مدھورا کھیرے

شمالی دارفور کے صوبائی دارالحکومت الفاشر شہر پر حال ہی میں نیم فوجی گروہ "ریپڈ سپورٹ فورسز" (RSF) نے قبضہ کر لیا ہے۔ آر ایس ایف نے اپریل 2024 سے شہر کا محاصرہ کر رکھا تھا، جو اس وقت سوڈانی فوج کے کنٹرول میں تھا۔
جب خوراک اور امداد کی سپلائی لائنز کٹ گئیں تو شہر قحط اور بھوک کا شکار ہوگیا۔ مزید یہ کہ دونوں جانب سے مسلسل ڈرون حملوں اور بمباری، جسمانی تشدد اور جنسی ہراس کی خبروں نے شہر کو تباہ کر کے رکھ دیا۔ اب جب کہ آر ایس ایف نے مکمل کنٹرول حاصل کر لیا ہے، دہشت کا نیا دور شروع ہو گیا ہے۔ گھر گھر تلاشی لی جا رہی ہے اور ہلاکتوں کی اطلاعات ہیں۔ تقریباً 62 ہزار لوگ الفاشر سے فرار ہو چکے ہیں۔

ییل یونیورسٹی کے محققین کے مطابق یہاں غیر عرب آبادی کو منظم انداز میں نشانہ بنایا جا رہا ہے۔ سیٹیلائٹ تصاویر قتلِ عام اور تباہی کے شواہد پیش کرتی ہیں۔ 2023 میں فوج اور نیم فوجی فورسز کے درمیان تصادم کے آغاز سے اب تک اندازاً 1.25 لاکھ لوگ مارے جا چکے ہیں اور ایک کروڑ سے زائد بے گھر ہو گئے ہیں۔ لوگ امدادی کیمپوں تک پہنچنے کے لیے سینکڑوں کلومیٹر پیدل چل رہے ہیں۔

تنازع کا تاریخی پس منظر
جنرل عمر البشیر نے 1989 میں فوجی بغاوت کے ذریعے اقتدار پر قبضہ کیا۔ انہوں نے سخت گیر قوانین پر مبنی حکومت قائم کی۔ ان پر مخالفت کچلنے، میڈیا پر کنٹرول، اور دارفور میں نسل کشی جیسے سنگین الزامات لگے۔ 2003 میں دارفور میں افریقی نژاد افراد کی تحریک کو خانہ بدوش عرب ملیشیا "جنجوید" کی مدد سے کچل دیا گیا۔ 2003 سے 2005 تک جنوبی دارفور میں لاکھوں لوگ جنگ کا شکار ہوئے۔

اسی جنگ کے دوران جنجوید کے ایک نوجوان جنگجو نے بشیر کی توجہ حاصل کی۔ اس نوجوان کا نام محمد حمدان دگالو تھا، جو ’حمزتی‘ کے نام سے جانا جاتا ہے۔ بعد میں بشیر نے اس ملیشیا کو "بارڈر سکیورٹی فورس" کا درجہ دیا۔

2013 میں بشیر نے حمزتی کی سربراہی میں "ریپڈ سپورٹ فورسز" (RSF) قائم کیں۔ 2017 میں حمزتی نے ایک مخالف قبائلی رہنما سے سوڈان کی متعدد سونے کی کانیں چھین لیں اور ملک کا سب سے بڑا سونا تاجر بن گیا۔ چونکہ زیادہ تر سونا دبئی جاتا ہے، اس لیے متحدہ عرب امارات (یو اے ای) اس کا اہم تجارتی ساتھی بن گیا۔

دوسری جانب، 2015 میں سعودی اماراتی اتحاد کی یمن میں مداخلت کے بعد سوڈانی حکومت نے جنرل البرہان کی قیادت میں فوجی دستے یمن روانہ کیے۔ کچھ ماہ بعد یو اے ای نے حمزتی سے الگ معاہدہ کیا، جس کے تحت حمزتی نے آر ایس ایف کے ایک بڑے دستے کو جنوبی یمن میں لڑنے اور سعودی یمن سرحد کی حفاظت کے لیے بھیجا۔ اس سے اسے مزید مالی وسائل ملے۔ رفتہ رفتہ وہ سوڈان کے امیر ترین افراد میں شامل ہو گیا اور آر ایس ایف بھی مزید طاقتور ہو گئی۔

