نئی دہلی: کانگریس کے سابق صدر راہل گاندھی نے حال ہی میں پارلیمنٹ سے منظور کیے گئے مرکزی مسلح پولیس فورس (سی اے پی ایف) سے متعلق بل کا حوالہ دیتے ہوئے جمعرات کو کہا کہ مرکز میں ان کی پارٹی کی حکومت بننے پر اس امتیازی نظام کو ختم کر کے سی اے پی ایف کے جوانوں کو ان کے مکمل حقوق دیے جائیں گے۔

انہوں نے سی آر پی ایف یومِ شجاعت کے موقع پر اپنے پیغام میں یہ بھی کہا کہ ضروری ہے کہ سی اے پی ایف فورسز کی قیادت ایسے افراد کریں جو اسی نظام سے آئے ہوں اور ان کے مسائل اور ضروریات کو صحیح معنوں میں سمجھتے ہوں۔ پارلیمنٹ نے موجودہ بجٹ اجلاس کے دوران گزشتہ ہفتے مرکزی مسلح پولیس فورس (عمومی انتظام) بل 2026 کو منظوری دی تھی۔

وزیر مملکت برائے داخلہ نِتیانند رائے نے اس بل سے متعلق اپوزیشن کے خدشات کو مسترد کرتے ہوئے کہا تھا کہ یہ سی اے پی ایف کے کسی بھی طبقے کے خلاف نہیں ہے بلکہ فورسز کو مزید مضبوط بنانے میں مددگار ہوگا۔ لوک سبھا میں قائدِ حزبِ اختلاف راہل گاندھی نے جمعرات کو ‘ایکس’ پر پوسٹ کیا: "سی آر پی ایف یومِ شجاعت پر اس فورس کے ہمارے بہادر اور دلیر جوانوں کو دلی مبارکباد اور خراجِ عقیدت پیش کرتا ہوں۔ آپ کا حوصلہ اور قربانی ہر روز ہمارے ملک کی حفاظت کرتی ہے۔

آپ سرحدوں پر تعینات رہ کر ملک کو محفوظ رکھتے ہیں، دہشت گردی اور نکسل ازم کا مقابلہ کرتے ہیں، اور جمہوریت کے سب سے بڑے تہوار، انتخابات کو پرامن اور محفوظ بناتے ہیں۔" انہوں نے کہا: "حقیقی خراجِ عقیدت صرف الفاظ سے نہیں ہوتا۔ برسوں کی قربانی، محنت اور خدمت کے باوجود سی اے پی ایف کے جوانوں کو نہ بروقت ترقی ملتی ہے اور نہ ہی اپنے ہی فورس کی قیادت کرنے کا حق، کیونکہ اعلیٰ عہدے فورس کے باہر کے لوگوں کے لیے مخصوص ہیں۔"

ان کا کہنا تھا کہ سی اے پی ایف کے جوان خصوصی تربیت، زمینی تجربہ اور گہری حکمتِ عملی کی سمجھ رکھتے ہیں، اس لیے قومی سلامتی کے نقطۂ نظر سے بھی ضروری ہے کہ ان فورسز کی قیادت ایسے افراد کریں جو ان کے نظام سے آئے ہوں اور ان کے مسائل کو بہتر طریقے سے سمجھ سکیں۔

راہل گاندھی نے مزید کہا: قیادت کے مواقع سے محروم رکھنے سے لے کر تنخواہ، فلاح و بہبود اور عزت سے متعلق طویل عرصے سے زیرِ التوا مسائل تک یہ ادارہ جاتی ناانصافی ان جوانوں کے حوصلے کو متاثر کرتی ہے جو اپنی زندگی ملک کی حفاظت کے لیے وقف کر دیتے ہیں۔ یہ صرف کیریئر کا نہیں بلکہ انصاف اور عزت کا مسئلہ ہے۔ انہوں نے کہا: میں اور کانگریس پارٹی آپ کا مکمل احترام کرتے ہیں اور مانتے ہیں کہ اپنے ہی فورس میں ترقی، اعلیٰ قیادت اور عزت آپ کا حق ہے — ہماری حکومت آتے ہی اس امتیازی نظام کو ختم کیا جائے گا اور سی اے پی ایف کے جوانوں کو ان کے مکمل حقوق دیے جائیں گے۔ ملک آپ بہادروں کا مقروض ہے، اب وقت ہے کہ آپ کے ساتھ انصاف ہو۔