آواز دی وائس : نئی دہلی 

 حج اسلام کی عظیم ترین عبادات میں سے ایک ہے جس کا اصل مقصد انسان کے اندر تقویٰ، اخلاص اور روحانی پاکیزگی پیدا کرنا ہے۔ یہ محض ایک سفری عبادت نہیں بلکہ بندے اور اللہ کے درمیان تعلق کو مضبوط کرنے کا ذریعہ ہے۔ حج کی اصل روح اور موجودہ زمانے میں اس کی بدلتی ہوئی صورت فکر انگیز جائزہ لیا جائے تو ایک حدیثِ نبویؐ یاد آتی ہے کہ جب امت زوال کا شکار ہوتی ہے تو عبادات کی روح کمزور پڑنے لگتی ہے اور ان میں دنیا داری شامل ہوجاتی ہے۔ یہی وجہ ہے کہ آج بعض لوگ حج کو عبادت کے بجائے سیاحت، تجارت، شہرت یا سماجی وقار حاصل کرنے کا ذریعہ سمجھنے لگے ہیں۔

ممتاز اسلامی اسکالر مولانا وحید الدین خان ((مرحوم) نےاپنے ایک مضمون میں اس معاملہ پر کچھ اس انداز میں روشنی ڈالی ہے کہ۔۔ ایک حدیث ان الفاظ میں آئی ہے :یأتی علی الناس زمانٌ یحجّ أغنیاء الناس للنزاہۃ، وأوساطہم للتّجارۃ، وقرّاؤہم للرّیاء والسُمعۃ، وفقراء ہم للمسئلۃ (کنز العُمّال، حدیث نمبر12363)۔ یعنی لوگوں پر ایک ایسا زمانہ آئے گا، جب کہ مال دار لوگ تفریح کے لیے حج کریں گے، اور اُن کے درمیانی درجے کے لوگ تجارت کے لیے حج کریں گے، اور ان کے علما دکھاوے اور شہرت کے لیے حج کریں گے، اور ان کے غریب لوگ مانگنے کے لیے حج کریں گے۔

 وہ مزید کہتے ہیں کہ ۔۔۔ یہ حدیث بہت ڈرا دینے والی ہے۔ اس کی روشنی میں موجودہ زمانے کے مسلمانوں کو خاص طور پر اپنا احتساب کرنا چاہیے۔ اُنھیں غور کرنا چاہیے کہ اُن کا حج اِس حدیثِ رسول کا مصداق تونہیں بن گیا ہے۔ مال دار لوگ سوچیں کہ ان کے حج میں تقویٰ کی اسپرٹ ہے ، یا سیر و تفریح (outing) کی اسپرٹ۔ عام لوگ یہ سوچیں کہ وہ دینی فائدے کے لیے حج کرنے جاتے ہیں یا تجارتی فائدے کے لیے۔ علما غور کریں کہ وہ عبدیت کا سبق لینے کے لیے بیت اللہ جاتے ہیں، یا اپنی پیشوایانہ حیثیت کو بلند کرنے کے لیے۔ اِسی طرح غریب لوگ سوچیں کہ حج کو انھوں نے خدا سے مانگنے کا ذریعہ بنایا ہے، یا انسانوں سے مانگنے کا ذریعہ۔

 مولانا وحید الدین خان نے مزید کہا کہ ۔۔۔ اِس حدیثِ رسول میں پیشین گوئی کی زبان میں بتایا گیا ہے کہ امت پر جب زوال آئے گا تو اُس وقت لوگوں کا حال کیا ہوگا۔ دورِ عروج میں امت کا حال یہ ہوتا ہے کہ دین کا روحانی پہلو غالب رہتا ہے اور اس کا مادّی پہلو دبا ہوا ہوتا ہے۔ دورِ زوال میں برعکس طورپر یہ ہوتا ہے کہ لوگوں کے درمیان دین کا روحانی پہلو دب جاتا ہے اور اس کا مادّی پہلو ہر طرف نمایاں ہوجاتا ہے۔ پہلے دور میں، تقویٰ کی حیثیت اصل کی ہوتی ہے اور مادّی چیزیں صرف ضرورت کے درجے میں پائی جاتی ہیں۔ اس کے برعکس، دورِزوال میں مادی چیزیں اصل بن جاتی ہیں اور کچھ ظاہری اور نمائشی چیزوں کا نام تقویٰ بن جاتا ہے۔ یہی معاملہ حج اور عمرہ کے ساتھ بھی پیش آتا ہے اور اسلام کی دوسری عبادات کے ساتھ بھی۔