نئی دہلی: کانگریس کے سابق صدر راہل گاندھی نے کیرالہ اسمبلی انتخابات میں پارٹی کی قیادت والے اتحاد یو ڈی ایف کی جیت پر پیر کے روز ریاست کے عوام کا شکریہ ادا کیا اور کہا کہ نئی حکومت ریاست کی صلاحیت اور قابلیت کا بھرپور استعمال کرے گی۔

کیرالہ اسمبلی انتخابات میں پیر کو کانگریس کی قیادت والا یو ڈی ایف زبردست جیت کی طرف بڑھ رہا ہے اور وہ تقریباً 100 نشستوں پر آگے چل رہا ہے یا جیت چکا ہے۔ راہل گاندھی نے ‘ایکس’ (سابقہ ٹوئٹر) پر پوسٹ کیا: “واقعی ایک فیصلہ کن مینڈیٹ کے لیے کیرالہ میں میرے بھائیوں اور بہنوں کا شکریہ۔ سخت مقابلے اور بہترین مہم چلانے کے لیے ہر یو ڈی ایف لیڈر اور کارکن کو مبارکباد۔

جیسا کہ میں نے پہلے کہا تھا، کیرالہ میں صلاحیت ہے، کیرالہ میں قابلیت ہے، اور اب کیرالہ میں یو ڈی ایف کی حکومت ہے جس کا مقصد ان دونوں کا بہتر استعمال کرنا ہے۔” انہوں نے مزید کہا: میں جلد ہی اپنے کیرالہ کے خاندان سے ملنے کے لیے پُرجوش ہوں۔