نئی دہلی: دہلی ہائی کورٹ نے منگل کو کہا کہ جو شخص سیاست میں ہوتا ہے اسے ’’موٹی کھال‘‘ (یعنی تنقید برداشت کرنے کی صلاحیت) والا ہونا چاہیے، لیکن طنز اور ہتک عزت کے درمیان فرق کرنا ضروری ہے۔ جسٹس امت بَنسل نے بی جے پی رہنما اور سینئر وکیل گورَو بھاٹیا کی ایک عرضی پر سماعت کرتے ہوئے یہ تبصرہ کیا۔

عرضی میں بھاٹیا نے اس ماہ کے آغاز میں ایک ٹی وی نیوز پروگرام میں ان کے لباس کو لے کر سوشل میڈیا سے ’’توہین آمیز‘‘ مواد ہٹانے کی مانگ کی ہے۔ پروگرام میں انہیں مبینہ طور پر ’’بغیر پینٹ/پاجامے‘‘ کے کُرتا پہنے دیکھا گیا تھا۔ بھاٹیا کی جانب سے پیش ہوئے وکیل نے عدالت کو بتایا کہ انہوں نے ’شورٹس‘ پہنے ہوئے تھے اور کیمرہ مین نے غلطی سے ان کے جسم کے نچلے حصے کو دکھا دیا۔

انہوں نے دعویٰ کیا کہ اس واقعے سے متعلق سوشل میڈیا پوسٹس بھاٹیا کی نجی زندگی کی خلاف ورزی کرتے ہیں اور توہین آمیز تبصرے ہٹائے جانے چاہئیں۔ جج نے کہا کہ عدالت کو یکطرفہ حکمِ امتناعی (injunction) جاری کرتے وقت بہت احتیاط برتنی چاہیے اور معاملے کی اگلی سماعت 25 ستمبر کو مقرر کر دی۔ جج نے کہا: ’’ہمیں بہت محتاط رہنا ہوگا۔

سپریم کورٹ نے کہا ہے کہ ایسے معاملات میں یکطرفہ حکم جاری نہیں کیا جانا چاہیے۔‘‘ وکیل نے دلیل دی کہ تصویر ان کے گھر کی ’’پرائیویسی میں لی گئی تھی‘‘ اور بغیر اجازت نشر نہیں کی جانی چاہیے تھی۔ انہوں نے کہا: ’’یہ میری (بھاٹیا کی) پرائیویسی کی خلاف ورزی ہے۔ میں اپنے گھر کی پرائیویسی میں بیٹھا تھا۔ ایسی تصاویر میری اجازت کے بغیر نشر نہیں کی جا سکتیں۔‘‘ اس پر جج نے کہا: ’’وہ آپ کے گھر میں زبردستی نہیں گھسے تھے۔‘‘

جج نے مزید کہا: ’’جب آپ سیاست میں ہیں تو آپ کو موٹی کھال والا ہونا پڑے گا۔ ہمیں یہ جانچنا ہوگا کہ کیا طنزیہ ہے اور کیا توہین آمیز۔ فی الحال ہمیں طنزیہ اور توہین آمیز تبصروں میں فرق کرنا ہوگا۔‘‘ تاہم جج نے کہا کہ ’’فحش تبصرے ضرور ہٹائے جائیں گے۔‘‘