راجیو نارائن

جب اجیت ڈو بھال نے لوک مانیہ تلک نیشنل ایوارڈ 2026 وصول کرنے کے لیے اسٹیج پر قدم رکھا تو انہوں نے ان سنگ میلوں کا ذکر نہیں کیا جنہوں نے انہیں ہندوستان کے ممتاز انٹیلی جنس ماہرین میں شامل کیا۔ اس کے بجائے انہوں نے اس غیر معمولی موقع کی بات کی جو آج ہندوستان کو حاصل ہے اور نوجوانوں سے اپیل کی کہ وہ ایک مضبوط قوم کی تعمیر کے لیے خود کو وقف کریں۔ ان کے یہ الفاظ ان کی شخصیت کی طرح نہایت سادہ مگر گہرے معنی رکھنے والے تھے۔ وہ ایسے شخص ہیں جنہوں نے گزشتہ چھ دہائیوں سے نظر آنے والے اور نظر نہ آنے والے خطرات سے ہندوستان کی حفاظت کی ہے۔

عام طور پر اعزازات ماضی کی کامیابیوں کا اعتراف ہوتے ہیں۔ لیکن ایک حالیہ اعزاز نے مستقبل کی جانب دیکھنے کی دعوت دی۔ یہ موقع پونے میں لوک مانیہ تلک نیشنل ایوارڈ 2026 کی تقریب میں پیش آیا۔ جب اجیت ڈو بھال ایوارڈ وصول کرنے کے لیے اسٹیج پر آئے تو حاضرین کو توقع تھی کہ وہ حسب روایت شکریہ ادا کریں گے۔ مگر ہندوستان کے قومی سلامتی کے مشیر نے اپنی ذاتی کامیابیوں کے بجائے قومی مقصد پر گفتگو کی۔

انہوں نے کہا۔ ہر نسل کا فیصلہ اس بنیاد پر ہوتا ہے کہ وہ زندگی کی طرف سے فراہم کیے گئے مواقع سے کس طرح فائدہ اٹھاتی ہے۔ آج کا وقت عزم۔ نظم و ضبط اور اجتماعی ذمہ داری کے احساس کا تقاضا کرتا ہے۔

ان کے یہ الفاظ سن کر پورا ہال خاموش ہو گیا۔ جب حاضرین نے ان باتوں کے مفہوم کو محسوس کیا تو پورا ہال تالیوں سے گونج اٹھا۔

اجیت ڈو بھال اس ایوارڈ کے ان ممتاز اعزاز یافتگان کی صف میں شامل ہوئے جن میں نریندر مودی۔ سدھا مورتی اور نتن گڈکری جیسے نام شامل ہیں۔ اس نمایاں فہرست میں ان کی شمولیت اپنی نوعیت میں منفرد ہے اور اس کی وجہ بھی انہیں دوسروں سے ممتاز بناتی ہے۔ ان کا پورا پیشہ ورانہ سفر عوامی نگاہوں سے دور گزرا کیونکہ انٹیلی جنس افسران عموماً عوامی شخصیات نہیں بنتے۔ ان کے کام کا اندازہ اس بات سے نہیں لگایا جاتا کہ عوام کیا جانتے ہیں بلکہ اس سے لگایا جاتا ہے کہ انہیں کن باتوں کو جاننے کی کبھی ضرورت ہی پیش نہیں آتی۔ تاہم بعض پیشہ ورانہ زندگیوں کا اثر گمنامی سے کہیں آگے تک پہنچتا ہے۔

مرکزی وزیر داخلہ امت شاہ نے ایوارڈ پیش کرتے ہوئے کہا کہ اجیت ڈو بھال کے دور میں ہندوستان کی مسلح افواج کی دفاعی اور جارحانہ صلاحیتوں میں مکمل تبدیلی آئی ہے۔ شاید ہی کوئی اس حقیقت سے اختلاف کرے کہ آج ملک کا قومی سلامتی کا نظام ایک دہائی پہلے کے مقابلے میں بالکل مختلف نظر آتا ہے۔ اس تبدیلی پر اس شخصیت کی واضح چھاپ دکھائی دیتی ہے جو وزیر اعظم کے ساتھ کابینہ کی سلامتی سے متعلق کمیٹی کے بے شمار اجلاسوں میں شریک رہتی ہے۔

بدلتا ہوا نظریہ

اگر انٹیلی جنس کے میدان میں اجیت ڈو بھال کے برسوں پر محیط تجربے نے ان کی صلاحیتوں کو ثابت کیا تو قومی سلامتی کے مشیر کی حیثیت سے ان کے دور نے ہندوستان کی اسٹریٹجک سوچ اور قومی سلامتی کی اصطلاحات کو نئی شکل دی۔

India’s Silent Shield gets the recognition he deserves.

