نئی دہلی: دہلی ہائی کورٹ نے منگل کو اس درخواست پر سماعت کرنے پر رضامندی ظاہر کی، جس میں الزام لگایا گیا ہے کہ صفائی کارکن کے قتل کے خلاف احتجاج کرنے کے بعد عام آدمی پارٹی (آپ) کے رکن اسمبلی کلدیپ کمار کو غیر قانونی طور پر حراست میں رکھا گیا ہے۔

چیف جسٹس جسٹس ڈی کے اپادھیائے اور جسٹس تیجس کریا پر مشتمل بنچ کے سامنے بندے کو عدالت میں پیش کرنے (Habeas Corpus) کی درخواست کو فوری سماعت کے لیے فہرست میں شامل کرنے کی اپیل کی گئی۔ وکیل نے کہا، ’’کل وہ (رکن اسمبلی) علاقے میں ایک صفائی کارکن کے قتل کے خلاف احتجاج کی قیادت کر رہے تھے اور معاوضے کا مطالبہ کر رہے تھے۔ آج صبح انہیں حراست میں لے لیا گیا۔‘‘ بنچ نے آج اس معاملے کو سماعت کے لیے فہرست میں شامل کرنے پر رضامندی ظاہر کر دی۔ پیر کو دہلی کے سیکڑوں صفائی کارکنوں اور ’آٹو ٹپر‘ ڈرائیوروں نے کلیان پوری میں ڈیوٹی کے دوران ایک صفائی کارکن کے قتل کے خلاف لال بہادر شاستری اسپتال میں احتجاج کیا تھا۔

’آٹو ٹپر‘ تین پہیوں یا چھوٹے چار پہیوں والی ان گاڑیوں کو کہا جاتا ہے جنہیں میونسپل کارپوریشن یا مقامی ادارے گھر گھر سے کچرا جمع کرنے کے لیے استعمال کرتے ہیں۔ مظاہرین نے ایک کروڑ روپے معاوضے اور متوفی کے خاندان کے ایک فرد کو مستقل سرکاری ملازمت دینے کا مطالبہ کیا۔ متوفی انیل دہلی میونسپل کارپوریشن کے لیے ایک نجی کمپنی کے ذریعے کنٹریکٹ پر صفائی کارکن کے طور پر کام کرتے تھے۔ الزام ہے کہ اتوار کی صبح کلیان پوری میں کچرا جمع کرتے وقت انہیں چاقو مار دیا گیا تھا۔