عبداللہ منصور

آج کے عالمی منظرنامے میں میڈیا اور سینما صرف تفریح کا ذریعہ نہیں رہے بلکہ نظریات، سیاست اور رائے عامہ کی تشکیل کا سب سے طاقتور ہتھیار بن چکے ہیں۔ خاص طور پر ہالی ووڈ، جسے امریکی سافٹ پاور کی سب سے بڑی علامت سمجھا جاتا ہے۔ اپنی فلموں، ٹی وی سیریز اور میڈیا بیانیوں کے ذریعے نہ صرف امریکی ثقافت اور اقدار کی تشہیر کرتا ہے بلکہ مخالف ملکوں کی شبیہہ کو بھی قابو میں رکھتا ہے۔یہ عمل صرف ایران تک محدود نہیں بلکہ ان تمام ملکوں پر لاگو ہوتا ہے جنہیں امریکہ یا مغرب "دشمن" سمجھتا ہے، جیسے روس، چین، کیوبا، شمالی کوریا، عراق، افغانستان وغیرہ۔ ہالی ووڈ اور مغربی میڈیا کی اس شبیہہ سازی کے پیچھے کون سی حکمت عملیاں ہیں، یہ کس طریقے سے کام کرتی ہیں، اور اس کا عالمی رائے عامہ پر کیا اثر پڑتا ہے— انہی نکات پر یہ مضمون مرکوز ہے، جس میں ایران کی مثالوں کے ساتھ وہاں کی اپنی فلموں کے کردار کو بھی شامل کیا گیا ہے۔

ہالی ووڈ کو محض تفریحی صنعت کے طور پر دیکھنا بڑی غلطی ہوگی۔ یہ امریکی سافٹ پاور کا سب سے بڑا برآمد کنندہ ہے، جو اپنے مواد کے ذریعے امریکی اقدار، نظریات اور پالیسیوں کو دنیا بھر میں پھیلاتا ہے۔جوزف نائی کے مطابق، سافٹ پاور وہ قوت ہے جس میں کشش،ثقافت اور نظریہ کے ذریعے اپنی بات منوائی جاتی ہے، نہ کہ فوجی یا معاشی دباؤ سے۔ ہالی ووڈ کی فلمیں، ٹی وی سیریز اور ویب سیریز امریکی طرزِ زندگی، جمہوریت، انسانی حقوق اور آزادی کے آئیڈیلز کو پرکشش بنا کر پیش کرتی ہیں۔اس کے برعکس، مخالف ممالک کو اکثر دہشتگردی، انتہاپسندی، آمریت، پسماندگی اور وحشت کی علامت کے طور پر دکھایا جاتا ہے۔ یہ دراصل ایک قسم کی "ثقافتی جنگ" ہے جس میں ہالی ووڈ نظریات اور تاثر کی لڑائی لڑتا ہے۔ 

ایران کی شبیہ مغربی میڈیا میں 1979 کی اسلامی انقلاب کے بعد سے ہی منفی طور پر ابھرنے لگی۔ انقلاب کے بعد ایران نے امریکہ کے حامی حکومت کو گرا کر ایک سخت گیر اسلامی حکومت قائم کی، جس سے امریکہ کے لیے یہ ملک بڑا خطرہ بن گیا۔نائن الیون کے بعد، جب امریکہ نے "عالمی جنگ برائے دہشتگردی" کا اعلان کیا، تب سے ایران کو دہشتگردی اور عالمی عدم استحکام کا مرکز قرار دیا جانے لگا۔ ہالی ووڈ کی فلموں اور ٹی وی سیریز نے اس شبیہ کو مزید مضبوط کیا، جن میں ایران کو بار بار ولن، پسماندہ، شدت پسند اور عدم برداشت والا ملک دکھایا گیا۔فلم Argo(2012) اس شبیہ سازی کی سب سے بڑی مثال ہے۔ یہ فلم 1979 کے ایرانی انقلاب کے دوران امریکی سفارت خانے کے بحران پر مبنی ہے۔ اس میں ایرانیوں کو پرتشدد، جوشیلی اور ہجوم کی صورت میں دکھایا گیا، جبکہ امریکی اور کینیڈین کرداروں کو بہادر، سمجھدار اور انسان دوست بتایا گیا۔ فلم میں سی آئی اے ایجنٹ ٹونی مینڈیز چھ امریکی سفارتکاروں کو بچانے کے لیے ایک جعلی ہالی ووڈ سائنس فکشن فلم کے پردے میں منصوبہ بناتا ہے۔ پوری کہانی میں ایرانی معاشرے کو خطرناک، غیر مستحکم اور مغرب مخالف بنا کر پیش کیا گیا، جبکہ امریکی مشن کو ہیرو اور اخلاقیات سے جوڑ دیا گیا۔