NSA Ajit Doval has been conferred the Lokmanya Tilak National Award 2026 by Union Home Minister Amit Shah Ji (@AmitShah )

A lifetime dedicated to protecting India’s national interests pic.twitter.com/375XIye4OT

— Midhun Babu / മിഥുൻ ബാബു🇮🇳 (@MidhunBabu_X) August 1, 2026

کئی دہائیوں تک ہندوستان کو ایک ایسے ملک کے طور پر دیکھا جاتا تھا جو اشتعال انگیزی کا جواب تحمل سے دیتا تھا اور سفارتی احتجاج اور عالمی رائے عامہ پر انحصار کرتا تھا۔ گزشتہ ایک دہائی کے دوران یہ تصور تبدیل ہوا ہے۔ اب ہندوستان کے ردعمل زیادہ منظم۔ مربوط اور پراعتماد ہو گئے ہیں۔

2016 میں اڑی حملے کے بعد لائن آف کنٹرول کے پار کیے گئے سرجیکل حملے اور 2019 میں پلوامہ حملے کے بعد بالاکوٹ میں کی گئی فضائی کارروائی اس تبدیلی کی علامت بن گئے۔ اگرچہ یہ کارروائیاں سیاسی قیادت کی نگرانی میں مسلح افواج نے انجام دیں لیکن ان سے ایک ایسے وسیع تر نظریے کی عکاسی ہوتی ہے جس میں انٹیلی جنس۔ سفارت کاری۔ فوجی منصوبہ بندی اور سیاسی فیصلہ سازی ایک دوسرے کے ساتھ قریبی ہم آہنگی کے ساتھ کام کرتے ہیں۔

انٹیلی جنس اداروں کے درمیان بہتر رابطہ۔ دہشت گردی کی مالی معاونت کی روک تھام پر توجہ۔ سرحدی نگرانی۔ بنیادی ڈھانچے کے تحفظ اور سول و فوجی اداروں کے درمیان مؤثر ہم آہنگی بھی اس تبدیلی کے اہم عناصر تھے۔ یہ موضوعات اگرچہ ٹیلی ویژن مباحثوں کا حصہ کم بنے لیکن انہوں نے ایک قابل اعتماد قومی سلامتی کے نظام کی بنیاد مضبوط کی۔

فلسفی جاسوس

برسوں کے دوران اجیت ڈو بھال کو کئی القابات دیے گئے لیکن شاید ان میں سب سے زیادہ موزوں لقب فلسفی جاسوس ہے۔اپنے پیشہ ورانہ سفر کا بڑا حصہ پس منظر میں گزارنے کے باوجود جب بھی انہوں نے عوامی سطح پر گفتگو کی تو غیر معمولی صاف گوئی کا مظاہرہ کیا۔ گزشتہ ایک دہائی کے دوران مختلف اسٹریٹجک فورمز پر دیے گئے اپنے خطابات اور لیکچروں میں ہندوستان کے قومی سلامتی کے مشیر نے ایسی سوچ پیش کی جو صرف انٹیلی جنس کارروائیوں یا فوجی حکمت عملی تک محدود نہیں بلکہ اس سے کہیں وسیع ہے۔انہوں نے ایک موقع پر سوال اٹھایا۔"ہندوستان ایک تہذیبی ریاست ہے۔ کیا ہمارے پاس ایسی کوئی مشترکہ قومی شعوری شناخت ہے جو ہم سب کو ایک دوسرے سے جوڑتی ہو۔"

