نئی دہلی/ آواز دی وائس
کل جب راشٹرپتی بھون میں ایک شخص کھڑا ہوا تو تمام نگاہیں اسی پر جم گئیں۔ اس کے بدن پر صدری، سر پر منڈاسا اور لُنگی تھی۔ جب وہ شخص سب کے سامنے آیا تو پورا راشٹرپتی بھون تالیوں کی گونج سے گونج اٹھا۔ اُسے دیکھ کر مشہور آئرش مصنف کی وہ بات یاد آ گئی کہ فن زندگی کی نقل نہیں کرتا بلکہ زندگی فن کی نقل کرتی ہے۔ کچھ ایسا ہی احساس اس وقت ہوا جب صدرِ جمہوریہ دروپدی مرمو نے پنڈی رام منڈاوی کو پدم شری ایوارڈ سے نوازا۔ جیسے ہی ان کا نام لیا گیا، سارا ہال اُن کی طرف متوجہ ہو گیا۔ ان کا سادہ لباس اس عظیم فنکار کی عاجزی کی جھلک پیش کر رہا تھا۔ ایوارڈ لینے پہنچتے ہی پنڈی رام منڈاوی نے سب سے پہلے وزیراعظم نریندر مودی، وزیر داخلہ امیت شاہ، وزیر خارجہ جے شنکر اور دیگر معززین کو پرنام کیا۔
پنڈی رام منڈاوی کو پدم شری کیوں دیا گیا؟
صدر دروپدی مرمو نے پنڈی رام منڈاوی کو "فن" کے شعبے میں ان کی خاص خدمات کے لیے پدم شری ایوارڈ سے نوازا۔ منڈاوی "موریا ووڈ آرٹ" کے لیے جانے جاتے ہیں جو ایک اہم قبائلی فن ہے۔ وہ اس فن کی ثقافتی وراثت کے محافظ بن چکے ہیں، انہوں نے یہ یقینی بنایا کہ نوجوان فنکاروں کو اپنے آبا و اجداد کی وراثت کو آگے بڑھانے کے لیے نہ صرف علم بلکہ وسائل بھی حاصل ہوں۔ انہوں نے مختلف عجائب گھروں اور اداروں میں کئی نمائشوں کی تیاری اور تنصیب میں معاونت کی ہے۔
پنڈی رام منڈاوی کا تعارف
تعلق: چھتیس گڑھ کے نارائن پور ضلع سے
قبیلہ: گونڈ موریا
پیشہ: بانسری اور لکڑی کے ساز بنانے والے، کاریگر
اہم پہچان: ‘سُلور’ (بستر کی بانسری) بنانے کے لیے مشہور
عمر: 68 سال
خدمات: بستر کی ثقافتی وراثت کو بچانے اور دنیا بھر میں پہنچانے میں اہم کردار
مہارت: لکڑی کے پینلوں پر ابھری ہوئی تصاویر، مورتی سازی اور دیگر فن پارے
شروعات: 12 سال کی عمر میں اپنے آبا و اجداد سے یہ فن سیکھا
عالمی شناخت: دنیا کے کئی ملکوں میں فن کا مظاہرہ کیا
زندگی: غربت میں گزری، لیکن فن کے جذبے نے انہیں بلند مقام تک پہنچایا
پنڈی رام منڈاوی نے چھتیس گڑھ کی ثقافت اور فن کو نہ صرف زندہ رکھا بلکہ عالمی سطح پر اسے نئی پہچان بھی دی۔ ان کی کہانی فن، سادگی اور لگن کا مظہر ہے۔
