الفیہ شیخ۔ شولاپور

اردو زبان و ادب کی ایک معتبر شخصیت۔ معروف شاعر۔ نقاد اور استاد بشیر پرواز 82 برس کی عمر میں اس دار فانی سے رخصت ہوگئے۔ انہوں نے شولاپور کے نوبل اسپتال میں آخری سانس لی۔ ان کے انتقال کی خبر پھیلتے ہی مہاراشٹر سمیت پورے ملک کے ادبی اور تعلیمی حلقوں میں غم کی لہر دوڑ گئی۔ نماز جنازہ کے بعد انہیں شولاپور کے جید صاحب قبرستان میں سپرد خاک کیا گیا۔ پسماندگان میں اہلیہ ممتاز بیگم۔ 2 بیٹے اور 2 بیٹیاں شامل ہیں۔

ابتدائی زندگی اور ادبی ورثہ

بشیر احمد عبدالقادر دولت آبادی کی پیدائش 20 دسمبر 1944 کو شولاپور کے ایک علمی اور ادبی گھرانے میں ہوئی۔ ادبی دنیا میں وہ اپنے قلمی نام بشیر پرواز سے معروف ہوئے۔ شاعری اور ادب کا شوق انہیں اپنے والد عبدالقادر لڈلے صاحب دولت آبادی سے ورثے میں ملا جو قادر شولاپوری کے نام سے معروف شاعر تھے۔گھر کا ماحول علم و ادب کی آماجگاہ تھا۔ وہاں الفاظ کی نزاکتوں۔ اوزان اور قافیوں پر روزانہ گفتگو ہوتی تھی۔ یہی علمی ماحول بچپن ہی سے ان کی فکری تربیت کا ذریعہ بنا۔ایم اے اور بی ایڈ کی تعلیم مکمل کرنے کے بعد 1971 میں ان کی پہلی تخلیق معروف ماہنامہ سب رس میں شائع ہوئی۔ یہی ان کے باقاعدہ ادبی سفر کا آغاز تھا جو بعد میں مہاراشٹر میں اردو شاعری کے لیے ایک نئی شناخت کا ذریعہ بنا۔

تدریس کا مقدس پیشہ اور نئی نسل کی تربیت

بشیر پرواز نے اپنی زندگی کا ایک بڑا حصہ تدریس کے مقدس پیشے کے لیے وقف کردیا۔ انہوں نے ابتدا میں 5 برس تک شری وردھن میں خدمات انجام دیں۔ اس کے بعد سٹیزن اردو ہائی اسکول سے وابستہ رہے۔ بعد ازاں پروگریسو اردو ہائی اسکول میں طویل عرصے تک اردو کے استاد کی حیثیت سے خدمات انجام دیں اور 2002 میں باعزت سبکدوش ہوئے۔وہ ریاستی نصاب تیار کرنے والے ادارے بال بھارتی پونے سے بھی وابستہ رہے جہاں انہوں نے اردو کی نصابی کتابوں کی تدوین میں اہم کردار ادا کیا۔تدریس اور شاعری دونوں میں انہیں قلبی سکون حاصل تھا۔ ان کا یقین تھا کہ انسان کا حقیقی سہارا اور رہنما صرف اللہ تعالیٰ ہے۔ اپنی ایک معروف غزل میں انہوں نے اسی فکری احساس کا اظہار کیا۔

