غوث سیوانی،نئی دہلی

حجاب عربی زبان کا لفظ ہے.اس کا مطلب ہے کور، لپیٹ، پردہ۔ اس کی مختلف اقسام ہیں اور دنیا کے الگ الگ ملکوں میں اس کی الگ الگ اقسام رائج ہیں۔ ملک،تہذیب ، موسم اورحالات کے تحت حجاب کا ڈیزائن مختلف ہوتاہے۔ یہی سبب ہے کہ دنیا کے مختلف ملکوں میں حجاب کی مختلف قسمیں رائج ہیں۔ذیل میں ہم مختلف قسم کے حجابات کے بارے میں بتارہے ہیں جو دنیا کے الگ الگ خطوں میں رائج ہیں۔

عبایا عباية

یہ اسلامی لباس مکمل لمبائی لئے ہوتاہے۔یہ چغے کی طرح بیرونی لباس ہےجو سرسے پائوں تک بدن کوڈھانپتا ہے۔ اس میں عام طور پر ہیڈ اسکارف بھی شامل ہوتا اوردستانے ونقاب کے ساتھ پہنا جاتا ہے۔سعودی عرب میں اس کا زیادہ رواج ہے۔

الامیرہ

عراقی اسکول گرلس پہنتی ہیں۔ یہ دو ٹکڑوں میں تقسیم پردہ ہے۔ اس کے ساتھ فٹنگ ٹوپی بھی ہوتی ہے، جو عام طور پر روئی یا کسی نرم چیز سے بنی ہوتی ہے۔اس کے ساتھ ٹیوب نما اسکارف ہوتا ہے۔

بشیہ ،حجاب البوشية

ایک پردہ جو ماتھے پر بندھا ہوتا ہے اور پورے چہرے کو ڈھانپنے کے لیے گرتا ہے لیکن آنکھوں کے لیے کوئی کٹ آؤٹ نہیں ہوتا ہے۔یہ مشرق وسطی اور خلیج فارس کے علاقوں میں رائج ہے۔

بخنوق

یہ حجاب پورے بدن کا نہیں ہوتا بلکہ صرف سینہ تک آتا ہے۔ بعض اوقات اسے "عامرہ حجاب" کہا جاتا ہے اگر اس کے کنارے پر کڑھائی ہو۔

بتولا برقع

یہ قدیم اسٹائل کا پردہ ہے۔ خواتین اسے متحدہ عرب امارات، عمان، قطر اور جنوبی ایران کے عربوں میں پہنتی ہیں۔ یہ روایت نئی نسلوں میں تقریباً ختم ہو چکی ہے۔ 50 سے زائد عمر کی خواتین، اور دیہی علاقوں میں رہنے والی خواتین کو اب بھی انہیں پہنے دیکھا جا سکتا ہے۔

برقع:

جوقدیم چیچنیا اور ازبکستان میں پہنا جاتا تھا پھرافغانستان منتقل ہوا۔ یہ روایتی وسطی ایشیائی طرز کا بیرونی لباس ہےجو پورے جسم کو ڈھانپتا ہے اور چہرے پر ایک جالی ہوتی ہے جس سے عورت دیکھتی ہے۔

چادر

ایک قسم کا حجاب ہے۔ یہ ایک ایرانی روایتی بیرونی لباس ہے جوسر اور جسم کو ڈھانپتا ہے اور کپڑے کا ایک مکمل لمبا نیم دائرہ ہے جو زمین تک آتا ہے۔

الیچک

سفید پگڑی والاروایتی حجاب ہے جسےکرغیز خواتین پہنتی ہیں، جو فی الحال خاص مواقع کے لیے مخصوص ہے۔

جلباب

جلباب بھی حجاب کی ہی ایک قسم ہے۔ قرآن کےسورۃ الاحزاب، آیت نمبر59میں حجاب کے لئے جلباب کا لفظ استعمال ہواہے۔انڈونیشیا میں، جلباب کا استعمال ہوتا ہے اور وہ اس سے مراد لیتے ہیں’’سر ڈھانپنا‘‘۔ جلباب بیرونی لباس کی ایک قسم ہےجو لمبے رین کوٹ یا ٹرینچ کوٹ کی طرح دکھائی دیتی ہے۔

کالپاک

حجاب کی ہی ایک قسم ہے جوقازقستان، قراقل اور کرغزستان میں غیر شادی شدہ عورتوں کا روایتی لباس ہے۔تاتاری مسلم خواتین میں یہ لباس عام ہے۔ کیلاگھائی: آذربائیجانی خواتین کی ایک روایتی پوشاک ہے۔یہ بھی بدن کو اچھی طرح ڈھکتاہے۔