نئی دہلی: لوک سبھا میں جمعہ کے روز اپوزیشن کے اراکین نے 2023 میں منظور ہونے والے خواتین ریزرویشن ایکٹ کو نافذ کرنے سے پہلے اس میں ترمیمی بل لانے پر حکومت کو نشانہ بنایا اور وضاحت کا مطالبہ کیا۔ ایوان میں ضروری دستاویزات پیش کیے جانے کے فوراً بعد کانگریس رہنما کے۔سی۔ وینوگوپال نے جمعرات کی رات تقریباً 10 بجے وزارتِ قانون کی جانب سے جاری کردہ نوٹیفکیشن کا معاملہ اٹھایا۔

انہوں نے کہا، "ایکٹ کو نوٹیفائی کیے بغیر وزیر ترمیم کیسے لے آئے؟" ڈی ایم کے کی کنیموزی نے بھی اصل ایکٹ کو نوٹیفائی کرنے کے بعد ترمیمی بل پر بحث کرانے پر حیرت کا اظہار کیا۔ انہوں نے کہا، "حکومت نے کل رات 10 بجے ایکٹ کو نوٹیفائی کیا ہے، اب اس پر بحث کیسے ہو سکتی ہے؟"

اپوزیشن اراکین نے لوک سبھا میں موجود وزیر قانون ارجن رام میگھوال سے وضاحت طلب کی۔ لوک سبھا اور ریاستی اسمبلیوں میں خواتین کے لیے 33 فیصد ریزرویشن فراہم کرنے والا خواتین ریزرویشن ایکٹ 2023 جمعرات کی رات نوٹیفائی کر دیا گیا تاکہ پارلیمنٹ میں مجوزہ ترمیم کو نافذ کیا جا سکے۔ ایک اہلکار نے بتایا کہ اس قانون کو نافذ کرنا ضروری تھا، کیونکہ اس کے بغیر مجوزہ ترمیم مؤثر نہیں ہو سکتی تھی۔ آئینی ترمیمی بل قانون تو بن گیا تھا، لیکن حکومت کی جانب سے اسے نافذ نہ کیے جانے کی وجہ سے یہ آئین کا حصہ نہیں بن پایا تھا۔