر مبنی مردم شماری صرف مسلم سماج کے لیے ہی نہیں بلکہ پورے ملک کے لیے سماجی انصاف کی سمت میں ایک تاریخی قدم ہے۔ اس سے سماج میں چھپی ہوئی نا برابریاں بے نقاب ہوں گی اور محروم طبقات کو ان کا حق ملے گا۔
یہ قدم نہ صرف سماجی ہم آہنگی اور بھائی چارے کو فروغ دے گا بلکہ جمہوریت کو بھی مضبوط کرے گا۔ بھارتیہ جنتا پارٹی کی پہل نے اس مسئلے کو سیاست کے مرکز میں لا کھڑا کیا ہے۔اگر بی جے پی اس سمت میں ایمانداری سے آگے بڑھتی ہے تو یہ صرف مسلم سماج ہی نہیں بلکہ پورے ملک کی جمہوریت کو سماجی انصاف کی طرف لے جانے والا تاریخی قدم ہوگا۔ذات پر مبنی مردم شماری سے سماج میں چھپی ہوئی نا برابریوں کو دور کرنے کا راستہ کھلے گا اور ہر فرد کو اس کا حق ملے گا۔ یہی سچا سماجی انصاف ہے، یہی جمہوریت کی اصل روح ہے۔
نوٹ:مصنف پسماندہ موضوعات کے ماہر ہیں۔ یہ مضمون مصنف کے ذاتی خیالات پر مبنی ہے۔
