غلام رسول دہلوی

ہندو دھرم کی از سر نو تعبیر کرنے والے پنڈتوں اور مفکرین اکیسویں صدی میں قدیم ویدک روایت کو نئے تناظر میں پیش کرنے کی کوشش کر رہے ہیں لیکن انہیں یہ تسلیم کرنا ہوگا کہ ہندو دھرم کی اصل طاقت ہمیشہ عقیدے اور عملی زندگی کے امتزاج میں رہی ہے۔ روحانی بنیاد کے بغیر طرز زندگی محض ثقافت بن کر رہ جاتا ہے اور عملی اخلاق کے بغیر مذہب کھوکھلی رسم بن جاتا ہے۔ کسی بھی مذہبی روایت کی پائیدار قوت انہی دونوں کے اتحاد میں مضمر ہوتی ہے۔

ششی تھرور کی تازہ کتاب دی سیج ہو ری امیجینڈ ہندوازم دی لائف لیسنز اینڈ لیگیسی آف سری نارائن گرو اسی سوچ و نظریے کو نہایت گہرائی اور وضاحت کے ساتھ پیش کرتی ہے۔ یہ محض سوانح عمری نہیں بلکہ ادویت کے نظریۂ وحدت کی گونج سے بھرپور ایک فکری مطالعہ ہے۔

تقابلی مذاہب اور صوفی روایت کے ایک طالب علم کی حیثیت سے مجھے یہ محسوس ہوا کہ ایسے وقت میں جب مذہبی شناختوں کو اکثریتی قوم پرستی یا اسلام کی انتہا پسند تعبیرات کے ذریعے تفریق کے لیے استعمال کیا جا رہا ہے ادویت اور وحدت الوجود جیسے گہرے روحانی تصورات کی طرف واپسی ایک اصلاحی راستہ فراہم کرتی ہے۔

اسی پس منظر میں نارائن گرو کا پیغام اسلام اور ہندو دھرم کے درمیان ایک مشترکہ اخلاقی افق کے طور پر سامنے آتا ہے۔ یہ مساوات وقار اور آفاقی اخوت کی دعوت ہے جو دونوں مذاہب کے مابعد الطبیعیاتی تصورات کے قلب سے پھوٹتی ہے نہ کہ ان کی جداگانہ شناختوں کو مٹانے کی کوشش۔

یہ کتاب جس کی رسم اجرا نائب صدر سی پی رادھاکرشنن نے انجام دی دراصل ہندوستان کی قومی اور تہذیبی شعور میں بھولی بسری اخلاقی بصیرت کو بحال کرنے کی ایک سنجیدہ کاوش ہے۔

ششی تھرور کے مطابق نارائن گرو انیسویں صدی کے کیرالا میں اس وقت ابھرے جب ذات پات کی تفریق نہ صرف عام تھی بلکہ اسے مذہبی تقدس بھی حاصل تھا۔ سماجی درجہ بندیاں اس قدر سخت تھیں کہ سوامی وویکانند نے کیرالا کو ایک پاگل خانہ قرار دیا تھا۔ ایسے غیر مساوی نظام میں نارائن گرو نے روحانی انقلاب برپا کیا۔ ان کی تاریخی اہمیت اس بات میں ہے کہ انہوں نے سماج کی اصلاح کے لیے مذہب پر حملہ نہیں کیا بلکہ مذہب کی نئی تعبیر کے ذریعے سماج کو آزاد کیا۔ انہوں نے ایسے مندروں کا قیام عمل میں لایا جو تمام ذاتوں کے لیے کھلے تھے تعلیم کو فروغ دیا اور محروم طبقات میں خود اعتمادی پیدا کی۔ اس طرح انہوں نے ثابت کیا کہ ایمان کو درجہ بندی کے شکنجے سے آزاد کیا جا سکتا ہے۔

ششی تھرور کی بڑی کامیابی یہ ہے کہ انہوں نے سری نارائن گرو کو محض ایک صوفی سنت شخصیت نہیں بلکہ ایک سماجی انقلابی کے طور پر پیش کیا۔ ان کا اعلان ایک ذات ایک مذہب ایک خدا برائے انسانیت بیک وقت روحانی بھی تھا اور سیاسی بھی عقیدتی بھی تھا اور نجات بخش بھی۔تقابلی تناظر میں دیکھا جائے تو نارائن گرو کا پیغام تہذیبی پل کی حیثیت اختیار کر لیتا ہے۔ ان کا منشور مذہبی تنوع کے انکار پر مبنی نہیں بلکہ اس حقیقت کا اعتراف ہے کہ ذات عقیدہ اور مصنوعی تقسیمات کے نیچے ایک مشترکہ وجودی بنیاد موجود ہے۔

کتاب کو زندگی اسباق اور وراثت کے عنوانات کے تحت منظم کیا گیا ہے جہاں بیانیہ فلسفے اور اثرات کے درمیان ایک مربوط تسلسل قائم کرتا ہے۔ ذات پات کے جبر پر مبنی ابواب خاص طور پر مؤثر ہیں جہاں الہیات کو سماجی کرب کے حقیقی تجربے سے جوڑا گیا ہے۔ یہاں روحانیت کوئی تجریدی تصور نہیں بلکہ سماجی اخلاق ہے۔

