دولت رحمان :گوہاٹی  

کیا آسام میں تعدد ازدواج صرف مسلمانوں میں پایا جاتا ہے۔ یا یہ محض پروپیگنڈہ اور ہماری سماجی تعصبات کی عکاسی ہے۔ یہ سوالات آسام حکومت کے حالیہ فیصلے کے بعد زیادہ اہم ہو گئے ہیں۔ حکومت نے تعدد ازدواج پر پابندی کے لیے نیا قانون نافذ کرنے کا اعلان کیا ہے۔ اس قانون کی خلاف ورزی پر 7 سال تک قید کی سزا تجویز کی گئی ہے۔ حکومت نے ان خواتین کے لیے معاوضہ فنڈ بنانے کا بھی اعلان کیا ہے جنہیں اس پابندی کے بعد معاشی یا سماجی مشکلات کا سامنا کرنا پڑ سکتا ہے۔

ممبئی میں قائم انٹرنیشنل انسٹی ٹیوٹ فار پاپولیشن سائنسز کی ایک تحقیق سے معلوم ہوا ہے کہ تعدد ازدواج صرف مسلمانوں تک محدود نہیں ہے۔ آسام میں ہندوؤں سمیت دیگر برادریوں میں بھی یہ رواج پایا گیا ہے۔ تاہم اس تحقیق کے مطابق یہ عمل مسلسل کم ہو رہا ہے۔آئی آئی پی ایس کی اس تحقیق میں نیشنل فیملی ہیلتھ سروے کے تیسرے 2005 06 چوتھے 2015 16 اور پانچویں 2019 21 مرحلوں کے اعداد و شمار کا تجزیہ کیا گیا۔ تحقیق کے مطابق آسام میں تعدد ازدواج کی شرح 15 برسوں میں 3.3 فیصد سے گھٹ کر 2.4 فیصد رہ گئی ہے۔

این ایف ایچ ایس 5 کے مطابق آسام میں مسلمانوں میں تعدد ازدواج کی شرح 3.6 فیصد رہی۔ ہندوؤں میں یہ شرح 1.8 فیصد اور دیگر مذاہب میں بھی 1.8 فیصد رہی۔ دیگر مذاہب میں یہ شرح این ایف ایچ ایس 4 میں 0.9 فیصد تھی جو بعد میں بڑھ گئی۔این ایف ایچ ایس 3 میں آسام میں 2.1 فیصد ہندو۔ 6.9 فیصد مسلمان اور 1.3 فیصد دیگر مذاہب سے تعلق رکھنے والوں نے تعدد ازدواج کی اطلاع دی تھی۔ اگلے سروے میں یہ شرح کم ہو کر ہندوؤں میں 1.8 فیصد۔ مسلمانوں میں 3.6 فیصد اور دیگر مذاہب میں 0.9 فیصد رہ گئی۔

وسطی آسام کے بسواناتھ ضلع اور جنوبی آسام کے کریم گنج ضلع میں تعدد ازدواج کی شرح سب سے زیادہ 4.2 فیصد ریکارڈ کی گئی۔ یہ دونوں اضلاع ملک کے ان 40 اضلاع میں شامل تھے جہاں تعدد ازدواج کی شرح سب سے زیادہ رہی۔ میگھالیہ کے ایسٹ جینتیا ہلز ضلع میں یہ شرح 20 فیصد رہی جہاں اکثریت عیسائی آبادی کی ہے۔این ایف ایچ ایس 5 کے اعداد و شمار کے مطابق مسلمانوں میں تعدد ازدواج کی سب سے زیادہ شرح اوڈیشہ میں 3.9 فیصد اور آسام میں 3.6 فیصد رہی۔

ہندوستان میں ذاتوں کے لحاظ سے دیکھا جائے تو تعدد ازدواج سب سے زیادہ درج فہرست قبائل میں پایا گیا۔ تاہم تمام ذاتوں میں وقت کے ساتھ اس میں کمی آئی ہے۔ درج فہرست قبائلی خواتین میں یہ شرح این ایف ایچ ایس 3 میں 3.1 فیصد تھی جو این ایف ایچ ایس 5 میں کم ہو کر 2.4 فیصد ہو گئی۔ درج فہرست ذاتوں میں یہ شرح 2.2 فیصد سے کم ہو کر 1.5 فیصد ہو گئی۔

آئی آئی پی ایس کی تحقیق کے مطابق این ایف ایچ ایس 3 میں بدھ مت کے ماننے والوں میں تعدد ازدواج کی شرح 3.8 فیصد اور مسلمانوں میں 2.6 فیصد تھی۔ این ایف ایچ ایس 5 میں یہ شرح دیگر مذاہب میں 2.5 فیصد۔ عیسائیوں میں 2.1 فیصد اور مسلمانوں میں 1.9 فیصد رہی۔ تحقیق میں یہ بھی بتایا گیا کہ دیہی علاقوں میں تعدد ازدواج شہری علاقوں کے مقابلے میں زیادہ پایا گیا۔

تحقیق کے مطابق شمال مشرقی ریاستوں خاص طور پر میگھالیہ اور جنوبی ہندوستان کی خواتین میں تعدد ازدواج کی شرح زیادہ رہی۔ این ایف ایچ ایس 3 میں شمال مشرق اور جنوبی ہندوستان میں بالترتیب 3.3 فیصد اور 3 فیصد شادی شدہ خواتین نے اس کی اطلاع دی۔ این ایف ایچ ایس 5 میں یہ شرح کم ہو کر شمال مشرق میں 2.6 فیصد اور جنوبی ہندوستان میں 2 فیصد رہ گئی۔ تحقیق میں یہ بھی پایا گیا کہ بغیر تعلیم یافتہ خواتین میں تعدد ازدواج کا رجحان زیادہ تھا جبکہ اعلیٰ تعلیم یافتہ خواتین میں یہ کم پایا گیا۔

گزشتہ سال دسمبر میں آسام اسمبلی نے آسام پروہیبیشن آف پولیگیمی ایکٹ 2025 منظور کیا۔ اس قانون کا مقصد آسام میں تعدد ازدواج اور ہر قسم کی کثیر ازدواجی شادیوں پر پابندی لگانا ہے۔ چھٹی شیڈول کے تحت آنے والے قبائلی علاقوں کو اس قانون سے مستثنیٰ رکھا گیا ہے۔ آسام کے مسلمانوں کی اکثریت خاص طور پر خواتین نے اس قانون کو ترقی پسند قدم قرار دیا ہے۔ تاہم برادری کے ایک طبقے نے خبردار کیا ہے کہ اس قانون کا اطلاق صرف مسلمانوں کو نشانہ بنا کر نہیں ہونا چاہیے۔