راجیو نارائن

ایک زمانہ تھا جب ہندوستان میں مانسون کی آمد کی خبر نہ موبائل فون کے الرٹ دیتے تھے اور نہ ہی ٹیلی ویژن کی بریکنگ نیوز۔ اس کا اعلان پہلی بارش کے بعد مٹی سے اٹھنے والی وہ سوندھی خوشبو کرتی تھی جو ہر دل کو تازگی بخشتی تھی۔ مانسون صرف ایک موسم نہیں بلکہ ہندوستان کی اجتماعی یادوں کا حصہ تھا۔ بچے گلیوں میں بہتے پانی میں کاغذ کی کشتیاں چلاتے تھے۔ گھروں میں گرم چائے اور پکوڑوں کی محفلیں سجتی تھیں۔ کسان شکرگزاری کے جذبے کے ساتھ آسمان کی طرف دیکھتے تھے۔ دریا لبریز ہو جاتے تھے۔ ڈیم بھر جاتے تھے۔ پن بجلی گھر دوبارہ پوری رفتار سے چلنے لگتے تھے اور پہاڑیاں ہریالی کی چادر اوڑھ لیتی تھیں۔

مانسون ہندوستان کے لیے ہر سال نئی زندگی کی علامت تھا اور آج بھی ہے۔ ملک میں سالانہ بارش کا تقریباً 75 فیصد صرف 4 مہینوں کے دوران ہوتا ہے۔ یہی بارش دریاؤں کو زندگی دیتی ہے۔ آبی ذخائر کو بھر دیتی ہے۔ کھیتوں کو سیراب کرتی ہے اور 50 کروڑ سے زیادہ ایسے ہندوستانیوں کے روزگار کا سہارا بنتی ہے جن کا انحصار اب بھی زراعت پر ہے۔ تقریباً 4000 ارب مکعب میٹر بارش ہندوستانی معیشت کی رگوں میں خون کی طرح گردش کرتی ہے۔ لیکن وقت کے ساتھ اس موسم کا جوش و خروش ایک نئی تشویش میں بدل گیا ہے۔ اب ہر سیاہ بادل اپنے ساتھ امید کے ساتھ خوف بھی لے کر آتا ہے۔

اس سال بھی مانسون نے پوری شدت اختیار کرنے سے پہلے ہی اپنی طاقت دکھانا شروع کر دی ہے۔ ملک کے مختلف حصوں سے لینڈ سلائیڈنگ۔ اچانک سیلاب۔ دریاؤں میں طغیانی اور ٹرانسپورٹ کے متاثر ہونے کی خبریں مسلسل سامنے آ رہی ہیں۔ ممبئی میں صرف 4 دنوں کے اندر جولائی کی اوسط بارش کا تقریباً 80 فیصد برس گیا جس سے سڑکیں اور ریل کا نظام بری طرح متاثر ہوا۔ ہماچل پردیش اور شملہ میں لینڈ سلائیڈنگ اور سیلاب کے خدشات کے باعث ریڈ اور اورنج الرٹ جاری کیے گئے۔ اتراکھنڈ کے تمام اضلاع میں شدید بارش اور دریاؤں کی طغیانی دیکھی گئی جبکہ کیرالہ کے وایناڈ میں لینڈ سلائیڈنگ نے ایک مرتبہ پھر تباہی کی یاد تازہ کر دی۔یہ سب اس حقیقت کی طرف اشارہ کرتا ہے کہ ماضی کے موسم کو سامنے رکھ کر بنایا گیا بنیادی ڈھانچہ آج کے بدلتے ہوئے موسم کا مقابلہ نہیں کر پا رہا۔

قدرت کا انتباہ

ماہرین موسمیات کئی برسوں سے خبردار کرتے آ رہے ہیں کہ زمین کے درجہ حرارت میں اضافے کا مطلب ہر جگہ زیادہ بارش نہیں بلکہ بے ترتیب اور غیر متوقع بارش ہے۔ کہیں بادل پھٹتے ہیں۔ کہیں طویل خشک سالی کے بعد اچانک موسلا دھار بارش ہوتی ہے اور موسم کی پیش گوئی پہلے سے زیادہ مشکل ہو جاتی ہے۔ ہندوستان اس تبدیلی کو پوری شدت کے ساتھ محسوس کر رہا ہے۔

لیکن اصل مسئلہ مانسون نہیں بلکہ وہ ماحول ہے جسے انسان نے بدل دیا ہے۔ آبادی بڑھانے کے لیے پہاڑ کاٹے گئے۔ دریاؤں پر تجاوزات ہوئیں۔ دلدلی علاقے اور آبی ذخائر کنکریٹ کے جنگل میں تبدیل ہو گئے۔ نکاسی آب کا نظام پرانا اور ناکافی رہ گیا جبکہ شہروں اور سیاحتی مقامات کی بے ہنگم توسیع نے خطرات میں مزید اضافہ کر دیا۔اسی لیے ایک قدرتی موسمی واقعہ اکثر انسانی المیے میں تبدیل ہو جاتا ہے۔