اسی طرح Homelandجیسی ٹی وی سیریز میں دہشتگردی، جاسوسی اور مغربی سلامتی کے موضوعات کو بنیاد بنا کر ایران کو بار بار دہشتگردی کا مرکز، امریکی مفادات کے لیے خطرہ اور شدت پسند کے طور پر دکھایا گیا ہے۔فلم Not Without My Daughter(1991) میں ایرانی معاشرے کو خواتین کے لیے ظالم، متعصب اور پسماندہ بتایا گیا ہے۔ The Stoning of Soraya M.(2008) جیسی فلموں میں ایران میں عورتوں پر ہونے والے مظالم، خاص طور پر سنگسار کرنے کی غیر انسانی روایت کو اجاگر کیا گیا ہے۔Tehran(2020-) جیسی اسرائیلی تھرلر سیریز میں ایران کو خطرناک، عیار اور مغربی مفادات کے لیے بڑا خطرہ دکھایا گیا ہے۔ ان تمام فلموں اور سیریز میں ایرانیوں کو اکثر بغیر پس منظر یا انسانی پہلو کے صرف شدت پسند، دہشتگرد یا جابر کے طور پر پیش کیا جاتا ہے۔ خواتین کی شبیہ بھی اکثر مظلوم اور دبی ہوئی کے طور پر آتی ہے۔

ایران میں بنی فلمیں بھی اپنے معاشرے کی منفی شبیہ عالمی سطح پر پیش کرتی ہیں۔ ان فلموں کو بین الاقوامی فلم فیسٹیولز میں سراہا جاتا ہے۔ مغربی میڈیا انہیں بھرپور پروموٹ کرتا ہے۔ مثال کے طور پر Persepolis(2007) ایک اینی میٹڈ فلم ہے، جس میں 1979 کی انقلاب اور اس کے بعد کے ایران کو ایک نوجوان لڑکی کی نظر سے دکھایا گیا ہے۔فلم میں ایران کو مذہبی شدت پسندی، عورتوں کی آزادی پر پابندی اور اظہار رائے کی آزادی کے خاتمے کی علامت کے طور پر پیش کیا گیا ہے۔ The Circle(2000) میں ایران میں عورتوں کی حالت، سماجی پابندیوں اور صنفی عدم مساوات کو نمایاں کیا گیا ہے۔

Taxi(2015) اور This Is Not a Film(2011) جیسی فلموں میں سنسرشپ، سماجی ناانصافی اور آزادی اظہار کی حدود کو دکھایا گیا ہے۔ Aghazadeh(2020) جیسی ایرانی ٹی وی سیریز میں ملک کے اشرافیہ، بدعنوانی اور اقتدار کے غلط استعمال کو اجاگر کیا گیا ہے۔

