چھترپتی سنبھاجی نگر
گزشتہ چند دنوں سے ملک کے کئی حصوں میں طوفانی بارشوں نے تباہی مچا رکھی ہے، خاص طور پر مہاراشٹر کے مرٹھواڑہ علاقے میں کئی ندیوں میں طغیانی آ گئی ہے۔ درجنوں گاؤں کا رابطہ منقطع ہو گیا، ہزاروں ایکڑ کھیت تباہ ہوگئے اور سینکڑوں لوگوں کو اپنے گھروں سے نکل کر محفوظ مقامات کی طرف جانا پڑا۔ اس قدرتی آفت نے بے پناہ نقصان پہنچایا ہے۔
لیکن جہاں ایک طرف فطرت کا قہر دکھائی دیا، وہیں دوسری طرف اسی بحران نے انسانیت کو ایک دوسرے کے قریب لا کھڑا کیا۔ اس دوران کئی ایسے واقعات سامنے آئے جن میں لوگوں نے ذات پات اور مذہب کی دیواریں توڑ کر ایک دوسرے کی مدد کی۔ ایسا ہی ایک واقعہ مہاراشٹر کے ضلع چھترپتی سنبھاجی نگر (سابقہ اورنگ آباد) کے کنڈ شہر میں پیش آیا، جہاں چند مسلم نوجوانوں کی بہادری نے سب کے دل جیت لیے۔
شہر کے شیونگر علاقے سے گزرنے والی شیونا ندی کے کنارے کھیت میں واقع "لنگوٹی مہادیو مندر" بھگوان شیو کو منسوب ہے۔ مندر کے پجاری دیلیپ گیری اپنے دو بھائیوں کے اہلِ خانہ کے ساتھ وہیں رہتے ہیں۔ پچھلے چند دنوں سے ہونے والی موسلا دھار بارش کی وجہ سے ندی میں اچانک طغیانی آگئی اور مندر کے آس پاس کا سارا علاقہ پانی میں گھِر گیا۔ پجاری سمیت کل چھ افراد وہاں پھنس گئے۔ وہ پوری رات خوف اور بے بسی میں گزارتے رہے، اور صبح ہوتے ہی مدد کے لیے پکارنے لگے۔
جیسے ہی ان کی آواز محلے میں سنی گئی، چند نوجوان — فیضل حسن پٹھان، سلمان پٹھان، اظہر پٹھان، فیاض پٹھان، سونو لال پٹھان، ایاز حسن پٹھان، انیس سلیم پٹھان — اور ان کے دوست ولاس جا دھو فوراً مدد کے لیے پہنچ گئے۔ انہوں نے مذہب اور ذات پات کی دیواریں ایک طرف رکھ دیں اور جان کی پروا کیے بغیر تیز بہاؤ والے پانی میں اتر گئے۔ کمر تک پانی میں چلتے ہوئے انہوں نے پجاری دیلیپ گیری کو کندھے پر اٹھایا اور ایک ایک کر کے ان کے تمام اہلِ خانہ کو محفوظ جگہ پہنچا دیا۔
ان مسلم نوجوانوں کی بہادری اور انسان دوستی کی بدولت پجاری اور ان کا خاندان بحفاظت بچا لیا گیا۔ یہ واقعہ ہندو مسلم یکجہتی اور سماجی ہم آہنگی کی ایک روشن مثال بن گیا ہے۔ ان نوجوانوں کے حوصلے، خدمت اور ایثار کی ہر طرف تعریف ہو رہی ہے۔