آج کے دور میں جب نظریاتی قطبیت شدت اختیار کر رہی ہے چاہے وہ ہندوشناخت کی اکثریتی تعبیر ہو یا مسلم فکر میں ردعمل پر مبنی رجحانات ایسے میں اصلاحی غیر ثنوی اور وحدت پر مبنی روایات کی بازیافت ناگزیر ہو جاتی ہے۔ ادویت اور وحدت الوجود دونوں انسانی وجود کو مشترکہ خدائی حقیقت سے وابستہ کر کے برتری کے رجحانات کو تحلیل کر دیتے ہیں۔

یہ کتاب محض ایک زندگی کی داستان نہیں بلکہ ہندوستان کی روحانی تاریخ میں جاری گہرے تہذیبی دھاروں کی بازگشت ہے جو وحدت بلا یکسانیت تنوع بلا تفریق اور ایمان بلا غلبہ کا پیغام دیتے ہیں۔ اسی بازگشت میں اس کی دائمی قدر پوشیدہ ہے۔

آج کا ہندوستان دو نظریاتی بگاڑوں سے دوچار ہے ایک طرف اکثریتی بالادستی کا رجحان اور دوسری طرف مذہبی انتہا پسندی اور شدت پسند اسلامیت۔ ہندوتوا سے منسوب سیاسی تعبیر اکثر ایک وسیع تکثیری اور فلسفیانہ تہذیب کو محدود ثقافتی قوم پرستی میں سمیٹ دیتی ہے جبکہ مسلم حلقوں کے بعض شدت پسند رجحانات مذہب کو ہم آہنگی کے بجائے علیحدگی کا ہتھیار بنانا چاہتے ہیں۔ یہ دونوں رجحانات ایک دوسرے کو تقویت دیتے ہیں۔

Delhi: Congress MP Shashi Tharoor says, ''The book is called The Sage Who Reimagined Hinduism. It's a book about Sri Narayana Guru who is extremely well known in Kerala, but not very well known in the North. And I wanted people who are not from Kerala to understand about the… pic.twitter.com/1lrbNprMJI

— IANS (@ians_india) February 19, 2026

ایسے ماحول میں سری نارائن گرو کی جامع اور اخلاقی روح کے مطابق ہندو دھرم کی نئی تعبیر محض داخلی اصلاح نہیں بلکہ قومی ضرورت بن جاتی ہے۔ روحانی مساوات اور انسانی وقار پر مبنی ہندو دھرم اکثریتی غلبے کے لیے کوئی جگہ نہیں چھوڑتا۔

انتہا پسند نظریات مذاہب کو جامد اور ہمیشہ متصادم اکائیوں کے طور پر پیش کر کے پروان چڑھتے ہیں۔ نارائن گرو جیسے مصلحین کو سامنے لا کر ہندوستان دنیا کو یاد دلاتا ہے کہ اس کی مذہبی روایات میں خود احتسابی اور اخلاقی ارتقا کی گہری تاریخ موجود ہے۔

ششی تھرور کی یہ کتاب دوہرا کام انجام دیتی ہے ایک طرف نارائن گرو کوقومی شعور میں دوبارہ زندہ کرتی ہے اور دوسری طرف عالمی قارئین کے سامنے ہندو دھرم کی ایسی تعبیر پیش کرتی ہے جو سیاسی کے بجائے فلسفیانہ اور نسلی کے بجائے اخلاقی بنیادوں پر قائم ہے۔

ہندوستان کے آئینی تکثیریت پر یقین رکھنے والے مسلمانوں کے لیے ایسی تعبیر کی تائید کسی رعایت کا عمل نہیں بلکہ مشترکہ تہذیبی فضا کی توثیق ہے،بااعتماد اور جامع ہندو دھرم اور خود احتسابی پر مبنی اصلاح پسند اسلام مل کر دونوں جانب کی انتہا پسندی کا مقابلہ کر سکتے ہیں۔کتاب کی تقریب اجرا علامتی طور پر اہم محسوس ہوئی۔ اس نے اشارہ دیا کہ ہندوستان کا مستقبل نظریاتی تصادم سے زیادہ اخلاقی بازیافت پر منحصر ہو سکتا ہے۔ ایسی آوازوں کی طرف رجوع جو ہمیں یاد دلاتی ہیں کہ مذہب کی گہری ترین سچائیاں درجہ بندی کو مٹاتی اور انسانی وقار کی توثیق کرتی ہیں۔

LIVE: Vice President Shri. C.P. Radhakrishnan's Address at the Book Launch of ‘The Sage Who Reimagined Hinduism - The Life, Lessons & Legacy of Sree Narayana Guru' by Dr. Shashi Tharoor https://t.co/7FTM3sPRRx

— Vice-President of India (@VPIndia) February 19, 2026

مصنف کی ایک اور کتاب عشق صوفیانہ ان کہی داستانیں محبت الہی کے عنوان سے بھی شائع ہو چکی ہے۔

آواز دی وائس ایک ایسے دور میں جب خبروں کی دنیا میں منفی رجحانات کو فروغ دیا جا رہا ہے، ملک بھر سے انسانی حوصلے باہمی تعاون مشترکہ وجود اور پرامن بقائے باہمی کی مثبت کہانیاں سامنے لا رہا ہے۔ہمیں یقین ہے کہ مذہب ذات علاقہ اور زبان کی خلیجوں کے باوجود ہمارے مشترکہ مسائل اور مستقبل کے لیے مشترکہ خواب لوگوں اور برادریوں کو قریب لانے کی بے پناہ صلاحیت رکھتے ہیں۔