نئی دہلی: خواتین اراکینِ پارلیمنٹ نے خواتین کے لیے ریزرویشن قانون میں ترمیم اور اسے جلد نافذ کرنے کے مرکزی حکومت کے منصوبے کا خیرمقدم کرتے ہوئے منگل کو کہا کہ اس قدم سے حکمرانی میں خواتین کی شمولیت مزید مضبوط ہوگی۔

جنتا دل (یو) کی رکن پارلیمنٹ لولی آنند نے اسے "خوش آئند قدم" قرار دیا اور کہا کہ سیاست میں خواتین کی زیادہ شمولیت سے ملک کی ترقی میں تیزی آئے گی۔ انہوں نے پارلیمنٹ ہاؤس کمپلیکس میں صحافیوں سے گفتگو کرتے ہوئے کہا، "یہ ایک نہایت خوش آئند اور قابلِ تعریف قدم ہے۔ جب خواتین آگے آئیں گی تب ہی ملک ترقی کرے گا۔ مرد اور خواتین ایک گاڑی کے دو پہیوں کی مانند ہیں۔

وزیر اعظم اور بہار کے وزیر اعلیٰ دونوں نے خواتین کو بااختیار بنانے کی سمت میں کام کیا ہے۔" لولی آنند نے مزید کہا، "آج خواتین ہر شعبے میں کام کر رہی ہیں۔ جب خواتین بڑی تعداد میں مرکزی دھارے کی سیاست میں داخل ہوں گی تو ملک اور بھی تیزی سے ترقی کرے گا۔ دونوں نے آدھی آبادی کے ساتھ انصاف کیا ہے اور میں اس کے لیے ان کی شکر گزار ہوں۔"

بھارتیہ جنتا پارٹی کی رکن پارلیمنٹ کملجیت سہراوت نے کہا کہ خواتین ریزرویشن قانون کی منظوری سے وزیر اعظم نریندر مودی کی جانب سے ملک کی "آدھی آبادی" سے کیا گیا ایک پرانا وعدہ پورا ہو گیا ہے۔ سہراوت نے کہا، "اس ملک میں بہت سے لوگوں نے خواتین کے بارے میں بات کی ہے، لیکن ناری شکتی وندن ایکٹ لانے کی کوشش اور اسے کامیاب بنانے کا سہرا وزیر اعظم کو جاتا ہے۔

سماج وادی پارٹی کی رکن پارلیمنٹ اقرا حسن نے بھی اس اقدام کا خیرمقدم کیا، لیکن کہا کہ اس بات پر وضاحت ضروری ہے کہ ریزرویشن کو کس طرح نافذ کیا جائے گا۔ انہوں نے کہا، "یہ بہت اہم ہے کہ ہمارے ملک میں خواتین کے لیے ریزرویشن ہو، لیکن اسے کیسے نافذ کیا جائے گا اور اس کے معیار کیا ہوں گے، اس پر غور کرنے کی ضرورت ہے۔

ذرائع نے پیر کو بتایا کہ حکومت پارلیمنٹ کے جاری بجٹ اجلاس میں دو بل پیش کرنے کی خواہش رکھتی ہے تاکہ لوک سبھا اور ریاستی اسمبلی حلقوں کے لیے حد بندی (ڈیلیمٹیشن) کے عمل سے پہلے خواتین ریزرویشن قانون کو نافذ کیا جا سکے۔ مرکزی وزیر داخلہ امت شاہ نے پیر کو اتفاقِ رائے پیدا کرنے کے لیے قومی جمہوری اتحاد (این ڈی اے) کے کچھ اتحادی جماعتوں اور اپوزیشن کی چند علاقائی جماعتوں کے رہنماؤں کے ساتھ الگ الگ ملاقاتیں کیں۔ ذرائع کے مطابق، اگر اتفاقِ رائے قائم ہو جاتا ہے تو دونوں بل اسی ہفتے پیش کیے جا سکتے ہیں۔

لوک سبھا اور ریاستی اسمبلیوں میں خواتین کو 33 فیصد ریزرویشن دینے کے لیے 2023 میں آئینی ترمیمی بل منظور کیا گیا تھا، تاہم اسے حد بندی کے عمل کے بعد ہی نافذ کیا جا سکتا ہے۔ اس قانون کو "ناری شکتی وندن ایکٹ" کے نام سے جانا جاتا ہے۔ ذرائع کے مطابق زیرِ غور خاکے کے تحت لوک سبھا کی نشستوں کی تعداد موجودہ 543 سے بڑھا کر 816 کر دی جائے گی، جن میں سے 273 نشستیں خواتین کے لیے مخصوص ہوں گی۔