نئی دہلی

وزیرِ اعظم نریندر مودی نے جمعرات کے روز حزبِ اختلاف سے اپیل کی کہ وہ خواتین کے ریزرویشن قانون کے نفاذ سے متعلق حکومتی بلوں کو سیاسی رنگ نہ دیں، اور خبردار کیا کہ وہ اس بات کو یاد رکھیں کہ ماضی میں اس کی مخالفت کرنے والوں کو انتخابات میں سخت نقصان اٹھانا پڑا تھا۔

حلقہ بندی کے حوالے سے خدشات کو دور کرتے ہوئے انہوں نے یقین دلایا کہ مشرق سے مغرب اور شمال سے جنوب تک کسی بھی ریاست کے ساتھ ناانصافی نہیں ہوگی۔لوک سبھا میں خواتین کے کوٹے کے قانون میں ترمیم اور حلقہ بندی کمیشن کے قیام سے متعلق تین بلوں پر بحث کے دوران مداخلت کرتے ہوئے مودی نے کہا کہ اگر تمام فریق ان بلوں کی حمایت کریں تو اس سے کسی ایک جماعت کی سیاست کو فائدہ نہیں ہوگا بلکہ پورے ملک کے مفاد میں ہوگا۔

انہوں نے کہا کہ جب سے خواتین کے ریزرویشن کا موضوع زیرِ بحث آیا ہے، ماضی میں اس کی مخالفت کرنے والوں کو ملک کی خواتین نے معاف نہیں کیا اور انہیں بعد کے انتخابات میں نقصان اٹھانا پڑا۔خواتین کے کوٹے کے قانون میں ترمیم کے لیے آئین (131واں ترمیمی) بل جمعرات کے روز ووٹنگ کے بعد لوک سبھا میں پیش کیا گیا۔اس کے ساتھ دو عام بل  حلقہ بندی بل اور مرکزی زیرِ انتظام علاقوں کے قوانین (ترمیمی) بل — بھی ایوان میں پیش کیے گئے، جن کا مقصد دہلی، پڈوچیری اور جموں و کشمیر جیسے علاقوں میں مجوزہ ترمیم شدہ خواتین ریزرویشن قانون کو نافذ کرنا ہے۔

اپنے خطاب میں مودی نے کہا کہ قانون ساز اداروں میں خواتین کے ریزرویشن کے معاملے کو سیاسی رنگ دینے کی کوئی ضرورت نہیں ہے۔انہوں نے کہا کہ ہم سب اراکینِ پارلیمنٹ کو خواتین کو ریزرویشن دینے کے اس اہم موقع کو ضائع نہیں کرنا چاہیے۔انہوں نے کہا کہ ہندوستان کی ترقی کے سفر میں اراکینِ پارلیمنٹ کو خواتین کو فیصلہ سازی کا حصہ بنانے کا موقع ملا ہے۔

مودی نے کہا کہ میں آپ سب سے اپیل کرتا ہوں کہ اسے سیاسی زاویے سے نہ دیکھیں، یہ قومی مفاد کا فیصلہ ہے۔اس سے قبل تقریباً 40 منٹ تک جاری رہنے والی گرما گرم بحث کے بعد حزبِ اختلاف نے آئینی (131واں ترمیمی) بل پیش کرنے کے لیے ووٹنگ کا مطالبہ کیا تھا۔ بعد میں یہ بل 251 ارکان کی حمایت اور 185 ارکان کی مخالفت کے ساتھ پیش کیا گیا۔