چنگاری اور موجودہ صورتحال
برہان نے آر ایس ایف کو باقاعدہ فوج میں ضم کرنے کی تجویز پیش کی۔ وہ یہ عمل دو سال میں مکمل کرنا چاہتے تھے، جبکہ حمزتی دس سال کا وقت مانگ رہے تھے۔ یہی دونوں کے درمیان بنیادی جھگڑے کی وجہ بنا۔ اب آر ایس ایف پورے دارفور خطے پر قابض ہو چکی ہے۔ آبادی بھوک، غذائی قلت، بیماریوں اور طبی سہولیات کی کمی کا شکار ہے۔ بڑے پیمانے پر نقل مکانی کا بحران پیدا ہو گیا ہے۔

بین الاقوامی مفادات اور سیاست
مختلف ممالک اقتصادی فائدے، جغرافیائی اسٹریٹجی، علاقائی استحکام اور قدرتی وسائل کے باعث یا تو برہان یا حمزتی کی حمایت کر رہے ہیں۔ مثال کے طور پر یو اے ای پر آر ایس ایف کو معاشی مفاد کے لیے اسلحہ فراہم کرنے کا الزام ہے۔ سوڈان کی جغرافیائی اہمیت، خصوصاً بحیرہ احمر تک رسائی، بین الاقوامی تجارت کے لیے بہت اہم ہے۔

اسی لیے روس اور ایران پورٹ سوڈان میں بحری اڈہ قائم کرنے کے خواہشمند ہیں، جس کے لیے وہ برہان کی فوج کی حمایت کر رہے ہیں۔ مصر اور ایتھوپیا، جو سوڈان کے پڑوسی ہیں، علاقائی استحکام چاہتے ہیں، اس لیے وہ بھی برہان کے حامی ہیں۔ دوسری جانب، چاڈ آر ایس ایف کی مدد کر رہا ہے۔ یہ پیچیدہ مفادات جنگ بندی کی کوششوں میں بڑی رکاوٹ ہیں۔

جمہوریت کی نامکمل جدوجہد
دسمبر 2018 میں اتبرا شہر سے مہنگائی کے خلاف احتجاج شروع ہوا جو پورے ملک میں پھیل گیا۔ 6 اپریل 2019 کو ہزاروں لوگ خرطوم میں فوجی ہیڈکوارٹر کے باہر جمع ہوئے اور جمہوریت کا مطالبہ کیا۔ عوامی دباؤ کے سامنے فوج اور آر ایس ایف نے مل کر 11 اپریل 2019 کو البشیر کو برطرف کر دیا۔

فوج نے تین ماہ کی ایمرجنسی اور دو سالہ عبوری دور کا اعلان کیا۔ کئی ماہ کی بات چیت اور احتجاج کے بعد فوجی اور سول قیادت کے درمیان ایک "عبوری معاہدہ" طے پایا، جس کے تحت عبداللہ حمدوک عبوری وزیراعظم بنے۔ 2019 کی یہ تحریک جمہوریت کی جانب امید بھرا قدم تھی، لیکن 2021 کی نئی فوجی بغاوت نے یہ عمل روک دیا۔ اپریل 2023 سے ملک میں فوج اور آر ایس ایف کے درمیان خوفناک خانہ جنگی جاری ہے۔

بقاء کی جدوجہد اور امداد کی اپیل
اقوام متحدہ کے مطابق سوڈان میں تقریباً تین کروڑ لوگ زندگی بچانے کے لیے جدوجہد کر رہے ہیں اور فوری امداد کے محتاج ہیں۔ کئی بین الاقوامی تنظیمیں مدد کی اپیل کر رہی ہیں۔ مختلف ممالک سے امداد آ رہی ہے، مگر ناکافی ہے۔ رواں سال کے لیے ضروری فنڈز کا صرف 25 فیصد ملا ہے۔

بین الاقوامی تنظیم برائے ہجرت(IOM)، یونیسف، ورلڈ فوڈ پروگرام سمیت متعدد این جی اوز عالمی برادری سے مزید مدد کی منتظر ہیں۔ سوڈان میں تصادم کم کرنے کے لیے مستقل بین الاقوامی کوششوں کی ضرورت ہے۔ اگرچہ تنازع کی پیچیدگی اور بیرونی کردار اس کے حل کو مشکل بناتے ہیں، لیکن عوام کی تکالیف کم کرنے کے لیے مکالمہ، جرائم کی جوابدہی، اور امداد کی فراہمی ناگزیر ہے۔

مصنف بین الاقوامی امور کے محقق ہیں۔