یہ سوال اس یقین کی عکاسی کرتا ہے کہ کسی بھی قوم کی سب سے بڑی طاقت صرف اس کی سرحدیں نہیں ہوتیں بلکہ وہ اقدار۔ شناخت اور اجتماعی شعور ہوتا ہے جو اس کے عوام کو ایک لڑی میں پروتا ہے۔ اجیت ڈو بھال کے نزدیک قومی سلامتی کی بنیاد قومی خود اعتمادی ہے۔ان کے نظریے میں طاقت کا پیمانہ اب صرف فوجیوں یا میزائلوں کی تعداد نہیں رہا۔ انہوں نے کہا کہ جو لوگ آپ کو اس انداز میں سوچنے پر مجبور کر دیں جو ان کے مفاد میں ہو اصل طاقت انہی کے پاس ہوتی ہے۔

اس بیان سے انہوں نے ایسے دور میں نظریات۔ اطلاعات اور اثر و رسوخ کی بڑھتی ہوئی اہمیت کو اجاگر کیا جس کی شناخت اب سائبر جنگ۔ مصنوعی ذہانت اور ڈیجیٹل ذرائع سے ذہن سازی کے ذریعے ہو رہی ہے۔

شاید اسی لیے انہوں نے یہ بھی خبردار کیا کہ جمہوریت کا انحصار اس بات پر ہے کہ شہریوں کو درست معلومات اور درست تعلیم فراہم کی جائے کیونکہ غلط بیانیے قوموں کی تقدیر کو اتنی ہی گہرائی سے بدل سکتے ہیں جتنی روایتی جنگیں بدلتی ہیں۔

مشترکہ ذمہ داری

اجیت ڈو بھال ہمیشہ اس بات پر زور دیتے رہے ہیں کہ قومی سلامتی صرف حکومت یا سلامتی سے وابستہ اداروں کی ذمہ داری نہیں بلکہ پوری قوم کی مشترکہ ذمہ داری ہے۔انہوں نے ایک موقع پر کہا تھا۔"قومی سلامتی صرف مسلح افواج۔ پولیس یا انٹیلی جنس اداروں کی ذمہ داری نہیں بلکہ پورے ملک کی ذمہ داری ہے۔اس ایک جملے میں ان کا وسیع تر فلسفہ پوشیدہ ہے۔ ان کے نزدیک مضبوط ادارے۔ باشعور شہری اور سماجی ہم آہنگی کسی بھی ملک کے دفاع کے لیے اتنے ہی ضروری ہیں جتنی فوجی تیاری۔

اسی لیے وہ بار بار اس بات پر زور دیتے رہے ہیں کہ کسی بھی ملک کی پائیدار قومی طاقت صرف فوجی قوت پر منحصر نہیں ہوتی بلکہ اس کی معاشی مضبوطی۔ تکنیکی صلاحیت اور مسلسل ترقی بھی اتنی ہی اہم ہوتی ہے۔ شاید ان کی شخصیت کو سب سے بہتر انداز میں ان کا یہ قول بیان کرتا ہے۔"کسی بھی قوم کی طاقت کا اندازہ لگاتے وقت سب سے بڑی غلطی اس کے عوام کے عزم و حوصلے کو نظر انداز کرنا ہے۔"

ان کے مضبوط عزم کے پس منظر میں ایک ایسا مفکر بھی موجود ہے جس نے ہمیشہ ریاستی حکمت عملی کو ایک وسیع تہذیبی تناظر میں دیکھا ہے۔ ایسا تناظر جس میں کردار۔ صلاحیت اور اجتماعی مقصد پر یکساں اعتماد کیا جاتا ہے۔

انہوں نے جن بے شمار کارروائیوں کا تصور پیش کیا۔ جن بحرانوں سے نمٹنے میں اہم کردار ادا کیا اور جن اسٹریٹجک نظریات کی تشکیل میں حصہ لیا۔ ان سب کے باوجود ممکن ہے کہ اجیت ڈو بھال کو اتنا ہی ان خیالات کے لیے یاد رکھا جائے جتنا ان مشنوں کے لیے جن کی انہوں نے قیادت کی۔

وہ اس یقین کے قائل رہے ہیں کہ کسی بھی قوم کا پہلا دفاعی حصار صرف اس کی فوج نہیں ہوتی بلکہ اس کے عوام کا اعتماد۔ اس کے اداروں کی مضبوطی اور اس کی تہذیب کی پائیداری ہوتی ہے۔شاید یہی وہ تصور ہے جس میں اجیت ڈو بھال کی حقیقی شخصیت پوشیدہ ہے۔

مصنف سینئر صحافی اور مواصلاتی امور کے ماہر ہیں۔