چنڈی گڑھ: کانگریس رہنما راہل گاندھی نے بھارتیہ جنتا پارٹی (بی جے پی) کے رہنماؤں میں کیپٹن امریندر سنگھ کو اپنا پسندیدہ رہنما قرار دیا ہے۔ دوسری جانب پنجاب کے سابق وزیر اعلیٰ نے کہا ہے کہ راہل گاندھی اور ان کی والدہ سونیا گاندھی کے ساتھ ان کے ذاتی اور خاندانی تعلقات ہمیشہ برقرار رہیں گے، تاہم سیاسی طور پر وہ بی جے پی کے ساتھ وابستہ ہیں۔

راہل گاندھی کا یہ تبصرہ کانگریس رہنما کی جانب سے سوشل میڈیا پلیٹ فارم ’انسٹاگرام‘ پر شیئر کی گئی ایک ویڈیو میں سامنے آیا۔ گاندھی نے کہا، ’’میری ان سے اچھی بنتی ہے، وہ کافی کول ہیں۔ وہ فوجی تاریخ کے ماہر ہیں۔ ہیلو، انکل امریندر!‘‘ نوجوان نسل، خصوصاً جین زی، تک پہنچنے کی ایک نئی کوشش کے تحت راہل گاندھی نے جمعرات کو انسٹاگرام پر ’’مجھ سے کچھ بھی پوچھیں‘‘ سیشن شروع کیا اور کئی سوالات کے جواب دیے۔ راہل گاندھی کے تبصرے پر ردعمل ظاہر کرتے ہوئے کیپٹن امریندر سنگھ نے جمعہ کو کہا کہ انہیں اچھا لگا کہ راہل نے ان کے بارے میں اچھی باتیں کہیں۔

انہوں نے کہا کہ وہ راہل اور پرینکا گاندھی کو اس وقت سے جانتے ہیں جب وہ بچے تھے، جبکہ ان کے والد اور سابق وزیر اعظم آنجہانی راجیو گاندھی ان کے ہم جماعت اور دوست تھے۔ امریندر سنگھ نے کہا کہ بھارت کو چھوڑ کر دنیا بھر میں ذاتی تعلقات سیاسی وابستگیوں سے الگ ہوتے ہیں۔ انہوں نے کہا، ’’راہل اور ان کی والدہ سونیا گاندھی کے ساتھ میرے ذاتی اور خاندانی تعلقات ہمیشہ برقرار رہیں گے، لیکن سیاسی طور پر میں بھارتیہ جنتا پارٹی کے لیے پرعزم ہوں۔‘‘

امریندر نے یاد کرتے ہوئے بتایا کہ 1980 میں وہ کانگریس کے رکن پارلیمنٹ تھے، جبکہ ان کی والدہ آنجہانی مہارانی موہندر کور ایک مخالف جماعت سے رکن پارلیمنٹ تھیں۔ انہوں نے سوال کیا، ’’کیا اس کا مطلب یہ ہے کہ میری اپنی والدہ سے میری نہیں بنتی تھی؟‘‘ پنجاب بی جے پی کے سینئر ترجمان پریت پال سنگھ بلیوال نے کہا کہ ’’کیپٹن صاحب پنجاب کے سب سے بڑے رہنما ہیں۔‘‘ انہوں نے الزام لگایا کہ کانگریس کی پنجاب یونٹ میں زبردست اندرونی اختلافات کے دوران گاندھی کو امریندر کی یاد آ رہی ہے۔

کانگریس رہنما رانا گر جیت سنگھ نے بھی کہا کہ دونوں رہنماؤں کے خاندانی تعلقات ہیں اور سابق وزیر اعلیٰ ایک قابل احترام رہنما ہیں۔ تاہم، جب ان سے پوچھا گیا کہ کیا وہ امریندر کی کانگریس میں واپسی چاہتے ہیں تو انہوں نے کہا، ’’میں کچھ نہیں چاہتا۔‘‘ بعد میں انہوں نے کہا کہ امریندر کو کانگریس نہیں چھوڑنی چاہیے تھی۔

امریندر سنگھ 2017 میں 117 رکنی پنجاب اسمبلی میں کانگریس کو زبردست کامیابی دلا کر دوسری مرتبہ وزیر اعلیٰ بنے تھے۔ 2021 میں پارٹی کی ریاستی یونٹ میں اندرونی اختلافات کے باعث انہوں نے وزیر اعلیٰ کے عہدے اور کانگریس سے استعفیٰ دے دیا اور اپنی نئی جماعت پنجاب لوک کانگریس بنائی۔ 2022 کے اسمبلی انتخابات میں پارٹی کو کوئی نشست نہ ملنے کے بعد انہوں نے اپنی جماعت کا بی جے پی میں انضمام کر دیا۔ امریندر سنگھ کی اہلیہ اور سابق رکن پارلیمنٹ پرنیت کور، بیٹے رنندر سنگھ اور بیٹی جے اندر کور بھی اب بی جے پی کے ساتھ ہیں۔