نئی دہلی: لوک سبھا میں قائدِ حزبِ اختلاف راہل گاندھی نے بدھ (11 فروری 2026) کو بجٹ اجلاس کے دوران ایپسٹین فائلز کا ذکر کیا، جس کے بعد ملک میں سیاسی گرما گرمی بڑھ گئی۔ اس معاملے پر مرکزی وزیر ہردیپ سنگھ پوری نے کہا کہ نوجوان رہنما (راہل گاندھی) کو معلوم ہونا چاہیے کہ ایپسٹین فائلز غلط کاموں اور مجرمانہ معاملات سے متعلق ہیں۔

انہوں نے کہا، ایپسٹین فائلز میں الزامات ہیں کہ اس کے پاس ایک جزیرہ تھا جہاں وہ لوگوں کو ان کی جنسی خواہشات پوری کرنے کے لیے لے جاتا تھا۔ اس پر بچوں کے جنسی استحصال کے الزامات ہیں اور متاثرین موجود ہیں۔ ان متاثرین نے حکام کے خلاف مقدمات درج کرائے ہیں۔ میری بات چیت کا اس سے کوئی تعلق نہیں تھا۔

مرکزی وزیر ہردیپ پوری نے واضح کیا کہ انہوں نے جیفری ایپسٹین سے ملاقات کی تھی، لیکن یہ ملاقات انٹرنیشنل پیس انسٹی ٹیوٹ (IPI) کے ایک وفد کے رکن کی حیثیت سے ہوئی تھی۔ انہوں نے کہا، "سال 2009 میں جب میں امریکہ میں سفیر تھا تب یہ ملاقات ہوئی۔ پوری حقیقت پبلک ڈومین میں موجود ہے۔ عوامی طور پر تقریباً 30 لاکھ ای میلز دستیاب ہیں۔ آٹھ سال بعد میں وزیر بنا۔ اس دوران 3-4 ملاقاتوں کا ذکر ہے۔"

انہوں نے کہا کہ ایپسٹین سے ان کی ملاقات صرف ایک بین الاقوامی وفد کے تحت ہوئی تھی۔ کانگریس کے رکنِ پارلیمنٹ راہل گاندھی نے پارلیمنٹ میں کہا، "ایک تاجر ہیں جن کا نام انیل امبانی ہے، انہیں جیل کیوں نہیں ہوئی؟ اس کی وجہ یہ ہے کہ ان کا نام ایپسٹین فائلز میں ہے۔ میں ہردیپ پوری سے بھی پوچھنا چاہتا ہوں کہ انیل امبانی کو ایپسٹین سے کس نے ملوایا تھا۔

ہردیپ پوری بھی جانتے ہیں کہ کس نے انہیں ملوایا تھا۔" ایوان کے باہر راہل گاندھی نے کہا، "امریکہ کے محکمۂ انصاف کے پاس ایپسٹین فائلز موجود ہیں، جن میں ہردیپ پوری اور انیل امبانی کے نام شامل ہیں۔ مرکزی وزیر ہردیپ سنگھ پوری نے کہا، راہل گاندھی کو بے بنیاد الزامات لگانے کی عادت ہے۔

نومبر 2014 میں میں ایک عام شہری تھا۔ ایپسٹین کے رابطے کے ایک شخص نے امریکہ کے ویسٹ کوسٹ میں ہماری ملاقات لنکڈ اِن کے بانی ریڈ ہوفمین سے کرائی تھی۔ کسی نے کہا تھا کہ وہ بھارت کو دیکھنا چاہتے ہیں۔ میں نے اپنے ای میل میں لکھا تھا کہ آج بھارت ایک شاندار موقع پیش کر رہا ہے اور ریڈ ہوفمین کو بھارت آ کر آنے والی تبدیلیوں کو دیکھنا چاہیے۔