صرف پیش گوئی کافی نہیں

گزشتہ برسوں میں ہندوستان نے موسم کی پیش گوئی اور آفات سے نمٹنے کے نظام میں نمایاں بہتری پیدا کی ہے۔ محکمہ موسمیات جدید ٹیکنالوجی سے لیس ہوا ہے۔ ابتدائی انتباہ کے نظام مضبوط ہوئے ہیں اور امدادی اداروں کی صلاحیت میں بھی اضافہ ہوا ہے۔لیکن اگر منصوبہ بندی بارش شروع ہونے کے بعد کی جائے تو بہترین پیش گوئیاں بھی جان و مال کے نقصان کو نہیں روک سکتیں۔

اصل ضرورت بہتر تیاری ہے

ہر سال مانسون یہی سوال اٹھاتا ہے کہ آخر ہندوستان ایک ایسے موسم کو ہنگامی صورتحال کی طرح کیوں لیتا ہے جو ہر سال مقررہ وقت پر آتا ہے۔تیاری کا مطلب صرف امدادی کارروائیاں نہیں بلکہ بارش سے پہلے نالوں کی صفائی۔ کمزور ڈھلوانوں کی نشاندہی۔ پشتوں کی مضبوطی۔ حساس علاقوں میں تعمیرات پر پابندی اور بروقت انخلا کے منصوبے بنانا ہے۔ ترقیاتی منصوبوں میں خطرات کا سائنسی جائزہ لازمی ہونا چاہیے نہ کہ محض ایک رسمی کارروائی۔کئی ریاستوں نے پہلے سے مشینری۔ امدادی عملہ اور فوری کارروائی کرنے والی ٹیمیں تعینات کی ہیں۔ یہ اقدامات قابل تعریف ہیں کیونکہ ان سے قیمتی جانیں بچتی ہیں۔ لیکن اس تیاری کو وقتی ردعمل کے بجائے مستقل حکومتی نظام کا حصہ بنانا ہوگا۔ترقی اور ماحولیات کو ایک دوسرے کا مخالف سمجھنے کے بجائے ایک دوسرے کا معاون بنانا وقت کی اہم ضرورت ہے۔

Uttarakhand Monsoon 🌧️ ☔ pic.twitter.com/mC7I1WRhOG

— Suchintan Singh (@suchintan_singh) July 10, 2026

خوف پھیلانے والی سوشل میڈیا فیکٹری

مانسون کے ساتھ ایک اور خطرہ بھی آتا ہے اور وہ ہے سوشل میڈیا پر پھیلنے والی جھوٹی معلومات۔،شدید بارش ہوتے ہی پرانی ویڈیوز نئے عنوانات کے ساتھ دوبارہ شیئر ہونے لگتی ہیں۔ کبھی دوسرے ملک کی ویڈیو کو ہندوستان کی بتایا جاتا ہے اور کبھی کئی سال پرانے مناظر کو تازہ آفت قرار دے دیا جاتا ہے۔اس کے نتیجے میں لوگ خوف زدہ ہو جاتے ہیں۔ سیاح اپنے سفر منسوخ کر دیتے ہیں۔ ہوٹل۔ ٹیکسی ڈرائیور۔ ریستوراں اور سیاحت سے وابستہ ہزاروں افراد معاشی نقصان اٹھاتے ہیں۔ سب سے زیادہ نقصان یہ ہوتا ہے کہ سرکاری اداروں کی اصل وارننگ جھوٹی خبروں کے شور میں دب جاتی ہے۔اظہار رائے کی آزادی کا مطلب خوف پھیلانے کی آزادی نہیں ہے۔ اس کا حل سنسرشپ بھی نہیں بلکہ فوری حقائق کی جانچ۔ قابل اعتماد معلومات کی فراہمی اور سوشل میڈیا پلیٹ فارم کی ذمہ دارانہ کارروائی ہے۔ شہریوں کو بھی چاہیے کہ کسی بھی ویڈیو کو آگے بھیجنے سے پہلے اس کی صداقت ضرور جانچ لیں۔

دانشمندانہ رویہ ہی مستقبل ہے

ہندوستان مانسون کو روک نہیں سکتا اور نہ ہی ایسا کرنا چاہیے۔ یہی بارش اس کی زراعت۔ جنگلات۔ دریاؤں۔ آبی ذخائر اور معیشت کی بنیاد ہے۔ جو چیز بدلی جا سکتی ہے وہ صرف ہماری تیاری ہے۔سائنسی منصوبہ بندی۔ مضبوط بنیادی ڈھانچہ۔ ماحول دوست ترقی۔ عوامی آگاہی اور قابل اعتماد معلومات ہی وہ راستہ ہیں جو ہر سال کے نقصان کو کم کر سکتے ہیں۔شاید آج کے مانسون کا سب سے بڑا سبق یہی ہے کہ آفات صرف شدید بارش سے پیدا نہیں ہوتیں بلکہ معاشرے کی ناکافی تیاری انہیں تباہ کن بنا دیتی ہے۔اس سال جب مانسون اپنی پوری شدت کے ساتھ آئے تو ہندوستان کو اس کا استقبال اسی خوشی سے کرنا چاہیے جو کبھی اس موسم کی پہچان تھی۔ فرق صرف اتنا ہونا چاہیے کہ اس بار اعتماد اس لیے ہو کہ قوم پہلے سے زیادہ تیار اور زیادہ دانشمند ہو چکی ہے۔

مضمون نگار سینئر صحافی اور مواصلاتی امور کے ماہر ہیں۔