نئی دہلی/ آواز دی وائس
آدھار کارڈ کے ذریعے ملک بھر کی تمام ریاستوں میں لوگوں کو سرکاری اسکیموں کا فائدہ ملتا ہے۔ یو آئی ڈی اے آئی نے نومبر 2019 میں ریاستی حکومتوں کو ریاستی اسکیموں کے لیے آدھار ویری فکیشن کا اختیار دیا تھا۔ ایسے میں اب دہلی کی ریکھا گپتا حکومت نے اعلان کیا ہے کہ ریاست کی سرکاری اسکیموں کے لیے آدھار کارڈ لازمی ہوگا۔
دراصل، دہلی کی بی جے پی حکومت نے آدھار کارڈ کی لازمی شرط کو لے کر دہلی کے لیفٹیننٹ گورنر وی کے سکسینہ کو تجویز بھیجی تھی اور اسے لیفٹیننٹ گورنر نے منظور کر لیا ہے۔ دارالحکومت میں کئی سرکاری اسکیموں کے تحت مالی فائدہ حاصل کرنے کے لیے آمدنی کا سرٹیفکیٹ ایک اہم دستاویز ہے۔
لیفٹیننٹ گورنر نے جاری کیا بیان
راج نیواس کی جانب سے جاری ایک بیان میں کہا گیا ہے کہ اس قدم کا مقصد درخواست گزاروں کو آمدنی کا سرٹیفکیٹ جاری کرنے میں کسی بھی بے ضابطگی یا بدعنوانی کو ختم کرنا ہے اور اس طرح یہ یقینی بنانا ہے کہ کسی اسکیم یا مالی امداد کے تحت رجسٹرڈ صرف حقیقی مستفیدین کو ہی فائدہ ملے۔
دہلی حکومت نے دی تھی تجویز
وزیراعلیٰ ریکھا گپتا کی جانب سے دی گئی تجویز میں آمدنی کا سرٹیفکیٹ جاری کرنے کی سروس کو آدھار ایکٹ 2016 کی دفعہ 7 کے تحت لانے کا انتظام ہے۔ یہ دفعہ ریاست یا مرکزی حکومت کو یہ اجازت دیتی ہے کہ ریاست کی سبسڈی، خدمات یا فائدہ حاصل کرنے والے افراد کی شناخت کے لیے آدھار پر مبنی توثیق لازمی بنائی جائے۔
ان اسکیموں کے لیے ضروری ہے آدھار کارڈ
ریونیو ڈپارٹمنٹ کی جانب سے جاری آمدنی کا سرٹیفکیٹ کئی فلاحی اسکیموں کے لیے اہلیت کا تعین کرنے کے لیے استعمال کیا جاتا ہے، جن میں ایس سی، ایس ٹی اور او بی سی کمیونٹی کے طلبہ کے لیے ٹیوشن فیس کی واپسی؛ پنشن اور دہلی آروگیہ کوش کے تحت صحت سے متعلق مالی امداد شامل ہے۔
اس معاملے میں ریونیو ڈپارٹمنٹ کے افسران نے بتایا کہ آدھار کے استعمال سے خدمات دینا آسان ہوگا اور شفافیت بھی بڑھے گی۔ اس کے ساتھ ہی آدھار کارڈ کی وجہ سے اسکیموں کا فائدہ انہی لوگوں تک پہنچے گا، جو اس کے اہل ہوں گے۔
