سشما رامچندرن

کیا بھارت واقعی عالمی اقتصادی طاقتوں کی صف میں جگہ پانے کے قابل ہے؟

بھارت اگرچہ کینیڈا میں منعقد ہونے والے گروپ آف سیون (جی7) سربراہی اجلاس میں شرکت کر رہا ہے، لیکن اس کی دعوت میں تاخیر نے یہ سوالات جنم دیے ہیں کہ کیا یہ ابھرتی ہوئی معیشت واقعی عالمی اعلیٰ سطح کی نشست کی مستحق ہے؟ اس حقیقت نے بھی قیاس آرائیوں کو جنم دیا ہے کہ کینیڈا کے وزیر اعظم مارک کارنی کی طرف سے وزیر اعظم نریندر مودی کو اجلاس میں شرکت کی دعوت نسبتاً دیر سے دینا شاید گروپ کے دیگر ارکان کے دباؤ کا نتیجہ ہو۔

کارنی کو اس فیصلے پر اپنے ملک میں تنقید کا سامنا کرنا پڑا، جس کی وجہ بھارت اور کینیڈا کے درمیان جاری کشیدگی بتائی جا رہی ہے۔ تاہم انہوں نے اس فیصلے کا دفاع کرتے ہوئے کہا کہ بھارت اب دنیا کی پانچویں بڑی معیشت، سب سے زیادہ آبادی والا ملک اور کئی عالمی سپلائی چینز کا مرکز بن چکا ہے۔

دیگر جی7 رکن ممالک بھی بھارت کے ساتھ تعلقات گہرے کرنے کی کوششوں میں مصروف ہیں۔ ان میں برطانیہ، امریکہ اور یورپی یونین کی تجارتی معاہدوں پر بات چیت، اور فرانس و اٹلی کی دفاعی و بنیادی ڈھانچے میں شراکت شامل ہے۔ اگرچہ بھارت کے گرد یہ گہماگہمی موجود ہے، لیکن بہت سے مبصرین اب بھی شک رکھتے ہیں کہ آیا یہ ملک واقعی امیر اقوام کے اجلاس میں کوئی بامعنی کردار ادا کر سکتا ہے۔ بھارت کے حق میں دی جانے والی ایک دلیل اس کی معیشت کا حجم ہے جو کہ تقریباً جاپان، جو دنیا کی چوتھی بڑی معیشت ہے، کے برابر ہے۔ مگر فی کس آمدنی کے اعتبار سے بھارت بہت پیچھے ہے۔

بھارت کی فی کس آمدنی تقریباً 2,878 امریکی ڈالر ہے، جو جاپان کی 33,834 ڈالر فی کس آمدنی کے مقابلے میں انتہائی کم ہے۔ اسی طرح اجلاس میں مدعو دیگر ممالک سے تقابلی جائزہ بھی بھارت کے حق میں نہیں جاتا، کیونکہ جنوبی افریقہ کی فی کس آمدنی سب سے کم ہے جو 14,990 ڈالر ہے، جبکہ برازیل، میکسیکو اور آسٹریلیا کہیں زیادہ بہتر سطح پر ہیں۔

تاہم 1.4 ارب آبادی والے ملک کے لیے یہ صورت حال قابل فہم ہے، جس نے اپنی ترقی کا سفر نوآبادیاتی دور کے بعد ہی شروع کیا۔ چین کے مقابلے میں اس کی سست رفتار ترقی کی ایک بڑی وجہ اس کا متحرک جمہوری نظام ہے جہاں پالیسی سازی میں اختلاف کو آسانی سے نظرانداز نہیں کیا جا سکتا۔ اس کے برعکس اس کا شمالی ہمسایہ سخت فیصلے لینے میں کسی بڑی مزاحمت کا سامنا نہیں کرتا۔

بھارت نے جمہوری روایات کے تسلسل کے ساتھ معاشی اصلاحات کے عمل میں بتدریج پیش قدمی کی ہے۔ کئی پالیسیوں پر اندرونی سطح پر شدید مخالفت دیکھنے کو ملی ہے۔ زرعی قوانین اس کی مثال ہیں، جنہیں بعض زرعی ماہرین نے زراعت کے شعبے کے لیے 1991 کے معاشی اصلاحات کے مترادف قرار دیا تھا، مگر سال بھر کے احتجاج کے بعد انہیں واپس لینا پڑا۔ سرکاری اداروں کی نجکاری بھی قیمتی قومی اثاثوں کے زیاں کے خدشات کے باعث سست رفتاری سے ہوئی ہے۔

تاہم اعلیٰ تعلیم کے شعبے میں بھارت نے قابل ذکر پیش رفت کی ہے جس کے نتیجے میں کمپیوٹر انجینئرز اور سائنسدانوں کی ایسی کھیپ تیار ہوئی ہے جو آج کی بڑی ٹیک کمپنیوں کا بنیادی ستون ہیں۔ مائیکروسافٹ اور گوگل جیسے اداروں کے سربراہ ستیا نڈیلا اور سندر پچائی اسی حقیقت کی دلیل ہیں۔ اس کے باوجود کہ بنیادی اور ثانوی تعلیم کے شعبوں میں ابھی بھی خامیاں ہیں، بھارت کی اعلیٰ تعلیمی ادارے ملکی و بین الاقوامی صنعتوں کے لیے بڑی تعداد میں ہنر مند افراد فراہم کر رہے ہیں۔

