عامر اقبال / نئی دہلی

 اتر پردیش کے سنبھل میں چند بچوں نے ایمانداری کی ایسی مثال قائم کی ہے جس نے پورے علاقے کے دل جیت لیے ہیں۔ گلی میں کھیلتے ہوئے انہیں ایک مہنگا موبائل فون ملا مگر انہوں نے لالچ میں آ کر اسے اپنے پاس رکھنے کے بجائے پولیس کے حوالے کر دیا۔

اتر پردیش کے سنبھل سے انسانیت اور دیانت داری کی ایک خوبصورت کہانی سامنے آئی ہے۔ اس واقعے نے ثابت کر دیا کہ اچھے اخلاق اور درست تربیت آج بھی معاشرے میں زندہ ہیں۔ سنبھل کے ایک محلے کی گلی میں چند بچے روز کی طرح کھیل رہے تھے۔ کھیلتے کھیلتے ان کی نظر سڑک کے کنارے پڑے ایک مہنگے اسمارٹ فون پر پڑی۔ جب انہوں نے فون اٹھا کر دیکھا تو وہ نیا اور قیمتی آئی فون سترہ پرو میکس تھا جس کی قیمت تقریباً ایک لاکھ پچاس ہزار روپے بتائی جاتی ہے۔ اتنا مہنگا فون دیکھ کر کسی بھی بچے کے دل میں اسے اپنے پاس رکھنے کا خیال آ سکتا تھا مگر ان بچوں نے مختلف فیصلہ کیا۔

بچوں نے آپس میں مشورہ کیا اور کہا کہ یہ فون کسی کا ہے اس لیے اسے اس کے اصل مالک تک پہنچانا چاہیے۔ اس کے بعد وہ فون لے کر سیدھے پولیس اسٹیشن پہنچے اور فون سنبھل پولیس کے حوالے کر دیا۔ پولیس نے فون کی جانچ کی اور کچھ ہی دیر میں اس کے مالک کا پتہ لگا لیا۔ معلومات کے مطابق یہ فون اسی علاقے کے رہنے والے ناظم علی کا تھا جو غلطی سے کہیں گر گیا تھا۔

پولیس نے فون اس کے اصل مالک ناظم علی کو محفوظ طریقے سے واپس کر دیا۔ اپنا مہنگا فون واپس پا کر ناظم علی بہت خوش ہوئے۔ انہوں نے پولیس کے ساتھ ساتھ بچوں کا بھی شکریہ ادا کیا اور ان کی ایمانداری کی دل سے تعریف کی۔

اس واقعے کے بعد پورے علاقے اور سوشل میڈیا پر ان بچوں کی ایمانداری کی چرچا ہو رہی ہے۔ لوگوں کا کہنا ہے کہ یہ صرف بچوں کی اچھائی نہیں بلکہ ان کے والدین کی دی ہوئی اچھی تربیت کا نتیجہ ہے۔ محلے کے بزرگوں کا کہنا ہے کہ جس گھر میں بچوں کو بچپن سے سچ بولنا دوسروں کا حق نہ لینا اور ایمانداری سے جینا سکھایا جاتا ہے وہی بچے بڑے ہو کر معاشرے کے لیے مثال بنتے ہیں۔

سنبھل۔ بچوں کی ایمانداری۔ گلی میں ملا تھا آئی فون 17 پرو میکس۔ بچوں نے پولیس کو سونپ دیا۔#india #sambhal #uppolice pic.twitter.com/kywwwzZ0L8

— mansooruddin faridi (@mfaridiindia) March 9, 2026

آج کے دور میں جب اکثر لالچ اور خود غرضی کی خبریں سامنے آتی ہیں سنبھل کے ان بچوں کی یہ چھوٹی سی کہانی معاشرے کو بڑا پیغام دے رہی ہے۔ یہ واقعہ ہمیں یاد دلاتا ہے کہ اچھی تربیت بچوں کو نہ صرف اچھا انسان بناتی ہے بلکہ معاشرے میں اعتماد اور انسانیت کو بھی مضبوط کرتی ہے۔