ان فلموں اور سیریز میں ایرانی معاشرتی مسائل، ناہمواریوں اور سیاسی جبر کو نمایاں کر کے دکھایا جاتا ہے، جس سے مغربی ناظرین کو یہ پیغام ملتا ہے کہ ایران میں جینا مشکل، غیر روادار اور پسماندگی سے بھرپور ہے۔یہ واضح کرنا ضروری ہے کہ ایرانی معاشرے میں عورتوں کے حقوق کی پامالی اور صنفی امتیاز ایک سنگین اور قابل مذمت مسئلہ ہے، جس کی حمایت نہیں کی جا سکتی۔ حالیہ برسوں میں ایران میں عورتوں پر حجاب اور طرزِ زندگی کے حوالے سے سخت قوانین، سیاسی شرکت کی کمی، شادی، طلاق اور جائیداد کے معاملات میں امتیاز اور عوامی زندگی میں پابندیاں بڑھ گئی ہیں، جنہیں بین الاقوامی انسانی حقوق کے اداروں نے "صنفی اپارتھائیڈ" تک کہا ہے۔لیکن یہ بھی سچ ہے کہ ایسی ہی ظالمانہ پالیسیاں سعودی عرب اور دیگر عرب ممالک میں بھی موجود ہیں، جہاں عورتوں کو برابر سیاسی، سماجی اور قانونی امتیاز کا سامنا کرنا پڑتا ہے۔اس کے باوجود، ہالی ووڈ اور مغربی میڈیا میں صرف ایران کو بار بار منفی انداز میں پیش کیا جاتا ہے، جبکہ سعودی عرب جیسے ممالک پر ایسی تنقیدی فلمیں یا سیریز شاذ و نادر ہی بنتی ہیں۔ اس سے ظاہر ہے کہ کسی ایک ملک کو خاص طور پر نشانہ بنایا جاتا ہے۔ اس کے پیچھے اکثر سیاسی، معاشی اور عسکری مفادات ہوتے ہیں۔

انسانی حقوق کے نام پر امریکہ نے کئی بار فوجی مداخلت کو جائز قرار دیا ہے— جیسے عراق پر "تباہ کن ہتھیاروں" کا جھوٹا الزام لگا کر جنگ مسلط کرنا، حالانکہ بعد میں ثابت ہوا کہ ایسے ہتھیار تھے ہی نہیں۔ان جنگوں کے پیچھے امریکی عسکری-صنعتی نظام، اسلحہ ساز کمپنیاں اور سیاسی مفادات کا گٹھ جوڑ سرگرم ہوتا ہے، جو جنگ اور عدم استحکام سے فائدہ اٹھاتے ہیں۔ اس لیے ضروری ہے کہ جب بھی کسی ایک ملک کو بار بار میڈیا اور فلموں میں نشانہ بنایا جائے، تو اس کے پیچھے کی سیاست اور مفادات کو بھی سمجھا جائے، نہ کہ محض انسانی حقوق کے نام پر کسی فوجی کارروائی کو درست مان لیا جائے۔

اس موضوع پر فلم Viceدیکھی جا سکتی ہے، جو امریکہ کے سابق نائب صدر ڈک چینی کی کہانی ہے۔ ڈک چینی کا کردار اس سیاست کا چہرہ ہے جو جذبات، حب الوطنی اور تحفظ کے نام پر عوام کو دھوکہ دے کر صرف منافع کماتی ہے۔اورینٹلزم کے نظریے کے مطابق، مغرب نے مشرقی ممالک کو ایک جیسے، پسماندہ اور غیر مہذب علاقے کے طور پر پیش کیا ہے، تاکہ مغرب کی برتری قائم کی جا سکے۔ ہالی ووڈ کی فلموں میں یہ نظریہ واضح ہے، جہاں ایران جیسے ممالک کو یکساں، ظالم اور شدت پسند کے طور پر دکھایا جاتا ہے۔یہ رویہ نہ صرف ثقافتی بلکہ سیاسی بھی ہے، جو امریکی اور مغربی مفادات کے تحفظ کے لیے مشرقی ملکوں کی شبیہ کو مسخ کرتا ہے۔ اس طرح ہالی ووڈ کی فلمیں ایک قسم کی "ثقافتی نوآبادیات" کرتی ہیں، جو مغربی بالادستی کو جائز بناتی ہیں۔