یوں اگرچہ بھارت فی کس آمدنی کے لحاظ سے پیچھے ہے، مگر اس کی معیشت تیزی سے پھیل رہی ہے اور عالمی سپلائی چینز کا حصہ بن رہی ہے۔ فی الحال اس کی شرح نمو دنیا کے دیگر ممالک سے کہیں بہتر ہے۔ مالی سال 2026 کے لیے 6.5 فیصد کی متوقع شرح نمو اسے باقی دنیا کے مقابلے میں ممتاز بنا رہی ہے، جہاں جغرافیائی کشیدگی کے باعث اقتصادی سست روی دیکھی جا رہی ہے۔

بھارت کی عالمی معیشت میں بڑھتی ہوئی اہمیت کی تصدیق کینیڈا کی پیشہ ور خدمات فراہم کرنے والی کمپنی ’کولیئرز‘ نے بھی کی ہے، جس نے تازہ ترین اعداد و شمار کی بنیاد پر بھارت کو سرحد پار سرمایہ کاری کے لیے دنیا کی ساتویں بہترین منزل قرار دیا ہے۔ بلاشبہ طویل مدت میں بھارت کے عالمی معاشی طاقت بننے کی بھرپور صلاحیت ہے۔ اسی امکان کے پیش نظر جی7 نے 2019 سے بھارت کو اپنے اجلاسوں میں مستقل مدعو کرنا شروع کر دیا ہے۔

دوسری جانب چین کو اب تک اس ترقی یافتہ معیشتوں کے اجلاس میں شامل نہیں کیا گیا۔ چین نے اس گروپ کو متروک تصور کرتے ہوئے اسے دنیا کی حقیقی نمائندگی سے عاری قرار دیا ہے۔ ماضی میں یہ بھی کہا گیا کہ جی7 دنیا کی صرف دس فیصد آبادی پر مشتمل ہے اور عالمی اقتصادی نمو میں چین سے بھی کم حصہ ڈالتی ہے۔

یہ درست ہے کہ جی7 میں ترقی یافتہ دنیا کے بیشتر ممالک شامل ہیں، مگر روس اور چین کی عدم شمولیت سے اس کی نمائندہ حیثیت متاثر ہوتی ہے۔ اس وقت اس گروپ کے ارکان میں امریکہ، کینیڈا، اٹلی، برطانیہ، فرانس، جرمنی، جاپان اور یورپی یونین شامل ہیں۔ 2014 میں کریمیا کے الحاق کے بعد روس کو اس وقت کے جی8 سے نکال دیا گیا تھا۔

اگرچہ بعض تجزیہ کاروں کے مطابق جی7 کی اہمیت وسیع تر بنیادوں والے جی20 کے مقابلے میں کم ہو رہی ہے، پھر بھی یہ گروپ عالمی معیشت، موسمیاتی تبدیلی اور بین الاقوامی سلامتی کے موضوعات پر پالیسی سازی کے لیے مؤثر پلیٹ فارم ہے۔ چین اگرچہ اسے غیر نمائندہ گروپ کہتا ہے، مگر یہ مغربی طاقتوں کے لیے ایک اہم مشاورتی فورم ہے۔

بھارت کی اس اعلیٰ عالمی فورم میں موجودگی نہ صرف اس کی ابھرتی ہوئی اقتصادی طاقت کی حیثیت سے ضروری ہے بلکہ اس کے 1.4 ارب عوام کی امنگوں کی نمائندگی کے لیے بھی ناگزیر ہے۔ یہ ملک بتدریج کثیر القومی کمپنیوں کے لیے ’چائنا پلس ون‘ پالیسی کے تحت پسندیدہ سرمایہ کاری کی منزل بنتا جا رہا ہے۔ اس کی وسیع داخلی مارکیٹ بھی ان مغربی معیشتوں کے لیے کشش رکھتی ہے جو امریکی تجارتی پالیسیوں کی غیر یقینی صورتحال سے بچنا چاہتی ہیں۔

حال ہی میں برطانیہ کے ساتھ آزاد تجارتی معاہدے کا اختتام اور یورپی یونین کے ساتھ اسی نوعیت کے معاہدے پر تیزی سے پیش رفت بھارت کے ساتھ تعلقات کو گہرا کرنے میں بڑھتی دلچسپی کا مظہر ہے۔ اس پس منظر میں کوئی شک نہیں کہ جی7 بھارت کو ایک قابل بھروسہ اقتصادی اور اسٹریٹجک شراکت دار سمجھتا ہے اور امکان ہے کہ طویل مدت تک یہ ملک ان سربراہی اجلاسوں کا مستقل اور خوش آمدید مہمان رہے گا۔