نیا سفر بھی نیا حوصلہ بھی دیتا ہے

سجا کے منزلیں راستہ دکھا بھی دیتا ہے

زبان و دل میں وہی رابطہ بھی دیتا ہے

اثر کے واسطے حرف دعا بھی دیتا ہے

ہمارا کچھ بھی نہیں ہے تمام اس کا ہے

وہی مٹاتا ہے سب کچھ بنا بھی دیتا ہے

بزم غالب کی تحریک اور شولاپور کا ادبی ماحول

بشیر پرواز محض ایک ادیب نہیں تھے بلکہ اپنی ذات میں ایک ادارہ تھے۔ شولاپور کی معروف ادبی تنظیم بزم غالب کے صدر کی حیثیت سے انہوں نے اس ادارے کو محض ایک رسمی انجمن بننے نہیں دیا بلکہ اسے ایک مسلسل ادبی تحریک میں تبدیل کردیا۔تقریباً 20 برس تک انہوں نے بلا ناغہ ہر اتوار ادبی نشست کی روایت کو جاری رکھا۔ ان نشستوں میں نوجوان لکھنے والوں کی تربیت کی جاتی اور نئے اشعار کی اصلاح کی جاتی تھی۔وہ عام لوگوں کو کتابوں سے جوڑنے کے لیے ہمیشہ کوشاں رہتے تھے۔ شولاپور میں قومی سطح کے 10 روزہ اردو کتاب میلے اور 3 روزہ بین الاقوامی اردو میلے کے انعقاد میں انہوں نے اہم کردار ادا کیا۔ طلبہ میں اردو زبان کی شیرینی پیدا کرنے کے لیے اردو ڈرامہ مقابلوں کا انعقاد کیا اور مشاعروں کی روایت کو بھی زندہ رکھا۔انہوں نے زندگی کے سفر۔ زمانے کے دکھ اور تنہائی کے احساس کو انتہائی خوبصورت شعری پیرایے میں ڈھالا۔

جب دل شوریدہ سر سے بیکلی جاتی رہی

زندگی سے زندگی کی دلکشی جاتی رہی

صحرا صحرا عمر گزری کیا کریں دریا کا اب

قطرہ قطرہ دھوپ پی کر تشنگی جاتی رہی

قافیوں کے شور و غل میں بجھ گئی فکر رسا

پھر ہوا یوں شاعری سے شاعری جاتی رہی

شعری مزاج۔ تخلیقی وسعت اور انسانی اقدار

بشیر پرواز کی شاعری گہری فکر۔ دلکش تشبیہات اور سماجی شعور کا حسین امتزاج تھی۔ ان کا شعری مجموعہ خیال اور زبان و ادب کے علم پر مبنی کتاب آموزگار خاصی مقبول ہوئی۔ان کی حمدیں۔ نعتیں اور نظمیں ریاست کے اردو مدارس اور اسکولوں میں عقیدت اور شوق سے پڑھی جاتی ہیں۔ان کے فن کا اعتراف کرتے ہوئے اورنگ آباد کے معروف شاعر بشار نواز نے لکھا تھا کہ بشیر پرواز کے اسلوب میں تازہ الفاظ۔ خوبصورت پیکر تراشی اور شفاف تشبیہات نمایاں ہیں۔وہ موجودہ دور کی نفرت اور سیاسی چال بازیوں سے گہرے طور پر متاثر اور رنجیدہ تھے۔ ان کا ماننا تھا کہ ایک ادیب اور شاعر کا سب سے بڑا مذہب انسانیت اور امن ہے۔ انہوں نے اس نظریے کو نہایت بے باکی سے پیش کیا۔

شعر سچا ہو تو لہجہ نہیں دیکھا جاتا

اپنے محبوب کا شجرہ نہیں دیکھا جاتا

ان دنوں اہل سیاست ہیں دھرم کے رکشک

گندے ہاتھوں میں نگینہ نہیں دیکھا جاتا

نام پر دھرم کے۔ ایمان کے۔ خون انسان

صاف چادر پہ یہ دھبہ نہیں دیکھا جاتا

ہم غزل والے۔ محبت ہے ہمارا مذہب

ہم سے یہ خون خرابہ نہیں دیکھا جاتا

ان کی نظموں میں بھی فلسفیانہ گہرائی موجود تھی۔ وہ مختصر نظم میں گہری بات کہنے کا ہنر جانتے تھے۔ ان کی مختصر نظم ڈر اسی فلسفیانہ فکر کی ایک مثال ہے۔

مجھے یہ ڈر نہیں کہ میرا بچہ

میری باتیں کبھی سنتا نہیں ہے۔ ٹال دیتا ہے

مجھے ڈر ہے تو بس یہ ہے

میرے ہر فعل کو وہ دیکھتا ہے

ایک عہد کا اختتام

ادب اور تعلیم کے شعبوں میں ان کی بے مثال خدمات کے اعتراف میں انہیں مہاراشٹر اسٹیٹ اردو ساہتیہ اکیڈمی کی جانب سے ریاستی ایوارڈ سے نوازا گیا۔ آل انڈیا اردو ادبی کانفرنس کی جانب سے تعلیمی ایوارڈ اور لائنس کلب شولاپور کی جانب سے ادبی ایوارڈ بھی انہیں حاصل ہوا۔بشیر پرواز کے انتقال سے صرف شولاپور ہی نہیں بلکہ پوری اردو دنیا ایک شفیق استاد۔ سنجیدہ نقاد اور مخلص ادیب سے محروم ہوگئی ہے۔ انہوں نے ادب کے جو چراغ روشن کیے وہ آنے والی نسلوں کی رہنمائی کرتے رہیں گے۔