ہالی ووڈ کی فلمیں اور ٹی وی سیریز ناظرین کے ذہن میں خاص سوچ اور جذبات پیدا کرنے کے لیے تیار کی جاتی ہیں۔ جب کوئی ملک یا ثقافت بار بار منفی شکل میں پیش کی جاتی ہے، تو ناظرین اس کے بارے میں تعصب اور خوف پیدا کر لیتے ہیں۔امریکی حکومت اور خفیہ ایجنسیاں بھی اس عمل میں سرگرم کردار ادا کرتی ہیں۔ کئی بار وہ فلموں کی تیاری میں مدد دیتی ہیں، اسکرپٹ میں تبدیلی کرواتی ہیں تاکہ امریکی پالیسی کے مطابق بیانیہ تیار ہو۔ اس سے ہالی ووڈ کی فلموں میں امریکی مفادات پورے ہوتے ہیں اور مخالف ملکوں کی شبیہ خراب کی جاتی ہے۔یہ بھی قابل غور ہے کہ ہالی ووڈ اور مغربی میڈیا کی منفی شبیہ سازی صرف ایران تک محدود نہیں ہے۔ روس، چین، کیوبا، شمالی کوریا، عراق، افغانستان جیسے ممالک کے ساتھ بھی یہی طرزِ عمل اپنایا گیا ہے۔ان تمام ملکوں کو فلموں، ٹی وی سیریز اور میڈیا رپورٹس میں بار بار ولن، انسانی حقوق مخالف، دہشتگردی کے حامی یا غیر مہذب کے طور پر پیش کیا گیا ہے۔ 

مثال کے طور پر، "Valley of the Wolves: Iraq" جیسی ترک فلمیں امریکہ کو ولن کے طور پر دکھاتی ہیں، لیکن مغربی میڈیا میں ایسی فلموں کو اکثر "پروپیگنڈہ" یا "متنازع" قرار دیا جاتا ہے۔ جبکہ ہالی ووڈ کی فلموں کو "قدر پر مبنی" یا "حقیقت پر مبنی" کہا جاتا ہے، چاہے وہ تاریخی حقائق کو کتنا ہی توڑ مروڑ کر پیش کریں۔

میڈیا صرف فلموں تک محدود نہیں۔ نیوز چینل، اخبارات، آن لائن پورٹلز اور سوشل میڈیا بھی امریکی خارجہ پالیسی کے مطابق بیانیہ بناتے ہیں۔ تحقیق سے معلوم ہوا ہے کہ امریکی مرکزی میڈیا اکثر حکومتی پالیسیوں کے مطابق خبروں کو پیش کرتا ہے۔جیسے عراق جنگ، شام بحران، یا ایران کے جوہری پروگرام پر رپورٹنگ میں دیکھا گیا ہے۔ میڈیا رپورٹس میں مخالف ملکوں کی منفی خبروں کو نمایاں کیا جاتا ہے، جبکہ امریکہ یا مغرب کی غلطیوں کو نظرانداز یا درست قرار دیا جاتا ہے۔ہالی ووڈ اور مغربی میڈیا نے دہائیوں سے اپنی خارجہ پالیسی کے مخالفین کی شبیہ کو منفی، دقیانوسی اور ولن کے طور پر پیش کیا ہے۔ یہ عمل صرف ہالی ووڈ تک محدود نہیں بلکہ ان ملکوں کی اپنی فلموں میں بھی دیکھا جا سکتا ہے، جہاں خود تنقیدی یا سماجی مسائل کو بین الاقوامی سطح پر بڑھا چڑھا کر دکھایا جاتا ہے۔اس کا مقصد امریکی اور مغربی مداخلت کو اخلاقی، ضروری اور جائز ٹھہرانا ہے، جبکہ مخالف ملکوں کو عالمی خطرے کے طور پر پیش کرنا ہے۔ یہ طریقہ عالمی رائے عامہ سازی، ثقافتی سامراجیت اور تاثر سازی(Perception Management) کا حصہ ہے، جس سے امریکی مفادات کو فائدہ اور مخالف ملکوں کی آواز دبائی جاتی ہے۔ناظرین کے لیے ضروری ہے کہ وہ ان فلموں اور میڈیا بیانیوں کو تنقیدی نگاہ سے دیکھیں، تاکہ سچ اور پروپیگنڈہ میں فرق سمجھ سکیں۔

مصنف پسماندہ فکر رکھنے والے تجزیہ کار ہیں۔