نئی دہلی: کانگریس نے اراولی کے معاملے پر منگل کے روز ایک بار پھر مودی حکومت کو نشانہ بنایا اور سوال اٹھایا کہ آخر وہ اس پہاڑی سلسلے کو دوبارہ تعریف دینے پر اتنی بضد کیوں ہے؟ پارٹی کے جنرل سیکریٹری جے رام رمیش نے کہا کہ اس معاملے پر ماحولیاتی وزیر بھوپیندر یادو کی جانب سے دیا گیا ’’وضاحتی بیان‘‘ مزید سوالات کو جنم دیتا ہے۔

بھوپیندر یادو نے پیر کے روز کانگریس پر الزام لگایا تھا کہ وہ اراولی کی نئی تعریف کے معاملے میں ’’غلط معلومات‘‘ اور ’’جھوٹ‘‘ پھیلا رہی ہے۔ انہوں نے کہا تھا کہ اس پہاڑی سلسلے کے صرف 0.19 فیصد حصے میں ہی قانونی طور پر کانکنی کی اجازت ہے۔ یادو نے یہاں ایک پریس کانفرنس میں کہا تھا کہ نریندر مودی حکومت اراولی کے تحفظ اور بحالی کے لیے ’’مکمل طور پر پُرعزم‘‘ ہے۔ رمیش نے سوشل میڈیا پلیٹ فارم ’’ایکس‘‘ پر پوسٹ کیا، ’’اراولی کے معاملے پر ماحولیات، جنگلات اور موسمیاتی تبدیلی کے وزیر کی جانب سے حال ہی میں دیا گیا ’وضاحتی بیان‘ مزید شکوک و شبہات کو جنم دیتا ہے۔

وزیر کے مطابق اراولی کے کل 1.44 لاکھ مربع کلومیٹر رقبے میں سے صرف 0.19 فیصد رقبہ اس وقت کانکنی کے پٹوں کے تحت ہے۔ لیکن یہ بھی تقریباً 68 ہزار ایکڑ زمین بنتی ہے، جو بذاتِ خود ایک بہت بڑا علاقہ ہے۔‘‘ انہوں نے دعویٰ کیا کہ 1.44 لاکھ مربع کلومیٹر کا یہ عدد و شمار بھی گمراہ کن ہے۔ رمیش کے مطابق، ’’اس میں چار ریاستوں کے 34 اضلاع کا پورا جغرافیائی رقبہ شامل کر لیا گیا ہے، جنہیں وزارت نے ’اراولی اضلاع‘ قرار دیا ہے۔ یہ ایک غلط بنیاد ہے۔‘‘

کانگریس رہنما نے کہا کہ درست بنیاد یہ ہونی چاہیے کہ ان اضلاع کے اندر حقیقی اراولی پہاڑی سلسلے کا کتنا علاقہ آتا ہے۔ رمیش کے مطابق، اگر اصل اراولی علاقے کو بنیاد بنایا جائے تو 0.19 فیصد کا یہ دعویٰ بہت کم اندازہ ثابت ہوگا۔

انہوں نے مزید کہا، ’’ان 34 اضلاع میں سے 15 اضلاع کے اعداد و شمار کی تصدیق ممکن ہے، اور ان میں اراولی کا علاقہ کل زمین کا تقریباً 33 فیصد ہے۔ اس بات پر بالکل بھی وضاحت نہیں ہے کہ نئی تعریف کے تحت ان اراولی علاقوں کا کتنا حصہ تحفظ سے باہر کر دیا جائے گا اور کانکنی و دیگر ترقیاتی سرگرمیوں کے لیے کھول دیا جائے گا۔‘

‘ رمیش نے کہا، ’’اگر وزیر کی تجویز کے مطابق مقامی حالات کو بنیاد بنایا جاتا ہے تو 100 میٹر سے زیادہ اونچائی والی کئی پہاڑیاں بھی تحفظ کے دائرے سے باہر ہو جائیں گی۔‘‘ انہوں نے کہا کہ ترمیم شدہ تعریف کے باعث دہلی-این سی آر میں اراولی کی بیشتر پہاڑی پٹیاں رئیل اسٹیٹ ترقی کے لیے کھول دی جائیں گی، جس سے ماحولیاتی دباؤ مزید بڑھ جائے گا۔ رمیش نے کہا، وزیر، جو کانکنی کی اجازت دینے کے لیے سرِسکا ٹائیگر ریزرو کی سرحدوں کو دوبارہ متعین کرنے کی پہل کر رہے ہیں، اس بنیادی حقیقت کو نظر انداز کر رہے ہیں کہ آپس میں جڑے ہوئے ماحولیاتی نظام کو ٹکڑوں میں بانٹنے سے اس کی ماحولیاتی وسعت کو شدید نقصان پہنچتا ہے۔

دیگر مقامات پر ایسا بکھراؤ پہلے ہی شدید تباہی کا سبب بن چکا ہے۔ انہوں نے زور دیتے ہوئے کہا، اراولی ہماری قدرتی وراثت کا حصہ ہیں اور ان کی ماحولیاتی اہمیت نہایت وسیع ہے۔ انہیں بڑے پیمانے پر بحالی اور بامعنی تحفظ کی ضرورت ہے۔‘ آخر میں انہوں نے سوال کیا کہ پھر مودی حکومت انہیں دوبارہ تعریف دینے پر کیوں تُلی ہوئی ہے؟ کس مقصد کے لیے؟ کس کے فائدے کے لیے؟ اور بھارتی جنگلاتی سروے جیسی پیشہ ور ادارے کی سفارشات کو جان بوجھ کر کیوں نظر انداز کیا جا رہا ہے؟